ރާއްޖޭގައި އުފެދުނު ސިޔާސީ ޕާޓީތަކުގެ ތެރެއިން ބަދަލެއް ނައިސް ކުރިއަށްދާ ހަމައެކަނި ސިޔާސީ ޕާޓީއަކީ އަދާލަތު ޕާޓީކަމަށް އެ ޕާޓީގެ ރައީސް އިމްރާން އަބްދުﷲ ވިދާޅުވެއްޖެ އެވެ.
އަދާލަތު ޕާޓީގެ މަޝްވަރާ މަޖިލީހުގެ މެންބަރުން ކުރިއަށް ގެންދާ 'ހޭރިޔާ 2023' ޕްރޮގްރާމް ފެށުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އިމްރާން ވިދާޅުވީ، އަދާލަތު ޕާޓީއަކީ ރާއްޖޭގައި ތިންވަނަ އަށް ރަޖިސްޓާ ކުރެވުނު ސިޔާސީ ޕާޓީ ކަމަށެވެ.
އަދި އެ ޕާޓީގެ އިސްލާހީ މަސައްކަތް ބިނާކުރަނީ އިސްލާމީ ޝަރުއީ އިސްލާހީ މަސައްކަތުގެ މައްޗަށް ކަމަށްވެސް އިމްރާން ވިދާޅުވި އެވެ.
"ބަދަލެއް ނައިސް އެއްގޮތެއްގައި މަޑުމަޑުން ކުރިއަށްދާ ހަމައެކަނި ސިޔާސީ ޕާޓީއަކީ އަދާލަތު ޕާޓީއޭ ބުނުމަކުން ގޯހަކަށް ނުވާނެ ކިތަންމެ ޕޮއިންޓެއް އަޅުގަނޑު ސާބިތުކޮށްދީފާނަން،" އިމްރާން ވިދާޅުވި އެވެ.
އެގޮތުން އިމްރާން ވިދާޅުވީ، ޕާޓީގެ ލީޑަޝިޕު ބަދަލުވުމުން ޕާޓީގެ ސިޔާސަތުތަކާއި އުސޫލުތައް އަދި ޕާޓީއިން ގަބޫލުކުރާ ހަމަތައް ބަދަލުވެގެން ނުދާ ސިޔާސީ ޕާޓީއެއް ނެތް ކަމަށެވެ. އަދާލަތު ޕާޓީ ފިޔަވާ ދެން އެންމެ ރަނގަޅަށް އޮތީ އަދާލަތުން އެ ޕާޓީއަކާ އެކު ކޯލިޝަން ހަދާފައިވާ އެމްޑީޕީ ކަމަށާއި އެމްޑީޕީގެ ލީޑަޝިޕަށް އައި ބަދަލުތަކާއެކު އެ ޕާޓީއަށް އައި ބަދަލުތައްވެސް ވަރަށް ރަނގަޅަށް އެނގޭ ކަމަށްވެސް އިމްރާން ވިދާޅުވި އެވެ.
"އަދާލަތު ޕާޓީގެ ފުރަތަމަ ރައީސެއް ހުންނެވި، މިހާރު އަޅުގަނޑު ރައީސަކަށް މި ހުރީ، އަޅުގަނޑުމެންގެ އުސޫލަކާ ސިޔާސަތަކަށް ބަދަލެއް ނާދޭ،" އިމްރާން ވިދާޅުވި އެވެ.
ދެން އިމްރާން ސުވާލުކުރެއްވީ ރާއްޖޭގައި އުފެދުނު ފުރަތަމަ ސިޔާސީ ޕާޓީތައް މިއަދު އޮތް ހާލަތާމެދު އެވެ. އެގޮތުން ފުރަތަމަ އުފެދުނު އޭރުގެ އެންމެ ބޮޑު ޕާޓީ ޑީއާރުޕީ ކޮބައިތޯ ސުވާލު އުފައްދަވާ އިމްރާން ވިދާޅުވީ، އޭގެ ފަހުން އުފެދުނު 17 ވަރަކަށް ޕާޓީއާއި އެ ޕާޓީތަކުގެ ލީޑަރުން މިހާރު ފެންނަން ނެތް ކަމަށެވެ.
މީގެ އިތުރުން އަދާލަތު ޕާޓީ އުފެއްދި ދުވަހުން ފެށިގެން އެ ޕާޓީގެ މަސައްކަތާއި އަމާޒު އަދި ދާންވީ މަންޒިލް އެ ޕާޓީއަށް ސާފުކަން ފާހަގަކުރައްވާ އިމްރާން ވިދާޅުވީ، 100 އިންސައްތަ އިސްލާމީ ރާއްޖެ ބިނާވާނީ އިސްލާމީ، ޝަރުއީ، އަދި ސިޔާސީ ހަމަތަކުގެ މައްޗަށް ކަމަށެވެ.
