މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ 33 ވަނަ އަހަރީ އާންމު ޖަލްސާ ބާއްވައި، މިހާރުގެ ބޯޑަށް އިތުރު ދައުރެއް ދިނުމަށް ނިންމައިފި އެވެ.
ރޭ ކުރުނބާ މޯލްޑިވްސްގައި ބޭއްވި އެ ޖަލްސާގައި މަޓީގެ 96 މެންބަރުން ބައިވެރިވި އެވެ. އެ އެސޯސިއޭޝަނުގެ ބޯޑަށް އިތުރު ދައުރެއް ދިނުމަށް ނިންމީ ހާޒިރުވި މެންބަރުންގެ އަގުލަބިއްޔަތުންނެވެ.
މަޓީގެ ބޯޑުގައި ތިއްބަވަނީ ޖުމްލަ 17 މެންބަރުންނެވެ. އެއީ:
- މުހައްމަދު އުމަރު މަނިކު (އެމްޔޫ މަނިކު) - ޗެއާމަން
- ހުސެއިން އަފީފް - ވައިސް ޗެއާމަން
- ސޮލާހު ޝިހާބު - ވައިސް ޗެއާމަން
- އަހުމަދު ނަޒީރު - ސެކެޓްރީ ޖެނެރަލް
- އަހުމަދު ހަފީޒް - ފައިނޭންޝަލް ކޮންޓުރޯލާ
- އައްސަދު އަލީ - ޑެޕިއުޓީ ސެކެޓްރީ ޖެނެރަލް
- އަހުމަދު ޝިޔާމް މުހައްމަދު - އެގްޒެކެޓިވް މެންބަރު
- އިބްރާހިމް ސިޔާދު ގާސިމް - އެގްޒެކެޓިވް މެންބަރު
- އިބްރާހިމް ނޫރައްދީން - އެގްޒެކެޓިވް މެންބަރު
- އިޔާޒް ވަހީދު - އެގްޒެކެޓިވް މެންބަރު
- ވިޝާ މާހިރު - އެގްޒެކެޓިވް މެންބަރު
- އިސްމާއިލް ސިޔާން ގާސިމް - އެގްޒެކެޓިވް މެންބަރު
- އައިޝަތު ނީނާ އަހުމަދު - އެގްޒެކެޓިވް މެންބަރު
- ޒުލައިހާ މަނިކު - އެގްޒެކެޓިވް މެންބަރު
- މަހްޖޫބް ޝުޖާއު - އެގްޒެކެޓިވް މެންބަރު
- ސަލިލް މަނިގްރާހި - އެގްޒެކެޓިވް މެންބަރު
- ރިވެރޯ ޑެލްގާޑޯ - އެގްޒެކެޓިވް މެންބަރު
މިއަހަރުގެ އަހަރީ އާންމު ޖަލްސާގައި ޓެކުސް ބޮޑުވުމުގެ ސަބަބުން ރިސޯޓުތައް ހިންގުމުގެ ހަރަދު ބޮޑުވުމާއި އެ ހަރަދާ އެއްވަރަށް ރިސޯޓުތަކުން ލިބޭ އާމްދަނީ އިތުރު ނުވާކަން ފާހަގަ ކުރައްވައި ބައެއް މެންބަރުން ވާހަކަ ދެއްކެވި އެވެ.
އެގޮތުން, ދުނިޔޭގެ މަޝްރަހުގައި ހިނގާ ހަނގުރާމަތަކާއި އެނޫންވެސް ކަންކަމުގެ ސަބަބުން ފަތުރުވެރިކަމުގެ ސިނާއަތަށް އޭގެ ނޭދެވޭ އަސަރު މިހާރުވެސް ކުރަމުންދާކަން އެ ބޭފުޅުން ފާހަގަ ކުރެއްވި އެވެ.
މަޓީގެ އަހަރީ ޖަލްސާގެ ތެރެއިން -- ފޮޓޯ: ސޯޝަލް މީޑިއާ
އޭގެއިތުރުން, ތެލުގެ އަގު ބޮޑުވުމުގެ މައްސަލައާ ގުޅިގެން ވެސް ވަރަށް ގިނަ ބޭފުޅުން ކަންބޮޑުވުން ފާޅުކުރެއްވި އެވެ. އެންމެ ބޮޑު ކަންބޮޑުވުމެއްގެ ގޮތުގައި އެބޭފުޅުން ފާހަގަ ކުރެއްވީ ތެލަށް ކުރާނެ ހަރަދު ކޮންމެ އަހަރަކުވެސް ރިސޯޓުތަކުން ބަޖެޓުކޮށްފައި އޮންނަ ކަމަށާއި އަހަރު ނިމޭއިރު ތެލަށް ކުރާ ހަރަދު ލަފާ ކުރި ބަޖެޓަށް ވުރެ ދެގުނަ އިތުރުވާ ކަމެވެ.
ނަވާރަސަތޭކަ އަށްޑިހަ ދެވަނަ އަހަރު ވުޖޫދުކުރި މަޓީއަކީ ރާއްޖޭގައި ފަތުރުވެރިކަށް ކުރިއެރުވުމުގެ މަސައްކަތް އެންމެ ފުޅާ ދާއިރާއެއްގައި ކުރާ ޖަމިއްޔާ އެވެ. އެގޮތުން, ޖަމިއްޔާއިން ވަނީ ރާއްޖޭގެ ފަތުރުވެރިކަމަށް ދިމާވި ހުރިހާ ގޮންޖެހުންތަކެއް ހައްލު ކުރުމުގައި މުހިންމު ދައުރެއް އަދާކޮށްފަ އެވެ.
މިދިޔަ އަހަރު އެ އެސޯސިއޭޝަނަށް 40 އަހަރު ފުރުނުއިރު، ޓޫރިޒަމް އިންޑަސްޓްރީއަށް ހިދުމަތް ކޮށްދެއްވާފައި ތިބި މީހުންނަށް އެވޯޑު އެރުވުމުގެ އިތުރުން ދެފޮތް ވެސް އެ އެސޯއިއޭޝަނުން ޕަބްލިޝް ކޮށްފައިވެ އެވެ.
