މާލެ މަގުމަތީގައި ޕާކުކޮށްފައި ހުރި ސައިކަލެއްގެ މަޑި ހުޅުވައި މަޑި ދަށުގައި އޮތް އެއް ލައްކައެއްހާ ރުފިޔާ ވަގަށް ނެގި ކަމަށް އެއްބަސްވެ، އެއް އަހަރާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި އެވެ.
ކްރިމިނަލް ކޯޓަށް ހުށަހެޅި މައްސަލައިގެ ލިޔެކިޔުންތަކުގައިވާ ގޮތުން އެ ކަމެއް ހިނގީ މިދިޔަ އަހަރުގެ ޖޫން މަހުގެ 29 ވަނަ ދުވަހުގެ މެންދުރު ވަގުތެއްގަ އެވެ. މާލެ އޯކިޑު މަގު އޮޕްޓިކަލް ފިހާރަ ކައިރީ ޕާކްކޮށްފައި ހުރި ސައިކަލުގެ މަޑިދަށުން 160،000 ރ. ވަގަށް ނަގާފައިވާ ކަމަށް ދައުލަތުން ކުރި ދައުވާގައިވެ އެވެ.
މި މައްސަލާގައި ދައުވާ ރައްދުވާ ފަރާތުން ވަނީ ކުށަށް އިއުތިރާފުވެފަ އެވެ. އެހެންވެ މައްސަލަ ނިންމީ އަވަސް ނިޔާގެ ދަށުންނެވެ.
ގާނޫނުލްއުގޫބާތުގައި ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހުގެ މުއްދަތަށް ޖަލަށް ލުމެވެ. ނަމަވެސް ކުށަށް އިއުތިރާފުވެފައިވާތީ އެއް އަހަރާއި 12 ދުވަހުގެ މުއްދަތަށް ޖަލަށް ލުމަށް މައްސަލަ ބެއްލެވި ގާޒީ އިސްމާއީލް ޝަފީއު ނިންމެވި އެވެ.
ދައުވާ ރައްދުވާ ފަރާތުން މައްސަލައިގެ ތުހުމަތުގައި ބަންދުގައި އެއް މަސް ދުވަސް ހޭދަކޮށްފައިވާތީ ދެން ޖަލު ހުކުމުން ތަންފީޒުކުރަން ޖެހޭނީ 11 މަހާއި 12 ދުވަހެވެ.
