ޔޫރަޕަށް ހިޖުރަ ކުރަން އުޅުނު ބަޔަކު ތިބި ބޯޓެއް އިޓަލީގެ ދެކުނުން އަޑިއަށް ދިޔުމުން، ތުއްތު ކުއްޖަކު ހިމެނޭ ގޮތަށް، 40 އަށް ވުރެ ގިނަ މީހުން ގެނބިގެން މަރުވެއްޖެ އެވެ.
ރިޕޯޓުތައް ބުނާ ގޮތުން 100 އަށް ވުރެ ގިނަ މީހުން ފިތިބާރުވެގެން ދަތުރުކުރަމުން ދިޔަ ބޯޓު މެދުން ބިންދައިގެން ދިޔައީ ކްރޮޓޯން އަވަށާ ކައިރި ކުރަން އުޅެނިކޮށެވެ.
ގެނބިގެން މަރުވި ގިނަ ބަޔެއްގެ ހަށިގަނޑު ފެނުނީ އެ ސަރަހައްދުގައި ހުންނަ ރިސޯޓެއްގެ ގޮނޑުދޮށަށް ލައްގާފައި ވަނިކޮށެވެ.
ދާހިލީ ހަމަނުޖެހުމާއި ފަގީރުކަމުން ސަލާމަތްވުމަށް ކޮންމެ އަހަރަކު ވެސް ގިނަ އަދަދެއްގެ މީހުން އެފްރިކާއިން ފެށިގެން ކަނޑު ހުރަސްކޮށް އިޓަލީއަށް ދަތުރު ކުރަން މަސައްކަތް ކުރެ އެވެ.
އިޓަލީގެ ކޯސްޓްގާޑުން ނެރުނު ބަޔާނެއްގައި ބުނީ ބޯޓުގައި ތިބި މީހުންގެ ތެރެއިން 80 މީހުން ސަލާމަތްކޮށްފައިވާ ކަމަށެވެ. ބަައެއް މީހުން ގޮނޑުދޮށާ ހަމައަށް ދިޔައީ ފަތާފަ އެވެ.
"އައްސޭރިފަށަށް ލައްގާފައިވާ 43 ހަށިގަނޑު ފެނުނު،" ބަޔާނުގައިވެ އެވެ.
ބޯޓު ދަތުރު ފެށީ ކޮން ތަނަކުން ކަމެއް ސާފެއް ނޫނެވެ. އެހެން ނަމަވެސް އިޓަލީގެ ނޫސްތަކުން ބުނީ އޭގައި ތިބީ އިރާން، އިރާގް، ސީރިއާ، އަފްގާނިސްތާން، ޕާކިސްތާން އަދި ސޯމާލިއާގެ ރައްޔިތުން ކަމަށެވެ.
މޮނީޓާކުރާ ގްރޫޕްތަކުން ބުނާ ގޮތުގައި 2014 ވަނަ އަހަރުން ފެށިގެން މެޑިޓެރޭނިއަން ކަނޑުގައި 20،000 އަށް ވުރެ ގިނަ މީހުން މަރުވެ ނުވަތަ ގެއްލިފައިވެ އެވެ.
