އަންނަ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހާ ދެކޮޅަށް މަސައްކަތް ކުރައްވައި، އަލުން ވެރިކަން ނުލިބޭނެ ގޮތަށް ހުރަސްއެޅުއްވުމަށްފަހު، އެމްޑީޕީ އަނބުރާ ހޯއްދަވަން ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދަށް ވަރަށް ދަތިވާނެ ކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
"އަދަދު" އަށް ދެއްވި އިންޓަވިއުއެއްގައި އެމްޑީޕީގެ ޕާލިމަންޓަރީ ގުރޫޕުގެ ލީޑަރު އަސްލަމް ވިދާޅުވީ ދެ ރައީސުންގެ މެދުގައި އޮތް ނުތަނަވަސްކަން ހީކުރި ވަރަށް ވުރެ ގޯސްވެފައިވާ ކަމަށެވެ.
އަދި އެކި ފަހަރު މަތިން މަޝްވަރާކޮށްގެން އެ ނުތަނަވަސްކަމަށް ހައްލެއް ނުލިބި، މިދިޔަ މަހު ބޭއްވި އެމްޑީޕީގެ ރިޔާސީ ޕްރައިމަރީން ނާކާމިޔާބުވުމުން ވެސް، ނަޝީދު ދޫނުދެއްވުމަކީ ހިތާމަކުރައްވާ ކަމެއް ކަމަށް އަސްލަމް ވިދާޅުވި އެވެ.
"އެންމެ ރަނގަޅު ސިޔާސީ ހައްލަކީ ވާހަކަ ދައްކައިގެން ކަންކަން ހައްލުކުރުން. މަޝްވަރާ ނުކުރެވެންޏާ ދެން މި އޮންނަނީ ވޯޓަކުން ނިންމުން. ދެން ވޯޓަކަށް ބަލާއިރު، 61 ޕަސަންޓަކީ ފުދޭ ވަރެއްގެ ބޮޑު އެއްޗެއް ވާދަވެރި އިންތިހާބަކަށް ބަލާއިރު،" ރައީސް ސޯލިހު އެ ޕްރައިމަރީ ކާމިޔާބު ކުރެއްވި ވޯޓުގެ އަދަދު އަސްލަމް ފާހަގަކުރެއްވި އެވެ.
އެކަމަކު ނަޝީދަށް ވެސް 39 ޕަސަންޓު ލިބިވަޑައިގެންނެވުމަކީ ބަލައިގަންނަންޖެހޭ ކަމެއް ކަން ފާހަގަކުރައްވައި އަސްލަމް ވިދާޅުވީ، އެއީ މާބޮޑު ނާކާމިޔާބީއެއްގެ ގޮތުގައި ބެލުމަށްވުރެ، ޕާޓީ ކުރިއަށް ގެންދަން ނަޝީދު ވިސްނަވަންޖެހޭ ކަމަށެވެ.
"މިކަމުން [ދެ ރައީސުންގެ ކޯޅުމުން] ޕާޓީ ލޫޒްވާން ޖާގަ ލިބުން ނޫން ނަތީޖާއެއް ނުނިކުންނާނެ،" އަސްލަމް ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި، ކިތަންމެ ބޭނުންވިޔަސް، ނާކާމިޔާބުވި ކެންޑިޑޭޓަށް ޓިކެޓު ދެވޭނެ ގޮތެއް އަދި ހަމައެއް ވެސް ނޯންނާނެ އެވެ.
"ބައެއް ފަހަރު ސިޔާސީ ކަންކަމުގަ އުޅުއްވާއިރު ދޫ ދޭންޖެހޭނެ. ދެން އޮންނާނެ ގޮތަކީ ބަލި ގަބޫލުކޮށް ހިތްވަރާއެކު ދެން އަންނަ އިންތިހާބަކަށް މަސައްކަތް ކުރުން،" އަސްލަމް ވިދާޅުވި އެވެ.
ޕްރައިމަރީގެ ނާކާމިޔާބީއަށްފަހު "ފިކުރެއްގެ ދިރުން"ގެ ނަމުގައި އެމްޑީޕީގެ ތެރެއިން ތާއީދު އެއްކުރުމަށް ނަޝީދު މިހާރު ފައްޓަވާފައިވާ ކެމްޕޭނު، އަސްލަމް ސިފަކުރެއްވީ ރިޔާސީ އިންތިހާބު އެމްޑީޕީއަށް ކާމިޔާބުވިޔަ ނުދީ ޕާޓީގެ ކޮންޓްރޯލް އަނބުރާ ހޯދަން ކޮށަމުންދާ މަގެއްގެ ގޮތުގަ އެވެ.
"މި ވޯޓުލީ މީހުންގެ 60 ޕަސަންޓު މީހުން ތިބޭނެ ނޫންތޯ. ކުރިއަށް އޮތް ތަނުގަވެސް އަދި ޕާޓީ އަނބުރާ ހޯއްދަވަންވެސް މަގާމެއް ހޯއްދަވަން ވެސް، ޕާޓީއަށް ވެރިކަން ނުލިބޭނެ ހުރިހާ ކަމެއް ކޮށްފަ ވެރިކަން ނުލިބުނީމަ ދެން އަނެއްކާ އަޅުގަނޑުމެން ތިބޭނެ ކަމަށްތޯ ގަބޫލުކުރައްވަނީ،" އަސްލަމް ވިދާޅުވި އެވެ.
ވެރިކަން ހިންގުމުގެ ނިޒާމު ބަދަލުކުރުމާއި "ފިކުރެއްގެ ދިރުން" ފަދަ ނަޝީދު ކުރައްވާ މަސައްކަތްތައް ގޮސް ގުޅެނީ ވެރިކަމުގެ އާރާއި ބާރު ހޯއްދެވުމުގެ ގޮތުގައި ވެސް އަސްލަމް ސިފަކުރެއްވި އެވެ.
އެކަމަކު ކުރިން ހީކުރެއްވި ވަރަށް ދެ ރައީސުންގެ މެދުގައި އޮތް ރެނދު ބޮޑުކަމަށް އަސްލަމް ވިދާޅުވި ނަމަވެސް، އަދިވެސް އެކުގައި މަސައްކަތް ކުރެވޭނެ ކަމުގެ އުއްމީދު ދޫކޮށްނުލައްވަ އެވެ.
ހާއްސަކޮށް ރިޔާސީ އިންތިހާބުގައި ކޯލިޝަން ހެދުމުގެ ބާރު އެމްޑީޕީން ރައީސް ސޯލިހަށް ދީފައިވާއިރު، އެފަދަ މަޝްވަރާތައް ފުރަތަމަ ކުރުން އެންމެ ރަނގަޅުވާނީ ނަޝީދާއެކު ކަމަށް އަސްލަމް ގަބޫލުކުރައްވަ އެވެ.
ނަޝީދާއި އެމަނިކުފާނަށް ތާއީދުކުރައްވާ ބޭފުޅުން ވެސް އެމްޑީޕީގައި ތިއްބަވައިގެން، ޕާޓީއަށް ކުރި ހޯދުމަށް މަސައްކަތް ކުރެއްވުމަށް އޭނާ އެދިވަޑައިގެންނެވި އެވެ.
