ޕެސިފިކް ކަނޑުގައި އޮންނަ ފްރާންސްގެ ނިއު ކެލަޑޯނިއާގެ މަގްބޫލް ބީޗެއްގައި ގިނަ ބަޔަކު ތިބި ވަގުތެއްގައި މިޔަރެއްގެ ހަމަލާގައި އޮސްޓްރޭލިއާގެ ފަތުރުވެރިއަކު މަރުވެއްޖެ އެވެ.
އިދާރާތަކުން ބުނީ އުމުރުން 59 އަހަރުގެ ފިރިހެން މީހާއަށް މިޔަރު ހަމަލާ ދިނީ ނޫމިއާ ބީޗުގެ އައްސޭރިފަށާ 150 މީޓަރު ދުރުގައި ފަތަމުން ދަނިކޮށް އާދީއްތަ ދުވަހު ކަމަށެވެ.
އޭނާގެ ގައިގައި މިޔަރު ތަކުރާރުކޮށް ދަތް އެޅި އިރު އަތާއި ފަޔަށް ބޮޑެތި ޒަހަމްތަކެއް ލިބި ވަގުތުން މަރުވީ އެވެ. މިއީ ފާއިތުވި ތިން ހަފުތާ ތެރޭގައި އެ ސަރަހައްދުން ރިޕޯޓު ކުރި ތިން ވަނަ މިޔަރު ހަމަލާ އެވެ.
ފިރިހެން މީހާގެ ހަށިގަނޑު އެއްގަމަށް ގެންދިޔައީ އެ ސަރަހައްދުން ކުޑަ ބޯޓެއްގައި ދަތުރު ކުރަަމުން ދިޔަ ދެ މީހުންނެވެ. އެހެން ނަމަވެސް އޭރު އޭނާ އޮތީ މަރުވެފަ އެވެ.
އެ ހާދިސާ ހިނގި ވަގުތު ގިނަ އަދަދެއްގެ ބަަޔަކު މޫދުގައި އުޅެމުން ދިޔަ އިރު، ހަމަލާ ދިން މަންޒަރު ވެސް ގިނަ ބަޔަކަށް ފެނުނެވެ.
އިދާރާތަކުން މިހާރު ވެސް އެ ހިސާބުގެ ގޮނޑުދޮށްތައް އާއްމުންނަށް ބަންދުކޮށް، ކައިރި ހިސާބުތަކުން ފެންނަ ހުރިހާ މިޔަރެއް ހިފުމަށް އަންގައިފަ އެވެ.
ޖެނުއަރީ 29 ވަނަ ދުވަހު އެ ސަރަހައްދުން މިޔަރެއް ހަމަލާ ދިނުމުން އުމުރުން 49 އަހަރުގެ މީހަކަށް ސީރިއަސް އަނިޔާތަކެއް ލިބުނެވެ. އޭގެ ދުވަސްކޮޅެއް ފަހުން ސާފްކުރަން އުޅުނު މީހަކަށް ވެސް ހަމަލާދިނެވެ.
ވަނުއަޓޫގެ ދެކުނުން އޮންނަ ނިއު ކެލަޑޯނިއާގައި ދިރިއުޅެނީ 270،000 މީހުންނެވެ. އެހެން ނަމަވެސް ދުނިޔޭގައި 13 ވަނައަށް އެންމެ ގިނައިން މިޔަރު ހަމަލާދެނީ އެ ތަނުގަ އެވެ.
