އަދާލަތު ޕާޓީގެ ރައީސަކަށް 99 ޕަސަންޓު ވޯޓާއެކީ އެ ޕާޓީގެ ނައިބު ރައީސް ޝައިހް މުހައްމަދު ޝިފާން އިންތިހާބުކުރި އިންތިހާބުގައި ވޯޓުލީ އެންމެ 22 ޕަސެންޓު މެންބަރުންކަން ވަގުތީ ނަތީޖާއިން ދައްކައިފި އެވެ.
މި އިންތިހާބުގެ ނަތީޖާ ހާމަކުރުމަށް އަދާލާތު ޕާޓީން ކުރި އިއުލާނުގައި ވޯޓު ދިން މީހުންގެ އަދަދު ހާމަކުރުމުގެ ބަދަލުގައި ހާމަކޮށްފައިވަނީ އިންސައްތަ އެވެ. ވޯޓު ދިނުމުގެ ހައްގު ލިބިގެންވާ މީހުންގެ ޖުމުލަ އަދަދު ވެސް ހާމަކޮށްފައެއް ނުވެ އެވެ.
މިކަމާ ގުޅިގެން 'އަދަދު' ނޫހުން ސުވާލުކުރުމުން އެ ޕާޓީން ޖަވާބު ދީފައިވަނީ އެ އިންތިހާބުގައި ވޯޓުލުމުގެ ހައްގު ލިބެނީ އަދާލަތު ޕާޓީގެ 8340 މެންބަރުންނަށް ކަމަށެވެ. ނަތީޖާ ހާމަކުރުމުގައި މެންބަރުންގެ އަދަދުގެ ބަދަލުގައި އިންސައްތަ ހާމަކުރީ ކީއްވެގެން ކަމެއް އަދާލަތު ޕާޓީން ނުބުނެ އެވެ.
ވޯޓު ދިނުމުގެ ހައްގު ލިބޭ މެންބަރުންގެ ނިސްބަތުން ހިސާބު ކުރާއިރު ވޯޓުލާފައިވަނީ 1834 މެންބަރުންނެވެ. އޭގެ ތެރެއިން 1816 ވޯޓު ޝިފާނަށް ލިބުނުއިރު އިކްރާމަށް ލިބުނީ 18 ވޯޓެވެ.
އިންތިހާބުގައި ލިބުނު ކާމިޔާބީއާ ގުޅިގެން ޝައިހް ޝިފާން ވަނީ އޭނާއަށް އިތުބާރުކުރައްވައި ވޯޓު ދެއްވި ހުރިހާ އެންމެންނަށް ޝުކުރު އަދާކުރައްވާފަ އެވެ.
ޝައިހް ޝިފާން ވިދާޅުވީ ވިދާޅުވީ އިންތިހާބުގައި އަދާލަތު ޕާޓީގެ މެންބަރުން ގިނަ ހުރިހާ ރަށަކަށް އޭނާގެ ޓީމުން ޒިޔާރަތްކޮށް ސީދާ މެންބަރުންގެ ވާހަކަތައް އަޑު އެހިގެންދިޔުމަކީ ޕާޓީގެ މުސްތަގުބަލު ހަރުދަނާކުރަން އެޅުނު މުހިންމު ފިޔަވަޅެއް ކަމަށެވެ.
އަދާލަތު ޕާޓީ އަކީ އިސްލާމްދީނާއި ދިވެހި ގައުމުގެ މަސްލަޙަތު އިސްކޮށް މަސައްކަތް ކުރާ ޕާޓީ އެއްގެ ގޮތުގައި ދަމަހައްޓާ މެމްބަރުންގެ އުއްމީދުތަކާއި އެއްގޮތަށް ކަންކަން ހިންގާ ޕާޓީ އެއްގެ ގޮތުގައި ބައްޓަން ކުރާނެކަމުގެ ޔަގީންކަން ޝަައިހް ޝިފާން ދެއްވި އެވެ.
އިންތިހާބުގައި ވާދަކުރެއްވި އިކްރާމަށް އެއް ޕަސަންޓު ވޯޓުވެސް ނުލިބޭއިރު، އޭނާ ވަނީ މިދިޔަ ހަފްތާގައި ނަން އަނބުރާ ގެންދަވާފަ އެވެ. ނަމަވެސް އެ ޕާޓީން ނިންމީ އިންތިހާބު ކުރިއަށް ގެންދަންށެވެ.
