ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހާއެކު ކޯލިޝަން ހެދުމުގެ އުއްމީދު ބޮޑު ކަމަށް ރައީސް ސޯލިހުގެ މަޝްވަރާ ވަފުދުން ބުނިކަމަށް އިއްޔެ ރިޕޯޓުކުރި އެވެ.

ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރުކަން ވެސް ކުރައްވާ، މަޝްހޫރު ވިޔަފާރިވެރިޔާ ގާސިމްއާ މަޝްވަރާ ކުރެއްވުމަށް، އެ މަނިކުފާނުގެ ރިސޯޓު، އދ. އަތޮޅު ސަން އައިލެންޑަށް އެމްޑީޕީގެ ޕާލިމެންޓަރީ ގްރޫޕުގެ ލީޑަރު މުހައްމަދު އަސްލަމާއި ރައީސް ސޯލިހުގެ ކޮއްކޯފުޅު، އަދި ހުޅުމާލޭ ދާއިރާގެ މެމްބަރު އަލީ ނިޔާޒް އިއްޔެ ވަޑައިގެންނެވި އެވެ.

ގާސިމާއެކު ބޭއްވި ބައްދަލުވުންތަކާ ގުޅޭ ގޮތުން އަސްލަމް "އަދަދު"އަށް އިއްޔެ ވިދާޅުވީ ގާސިމްއާއެކު ބޭއްވުނީ ވަރަށް އުއްމީދީ މަޝްވަރާތަކެއް ކަމަށާއި "ހީކުރި މިންވަރަށް ވުރެ ވެސް ކަންކަން ޕޮޒިޓިވް" ކަމަށެވެ.

"އުއްމީދަކީ ގާސިމްއާއެކު ކޯލިޝަން ހެދޭނެ ކަމަށް. އޭރުން ބޮޑުތަކުން އެއްބުރުން އިންތިހާބު ކާމިޔާބު ކުރެވޭނެ،" އަސްލަމް ވިދާޅުވި އެވެ.

އެހެން ޕާޓީތަކާއެކު މަޝްވަރާ ކުރުން ކުރިއަށްދޭތޯ ސުވާލު ކުރުމުން އަސްލަމް ވިދާޅުވީ، އަލީ ނިޔާޒާއެކު އޭނާ އިސްވެ ކުރިއަށް ގެންދަވަނީ ގާސިމްއާއެކު ކުރެވޭ މަޝްވަރާތައް ކަމަށާއި "އެހެން މަޝްވަރާތައް ވެސް" ކުރިއަށް ދާނެ ކަމަށެވެ.

މިދިޔަ މަހު ބޭއްވި އެމްޑީޕީގެ ޕްރައިމަރީގައި އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދުގެ މައްޗަށް ކުރި ހޯއްދަވައި، ރިޔާސީ ޓިކެޓު ކާމިޔާބު ކުރެއްވުމުގެ ކުރިން ވެސް، ރައީސް ސޯލިހު ވަނީ ރިޔާސީ އިންތިހާބަށް ކޯލިޝަން ހައްދަވާނެ ކަމަށް ވިދާޅުވެފަ އެވެ.

ކޯލިޝަނަކާ ނުލައި އެމްޑީޕީއަށް އެކަނި އިންތިހާބު ކާމިޔާބު ނުކުރެވޭނެ ކަމަށާއި، ކޯލިޝަނެއްގެ ތެރެއިން ވެރިކަން ކުރެއްވޭނެ އެމްޑީޕީގެ ހަމައެކަނި ކެންޑިޑޭޓަކީ އެމަނިކުފާނު ކަމަށް ރައީސް ސޯލިހު ވިދާޅުވެފައިވެ އެވެ.

ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެހެން ޕާޓީތަކާއެކު ކޯލިޝަން ހެދުމުގެ ބާރު އެމްޑީޕީގެ ގައުމީ މަޖިލީހުން ރައީސް ސޯލިހަށް ވަނީ ދީފަ އެވެ.

ރާއްޖޭގެ ސިޔާސީ ތާރީހުގައި އެންމެ ގިނަ ދުވަހު ވެރިކަން ކުރާ ކޯލިޝަނެއް ދެމެހެއްޓުނު ރެކޯޑު ރައީސް ސޯލިހު ވަނީ ގާއިމުކުރައްވައިފަ އެވެ.

ޖޭޕީގެ އިތުރުން ސަރުކާރުގެ ކޯލިޝަނުގައި ހިމެނެނީ އަދާލަތު ޕާޓީ އާއި ކުރީގެ ރައީސް މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓް (އެމްއާރުއެމް) އެވެ.

ނަމަވެސް، އެ ތިން ޕާޓީން ވެސް ރިޔާސީ އިންތިހާބުގައި ކޯލިޝަން ހެދުމާމެދު އަދި ރަސްމީކޮށް އެއްވެސް ނިންމުމެއް ހާމަކޮށްފައެއް ނުވެ އެވެ.

ގާސިމްގެ ތާއިދު ހޯއްދެވުމަށް ރައީސް މަސައްކަތް ކުރައްވާއިރު، މި ހަފުތާގައި ޖުމްހޫރީ ޕާޓީގެ ކޮންގްރެސް އޮންނާނެ އެވެ. އެ ކޮންގްރެސްގައި ޖުމްހޫރީ ޕާޓީން ރިޔާސީ އިންތިހާބުގައި ވާދަކުރައްވާނެ ކެންޑިޑޭޓަކު ކަނޑަނާޅެ އެވެ.

މުހިންމު ބައެއް ހަބަރު

• ސަރުކާރު ހިންގާ ކޯލިޝަންގެ ޕާޓްނަރުންނަށް ރައީސް އިބްރާހިމް މުހައްމަދު ސޯލިހު ސިޓީފުޅެއް ފޮނުއްވި އެވެ.

• ޖުމްހޫރީ ޕާޓީގެ ލީޑަރުގެ މަގާމަށް ކުރިމަތިލެއްވި ހަމައެކަނި ބޭފުޅަކީ ގާސިމް އިބްރާހިމް ކަމުގައި ވީނަމަވެސް، އެ މަގާމަށް އެ މަނިކުފާނު އިންތިހާބު ވާނީ ޕާޓީގެ އަސާސީ ގަވާއިދަށް ހުށަހަޅައިފައިވާ އިސްލާހުތައް ފާސްވުމުން ކަމަށް އެ ޕާޓީގެ ސެކެޓްރީ ޖެނެރަލް، އަލީ އާރިފް ވިދާޅުވި އެވެ.

• ގެދޮރު ކުއްޔަށް ދިނުމުގެ ނަމުގައި އޮޅުވާލައިގެން ފައިސާ ހޯދާ ފަރާތްތަކާ މެދު ސަމާލުވުމަށް ޕީޖީ އޮފީހުން އިލްތިމާސް ކުރި އެވެ.

• މި މަހުގެ ހަތަރު ވަނަ ދުވަހުން ފެށިގެން ގެއްލިގެން ހޯދަމުން ދަނިކޮށް ބުރާސްފަތި ދުވަހު ފެނުނު ސ. މަރަދޫފޭދޫ، ގަސްކަރަ، މުހައްމަދު އާސިރު އިސްމާއީލް ފެނުމާ ހަމައަށް ކަންކަން ހިނގި ގޮތް ބެލުމަށް ތަހުގީގެއް ކުރިއަށް ގެންދާކަމަށް ފުލުހުން ހާމަކުރި އެވެ.

• އައްޑޫ ސިޓީގައި ހަރަކާތްތެރިވާ ގޭންގަކުން މިދިޔަ އަަހަރުގެ ޖޫން މަހުގެ ދެވަަނަ ދުވަހުގެ ރޭ ދަންވަރު މުހައްމަދު ޒަޔާން، 21، މަރާލި މައްސަލައިގެ ޝަރީއަތް އިއްޔެ ކްރިމިނަލް ކޯޓުގައި ފަށައި ދައުވާތަކަށް ޖަވާބުދާރީވާން މި އަންނަ މާޗު މަހުގެ ފަހު ހަފުތާއާ ހަމައަށް ވަނީ ފުރުސަތު ދީފި އެވެ.

ދުވަހުގެ ކޯޓޭޝަން

ގާސިމާއެކު ބޭއްވި ބައްދަލުވުންތަކާ ގުޅޭ ގޮތުން އެމްޑީޕީގެ ޕާލިމެންޓަރީ ގްރޫޕުގެ ލީޑަރު މުހައްމަދު އަސްލަމް "އަދަދު" ނޫހަށް އިއްޔެ ވިދާޅުވީ ގާސިމްއާއެކު ބޭއްވުނީ ވަރަށް އުއްމީދީ މަޝްވަރާތަކެއް ކަމަށާއި "ހީކުރި މިންވަރަށް ވުރެ ވެސް ކަންކަން ޕޮޒިޓިވް" ކަމަށެވެ. އިތުރަށް ވިދާޅުވީ؛

އުއްމީދަކީ ގާސިމްއާއެކު ކޯލިޝަން ހެދޭނެ ކަމަށް. އޭރުން ބޮޑުތަކުން އެއްބުރުން އިންތިހާބު ކާމިޔާބު ކުރެވޭނެ،"

ދުވަހުގެ ފޮޓޯ

މިހާރު ކުރިއަށްދާ ގޯލްޑެން ފުޓްސަލް މުބާރާތުގައި ރޭކުޅުނުގެ މެޗެއްގެ ތެރެއިން. -- ފޮޓޯ: މުހައްމަދު ޝާބިން/އަދަދު