އިޓަލީގައި ރާއްޖޭގެ އެމްބަސީއެއް ހުޅުވަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން، ރައީސް ވިދާޅުވީ އެމްބަސީ ހުޅުވަން އެދުނީ ދިވެހި ސަރުކާރުން ކަމަށެވެ. އަދި އިޓަލީގައި އެމްބަސްީ ގާއިމުކުރުމަށް އެ ގައުމުގެ ސަރުކާރުން ހުއްދަ ލިބިފައިވާ ކަމަށް ވެސް އެމަނިކުފާނު ރޭ ވިދާޅުވި އެވެ.
"އަޅުގަނޑުމެން އެކަމަށް ހުށަހަޅައިގެން އިރާދަކުރެއްވިއްޔާ ޓޫރިޒަމަށް ވަރަށް މުހިންމު ވީމަ މިކަން ކުރަން މި ނިންމީ،" ރައީސް ވިދާޅުވި އެވެ.
އިޓަލީގެ އިތުރުން ވެސް ރާއްޖެއަށް މުހިންމު އަދި ބޭނުންތެރި ބައެއް ގައުމުތަކުގައި އިތުރު އެމްބަސީތަކާއި ހައި ކޮމިޝަންތައް ހުޅުވާނެ ކަމަށްވެސް ރައީސް ރޭ ވިދާޅުވި އެވެ. ނަމަވެސް އެ ގައުމުތަކުގެ ތަފުސީލެއް ނުދެއްވަ އެވެ.
މި ވެރިކަމުގައި ރާއްޖެއިން އަލަށް އެމްބަސީއެއް ގާއިމުކުރީ ތުރުކީގަ އެވެ.
އެ ގައުމަށް ރާއްޖެއިން ކަނޑައަޅާފައި ހުންނަވާ ސަފީރުގެ މަގާމަށް އައްޔަން ކުރައްވާފައިވަނީ ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ކުރީގެ ޗީފް އޮފް ޑިފެންސް ފޯސް، ލެފްޓިނެންޓު ޖެނެރަލް، ރިޓަޔާޑް، އަބްދުއްރަހީމް އަބްދުއްލަތީފު އެވެ.
