މާލެސިޓީ ކައުންސިލްގެ ބައެއް ހިދުމަތްތަކުން ނަގާ ފީ ކުޑަ ކުރުމަށް މާލޭސިޓީ ކައުންސިލްގެ މުނިސިޕަލް ސާވިސަސް ކޮމިޓީން ނިންމައިފި އެވެ.
ސިޓީ ކައުންސިލުން އެގޮތަށް ނިންމާފައިވަނީ އެކައުންސިލްގެ މުނިސިޕަލް ސާވިސަސް ކޮމިޓީގެ 58 ވަނަ ބައްދަލުވުމުގަ އެވެ.
އެ ބައްދަލުވުމުގައި ފާސްކޮށްފައިވަނީ މާލެ އާއި ވިލިމާލޭގެ ފަޅުތަކާއި ބަނދަރުތައް ބޭނުން ކުރުމާއި، އެތަންތަނުން އުޅަނދުފަހަރަށް ފައްތިޔާ އަދި ފަޅުހުއްދަ ފީނެގުމުގެ އިތުރުން މާލޭގެ މަގުމަތީގައި މަސައްކަތް ކުރުމަށް ދޫކުރާ ބޯޑުތަކުގެ އަގު ހެޔޮކުރުމަށެވެ.
އެގޮތުން، ސިޓީ ކައުންސިލުން ކުޑަކުރަން ނިންމާފައިވަނީ މާލޭ މަގުމަތީގައި މަސައްކަތް ކުރުމަށް ދޫކުރާ ބޯޑުތަކުގެ ފީ އާއި މާލެ އާއި ވިލިމާލޭ ފަޅުން ދޫކުރާ ފައްތިޔާ އަދި ފަޅުހުއްދަ ފީ އެވެ.
ސިޓީ ކައުންސިލުން ބުނީ ފީ ތަކަށް ގެނެވުނު ބަދަލާއިއެކު ގެޒެޓް ކުރެވިފައިވާ އިއުލާނާއި އެއްގޮތަށް މާލެ އާއި ވިލިމާލެ ފަޅުން އުޅަނދު ފަހަރަށް ފައްތިޔާ، ފަޅުހުއްދަ އަދި މާލޭގެ މަގުމަތީގައި މަސައްކަތް ކުރުމަށް ދޫކުރާ ބޯޑު ތަކުގެ އަގުލިސްޓްއަށް މިއަދުން ފެށިގެން އަމަލުކުރާނެ ކަމަށެވެ.
މިދިޔަ ޖެނުއަރީ މަހުގެ ފުރަތަމަ ދުވަހުން ފެށިގެން ފައްތިޔާ ފީ ވަނީ ބޮޑުކޮށްފަ އެވެ.
މާލޭ ހުޅަނގު ބަނދަރު ދާއިމީ ފަޅުހުއްދަ ފީގެ ގޮތުގައި މިއަދާ ހަމައަށް ނަގަމުން އައީ އަމިއްލަ އުޅަނދުތަކުން ކޮންމެ މީޓަރަކަށް ތިން ރުފިޔާ އަދި ކުންފުނިތަކުގެ އުޅަނދެއް ނަމަ އުޅަނދުގެ ދިގުމިނުން ކޮންމެ މީޓަރަކަށް ފަސް ރުފިޔާ އެވެ. އެ ދެ ކެޓަގަރީން ވެސް ދެ ރުފިޔާ ވަނީ ހެޔޮކޮށްފަ އެވެ.
