ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުބާރު ނެތްކަމުގެ ވޯޓު ނަގާނެ ކަމުގެ އިންޒާރު މެދުހެންވޭރު ދާއިރާގެ މެންބަރު އަލީ އާޒިމް ދެއްވައިފި އެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމުގެ ވޯޓު ނެގުމަށް ބޭނުންވާ ވޯޓުގެ އަދަދު ހަމަވެފައި ހުރި ކަމަށާއި، ނަމަވެސް އެފަދަ ނިންމުމެއް ނިންމުމުގެ ކުރިން އެމްޑީޕީ އަދި ގުޅުންހުރި ހުރިހާ ގުނަންތަކެއްގެ ވެސް ވިސްނުން ހުރިގޮތް ބަލާނެ ކަމަށް ޕާލިމަންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް "އަދަދު"އަށް ދެއްވި އިންޓަވިއުއެއްގައި ވިދާޅުވެފައި ވެއެވެ.
މިކަމާ ގުޅިގެން ދެކަފިވެފައިވާ އެމްޑީޕީގެ ނަޝީދަށް ތާއީދުކުރައްވާ އާޒިމް މިއަދު ކުރެއްވި ޓްވީޓެއްގައި ވިދާޅުވެފައި ވަަނީ، މަޖިލީހުގެ ރައީސްގެ މަގާމުން ނަޝީދު ވަކިކުރުމަށްޓަކާ ވޯޓު ހަމަކުރަން މަސައްކަތް ފަށައިފި ނަމަ ރައީސް ސޯލިހުގެ އިތުބާރު ނެތް ކަަމުގެ ވޯޓު ހަމަކުރުމުގެ މަސައްކަތް ފަށާނެ ކަމަށެވެ.
ރައްޔިތުންގެ މަޖިލީހުގެ ރައީސްކަމުގައި ހުންނަވައިގެން ކުރައްވަން ޖެހިވަޑައިނުގަންނަވާ އެތައް ކަމެއް ކުރަމުންދާ ކަމަށް މީގެ ކުރިންވެސް ގިނަ މެމްބަރުން ވެސް ނަޝީދަށް ތުހުމަތު ކުރެ އެވެ.
އެގޮތުން މެންބަރުންނަށް ބަހުސްކުރުމުގެ ފުރުސަތު ދިނުމުގައި ތަފާތުކުރުން ގެންގުޅުމާއި، އަމިއްލަފުޅަށް ބަހުސްތަކުގައި އަދި މަޖިލީހަށް ހާޒިރުކުރެވޭ ފަރާތްތަކާ ސުވާލުކުރުން ފަދަ ގަވައިދާ ހިލާފް ކަންކަން ނަޝީދު ކުރައްވާކަމުގެ ތުހުމަތުތައް އަބަދުވެސް ކުރެ އެވެ.
ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ފާސްވާނީ ހާޒިރުވެ ވޯޓުގައި ބައިވެރިވާ މެންބަރުންގެ އަގުލަބިއްޔަތުންނެވެ. މަޖިލީހަށް އެ މައްސަލަ ހުށަހަޅައި ބަހުސް ފަށަން ބޭނުން ވަނީ 22 މެންބަރުންގެ ސޮޔެވެ.
ޖުމްލަ 87 މެމްބަރުން އެކުލެވޭ މަޖިލީހުގައި ނަޝީދު ނުހިމަނައި، އެމްޑީޕީ ތަމްސީލުކުރާ 65 މެމްބަރުން ތިއްބަވަ އެވެ.
