ނައިޖީރިއާގެ އާއްމު އިންތިހާބުގައި ވޯޓުލާން އެންމެ ދުވަހަކަށް ވެފައި ވަނިކޮށް ގާތްގަނޑަކަށް 500،000 ޑޮލަރުގެ ނަގުދު ފައިސާ ހިފައިގެން އުޅެނިކޮށް، ޕާލަމެންޓް މެމްބަރަކު ހައްޔަރުކޮށްފި އެވެ.
މަނީ ލޯންޑަރިންގެ ތުހުމަތުގައި ހައްޔަރު ކުރި އިރު އިދިކޮޅު ޕީޑީޕީގެ އެމްޕީ ޗިންޔެރޭ އިގްވޭގެ ކާރު ތެރޭގައި 498،100 ޑޮލަރުގެ ނަގުދު ފައިސާ ހުއްޓެވެ. އެ ފައިސާ ބަހަންވީ މީހުންގެ ނަންތައް ލިޔެފައި އޮތް ލިސްޓެއް ވެސް އޭނާގެ އަތުން ފެނުނެވެ.
ނައިޖީރިއާގެ އިންތިހާބުތަކުގައި ވޯޓު ގަނެ ވިއްކުމުގެ މައްސަލަަ ވަރަށް ބޮޑެވެ. ވޯޓުލާ މީހުންނަށް ރިޝްވަތު ދިނުން ހުއްޓުވުމުގެ ގޮތުން އިދާރާތަކުން ފިޔަވަޅު ވެސް އަޅަ އެވެ.
އިގްވޭ ހައްޔަރު ކުރުމަށް ފަހު ފުލުހުން ގޮވާލީ ހުރިހާ ސިޔާސީ ޕާޓީތަކުން ވެސް ގާނޫނުތަކާ އެއް ގޮތަށް އަމަލު ކުރުމަށެވެ. އެ މައްސަލައާ ގުޅޭ ގޮތުން އިގްވޭގެ ފަރާތުން ވަކި އެއްޗެއް ހާމަކޮށްފައެއް ނުވެ އެވެ.
ނައިޖީރިއާގައި މިހާރު ކުރިއަށްދާ އާއްމު އިންތިހާބަކީ 1999 ވަނަ އަހަރު އަސްކަރީ ވެރިކަން ނިމުނު ފަހުން އެންމެ ވާދަވެރި އިންތިހާބެވެ.
އެންމެ ވާދަވެރި ކެންޑިޑޭޓުންނަކީ ޕީޑީޕީގެ އަތިކޫ އަަބޫބަކަރް، ލޭބާ ޕާޓީގެ ޕީޓާ އޮބި އަދި މިހާރު ވެސް ވެރިކަމުގައި އޮތް އޭޕީސީގެ ބޯލާ ތިނުބު އެވެ.
