އައްޑޫގައި މަގު ހެދުމުގެ މަސައްކަތް ކުރިއަށްގެން ދާއިރު ރައްޔިތުންނަށް އުނދަގޫނުވާނެ ފަދަ ގޮތަކަށް މަސައްކަތްތައް ކުރުމަށް، މަގު ހެދުމުގެ ޕްރޮޖެކްޓު ކުރިއަށްގެންދާ އިންޑިއާގެ އެފްކޮންސް ކުންފުންޏަށް ސިޓީ ކައުންސިލުން އަންގައިފި އެވެ.
އައްޑޫގެެ ގިނަ މަގުތަކެއް މިހާރު ކޮނެ، މަސައްކަތް ކުރިއަށްދާއިރު، އެފްކޮންސް އިން ތައްޔާރު ކުރާ ފެން ހިންދާ ނިޒާމަކީ، މަގުގެ އަރިމަތިން ދިގަށް ކާނު ގަނޑެއް ކޮނެ އެކަތި އަނެކެއްޗާއި ގުޅާލެވޭ ގޮތަށް ގާއިމް ކުރާ ނިޒާމެކެވެ.
ގިނަ ރައްޔިތުންގެެ ޝަކުވާއަކީ ކާނުތަކުގައި މަތި ޖަހާފައި ނެތުމުން ގޭގެއަށް ވަނުމަށް އުނދަގޫތަކެއް ކުރިމަތިވުމެވެ. ގޭގެއަށް ނުވަދެވޭ ގޮތަށް މަސައްކަތް ކުރިއަށްގެންދާތީ ބައެއް ގޭބީސީތަކުން ވަނީ ކާނުތަކަށް ވެލި އެޅުމަށްފަހު ގެއަށް ވަނުމަށް ޖާގަ ހަދައިފަ އެވެ.
ރައްޔިތުންނަށް އުނދަގޫ ނުވާހެން މަސައްކަތް ކުރިއަށް ގެންދިއުމަށާއި މަގު ހެދުމުގެ މަޝްރޫޢުގެ ތެރެއިން ޑްރެއިނޭޖް މަސައްކަތައް ކޮށްފައިވާ މަގުތަކުގައި ހުރި ކާނުތަކުގައި މަތި އެޅުމަށް މަސައްކަތް ކުރިއަށްގެންދާ ކޮންޓްރެކްޓަރަށް އެފްކޮންސް ކުންފުންޏަށް ސިޓީ ކައުންސިލުން އެންގީ އިއްޔެ ބޭއްވި ބައްދަލުވުމަކަށްފަހު އެވެ.
އައްޑޫ މަގު ހެދުމުގެ މަސައްކަތަކީ އައްޑޫގައި ސަރުކާރުން ހިންގާ އެންމެ ބިޔަ ބޮޑު މަޝްރޫއެވެ. އަދި މިއީ ލިންކް ރޯޑަށް ފަހު އައްޑޫގައި ކުރިއަށްދާ އެންމެ ބޮޑު މަގު ހެދުމުގެ މަޝްރޫއުއެވެ.
