މިހާރު އޮތް ކޯލިޝަން ދަމަހައްޓައި، ރިޔާސީ އިންތިހާބުގައި ރައީސް ސޯލިހަށް ތާއީދު ކުރުމަށް އަދާލަތު ޕާޓީން ނިންމުމާ ގުޅިގެން ރައީސް އިބްރާހިމް މުހައްމަދު ސޯލިހު މަރުހަބާ ދަންނަވައިފި އެވެ.
ދާދި ދެންމެއަކި އެ މަނިކުފާނު ސޯޝަލް މީޑިއާގައި ލިޔުއްވި މެސެޖެއްގައި ވިދާޅުވީ ރިޔާސީ އިންތިހާބުގައި އަދާލަތު ޕާޓީން އެމްޑީޕީއާ ގުޅިގެން ކުރިއަށް ދިޔުމަށް ނިންމި ނިންމުމަށް މަރުހަބާއާއި ޝުކުރު ދަންނަވާ ކަމަށެވެ.
"2023ގެ ރިޔާސީ އިންތިޚާބުގައި އަދާލަތު ޕާޓީން އެމްޑީޕީއާ ގުޅިގެން ކުރިޔަށްދިއުމަށް ނިންމި ނިންމުމަށް މަރުޚަބާއާއި ޝުކުރުދަންނަވަން. އަޅުގަނޑު އެދެނީ ދިވެހިރާއްޖެއަށް ހަމަޖެހުމާއި އުފާވެރި މާދަމައެއް ހޯދައިދިނުމުގައި އަޅުގަނޑުމެން އެންމެން އެކީ ގުޅިގެން ކުރިއަށްދިޔުން،" އެ މަނިކުފާނު ލިޔުއްވި މެސެޖުގައި ވެއެވެ.
އަދާލަތު ޕާޓީގެ ނިންމުމާ ގުޅިގެން ރައީސް ސޯލިހުގެ އިތުރުން އެމްޑީޕީގެ ޗެއާޕާސަން، ފައްޔާޒް އިސްމާއިލް ވެސް ވަނީ އެ ޕާޓީއަށް މަރުހަބާ ދަންނަވައިފަ އެވެ.
މަރުހަބާ ދަންނަވައި ފައްޔާޒް ލިޔުއްވި މެސެޖުގައި ވިދާޅުވީ ކޯލިޝަންގެ އެތެރެއިންނާއި ބޭރުން އަދާލަތަށް ކުރިމަތި ކުރުވި ބޮޑެތި ގޮންޖެހުންތަކާއި ފުރައްސާރަތަކާ އެކުވެސް ސާބިތުކަމާ އެކު އެމްޑީޕީއާ އެކު ތިއްބެވީތީ ޝުކުރުދަންނަވާ ކަމަށާއި އަދާލަތުގެ ނިންމުމަށް މަރުހަބާ ދަންނަވާ ކަމަށެވެ.
އެމްޑީޕީން ވަނި މިއީ ހަރުދަނާ ނިންމުމެއްގެ ގޮތުގައި ސިފަކޮށް އެކަމަށް މަރުހަބާ ކިޔާފަ އެވެ. އެ ޕާޓީން ނެރުނު ބަޔާނެއްގައި ވަނީ އަދާލަތު ޕާޓީއަށް މިކަމާ ގުޅިގެން ޝުކުރު އަދާކޮށްފަ އެވެ.
"2018 ގައި އުފެދުނު މި ވެރިކަމުގައި ރައްޔިތުންނަށްވީ ވައުދުތައް ފުއްދުމުގައި އިހުލާސްތެރިކަމާއެކު ސަރުކާރަށް އެއްބާރުލުންދީގެން މިހާތަނަށް ދެމިތިބި ކަމަށްޓަކައި އަދާލަތު ޕާޓީއަށް ދިވެހި ރައްޔިތުންގެ ޑިމޮކްރެޓިކް ޕާޓީން ޝުކުރު އަދާކުރަމެވެ،" އެ ބަޔާނުގައި ބުނެފައިވެ އެވެ.
ރިޔާސީ އިންތިހާބުގައި ރައީސް ސޯލިހަށް ތާއީދު ކުރުމަށް އަދާލަތު ޕާޓީން ނިންމާފައި ވަނީ މިއަދު ހަވީރު ކުރިއަށް ގެންދިޔަ އެ ޕާޓީގެ މަޝްވަރާ މަޖިލީހުގެ ބައްދަލުވުމުގައި ބައިވެރިވި 42 މެންބަރުންގެ ތެރެއިން 38 މެންބަރުންގެ ވޯޓާ އެކު އެވެ.
ރިޔާސީ އިންތިހާބުގައި އެމްޑީޕީއާ އެކު ކޯލިޝަން ހެދުމަށް އަދާލަތުން ނިންމާފައި ވާއިރު މިހާރު ވެރިކަން ކުރާ ކޯލިޝަނުގައި ހިމެނޭ އަނެއް ދެ ޕާޓީ، އެމްއާރުއެމްއާއި ޖުމްހޫރީ ޕާޓީން އަދި އިންތިހާބާ މެދު ވަކި ގޮތެއް ނިންމާފައެއް ނުވެ އެވެ.
އެ ޕާޓީތަކުގެ ތާއީދަށް އެދި ރައީސް ސޯލިހު ސިޓީފުޅެއް ފޮނުއްވާފައި ވާއިރު އިދިކޮޅު ޕީޕީއެމުން ވެސް އަންނަނީ ޖުމްހޫރީ ޕާޓީ ހިމެނޭހެން އެކި ޕާޓީތަކާ އެކު ކޯލިޝަން ހެދުމުގެ މަޝްވަރާތައް ކުރަމުންނެވެ.
