ރައްޔިތުންގެ މަޖިލީހުގެ މިނިވަން މުވައްސަސާތަކާ ބެހޭ ކޮމިޓީތަކުގައި އޮންލައިންކޮށް ބައިވެރިވެވޭނެ ގޮތަށް އުސޫލު އިސްލާހު ކޮށްދިނުމަށް ކޮމިޓީން އެދިފައިވީނަމަވެސް އެކަން އެގޮތަށް ނުވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާ ފައްޓަވަމުން ނަޝީދު ވިދާޅުވީ މީގެކުރިން ވެސް އެކަން ފާހަގަވެ، އެކަމާ މެދު ގޮތެއް އާންމު ކޮމިޓީން ނިންމާފައިވާ ކަމަށެވެ. އެ ނިންމުމަކީ މަޖިލީހުގެ އުސޫލުގެ ގޮތުގައި ނިންމާފައިވާ ކަމަށް ނަޝީދު ވިދާޅުވި އެވެ.
"އެލަވަންސް ދިނުމުގެ އުސޫލާ ފުށު އެބަ އަރާ، ކޮމިޓިއަކަށް ހާޒިރުވެ ނުގަންނަވައި ހުންނަވައި އެހެންނަމަވެސް އޮންލައިންކޮށް ކޮންމެވެސް ކޮމްޕިއުޓަރެއް ޖައްސަވާލައްވައިގެން ނުވަތަ ފޯނުން ޖައްސަވާލެއްވީމާ،" ނަޝީދު ވިދާޅުވި އެވެ.
ކޮވިޑް-19ގެ ބަލިމަޑުކަމުގެ ދުވަސްވަރު މަޖިލީހުން ވެސް އޮންލައިންކޮށް ޖަލްސާތައް ކުރިއަށް ގެންދިޔަ ނަމަވެސް، އެ ހާލަތު ބަދަލުވެ މިހާރު ޖަލްސާތައް ކުރިއަށް ގެންދަން ނިންމައިފައިވަނީ ހާޒިރުވެގެން ކަމަށެވެ.
އެހެންކަމުން، މިނިވަން މުވައްސަސާތަކުގެ ކޮމިޓީ އޮންލައިންކޮށް ހިންގުމަށް ނިންމާފައިވާ ނިންމުމަށް އަމަލު ނުކުރެވޭނެ ކަމަށް ނަޝީދު ވިދާޅުވި އެވެ.
