އަމީނީ މަގު ތަރައްގީކުރުމަށް ކުރިއަށްގެންދާ މަޝްރޫއުގެ ދަށުން އާރުޑީސީއިން އެމްޓީސީސީއާ ހަވާލުކޮށްގެން މިހާތަނަށް ތާރުއަޅާފައިވާ އޮތް ބައި މި ހަފުތާގެ ތެރޭގައި ހުޅުވާލާނެ ކަމަށް ޕްލޭނިން މިނިސްޓްރީއިން ބުނެފި އެވެ.
ޕްލޭނިން މިނިސްޓްރީގެ ދަށުން ހިންގާ މި މަޝްރޫއާ ބެހޭގޮތުން އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު" އަށް މިއަދު ވިދާޅުވީ، މިހާރު ކުރިއަށްދަނީ މަގު ހުޅުވުމަށް ކުރަންޖެހޭ އެންމެ ފަހުގެ މަސައްކަތްތައް ކަމަށާއި މި ހަފުތާ ތެރޭ ސްޓެލްކޯއާ ހަމައަށް ތާރުއަޅާފައިވާ ބައި ހުޅުވާލެވޭނެ ކަމަށެވެ.
"މަސައްކަތް ކުރަމުން މިދަނީ ރޯދައިގެ ކުރިން އިމާދުއްދީން ސްކޫލާ ހަމާލަށް ތާރުއަޅާ ނިންމާލުމަށް،" އަކްރަމް އިތުރަށް ވިދާޅުވި އެވެ.
އަމީނީ މަގުގައި ތާރު އެޅުމުގެ މަސައްކަތް އަވަސްކުރުމަށް އާރުޑީސީއިން އެމްޓީސީސީއާ ހަވާލުކޮށްގެން އެ މަސައްކަތް ފެށީ މި މަހުގެ 14 ގަ އެވެ. އެ ރޭ މީޑިއާތަކާ ވާހަކަދައްކަވަމުން އެމްޓީސީސީގެ ޖެނެރަލް މެނޭޖަރު ރަމްޒީ އަބޫބަކުރު ވެސް ވަނީ ރޯދައިގެ ކުރިން ފުުރުގާން މިސްކިތާ ހަމައަށް ތާރު އަޅާ ނިމޭނެ ކަމަށް ވިދާޅުވެފަ އެވެ.
މިހާތަނަށް ތާރުއެޅި ސަރަހައްދުގައި އެމްޓީސީސީއިން ތާރުއަޅާ ނިންމީ ފަސް ގަޑިއިރުގެ ތެރޭގަ އެވެ.
އާރުޑީސީގެ ތާރު އަޅާ މެޝިންތައް ބަހައްޓާނެ ބިމެއް ލިބުން ލަސްވުމާއެކު، އަމީނީ މަގު ތަރައްގީ ކުރުމުގެ މަސައްކަތް ހަލުވި ކުރުމަށް އެ ކުންފުނިން ތާރު އެޅުން އެމްޓީސީސީއާ ހަވާލު ކުރީ މި މަހުގެ 11 ގަ އެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ނަމަވެސް އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މި މަހުގެ ފުރަތަމަ ހަފުތާގައި މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
