އެމްޑީޕީއަށް މި ދަނޑިވަޅުގައި ބޭނުންވަނީ އާ ފިކުރެއް ނޫން ކަމަށް ވިދާޅުވެ އެމްޑީޕީގެ ޕްރައިމަރީގައި ވާދަކުރައްވާ ނާކާމިޔާބުވެވަޑައިގަތް ރައީސް މުހައްމަދު ނަޝީދު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ގުޅިވަޑައިގަތުމަށް އެމްޑީޕީގެ ޕީޖީ ލީޑަރު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ދައުވަތު ދެއްވައިފި އެވެ.
ޕްރައިމަރީގައި ކާމިޔާބުވެވަޑައިގަތް ރައީސް ސޯލިހުއަށް ރިޔާސީ ޓިކެޓު ހަވާލުކުރުމަށް ރޭ ކާނިވާ ސަރަހައްދުގައި ބޭއްވި ރަސްމިއްޔާތުގައި ވާހަކަ ދައްކަވަމުން އަސްލަމް ވިދާޅުވީ މި ދަނޑިވަޅުގައި އެމްޑީޕީއަށް ބޭނުންވަނީ އާ ފިކުރެއް ނޫން ކަމަށެވެ. އަދި ރައީސް ސޯލިހާއެކު ނަޝީދު ނެތްކަމުގެ "ހިތްދަތިކަން" އިހްސާސްކުރެވޭ ކަމަށް ވިދާޅުވެ ރައީސް ސޯލިހާއި ގުޅިވަޑައިގަތުމުގެ ދައުވަތު އަސްްލަމް ނަޝީދަށް ދެއްވި އެވެ.
"ޒަމާންތަކެއް ވަންދެއް އެމަނިކުފާނާ އެކު މަސައްކަތް ކުރި މީހެއްގެ ހައިސިއްޔަތުން އަޅުގަނޑު ދަންނަވާލަން ބޭނުންވަނީ، ވަޑައިގަންނަވާށޭ މިއަދުވެސް މިތަނުންވެސް މަނިކުފާނު ނެތްކަން، އެ ހިތްދަތިކަން އަޅުގަނޑުމެންގެ އެބަވެއޭ. މަނިކުފާނު ވަޑައިގަންނަވާށޭ، މި ސަފުތަކާ ގުޅިވަޑައިގަންނަވާާށޭ، އަޅުގަނޑުމެން މި ޕާޓީ ކުރިއަށް ގެންދަމާ ހިންގަވާށޭ،" އަސްލަމް ވިދާޅުވި އެވެ.
އަސްލަމް ވިދާޅުވީ އެމްޑީޕީއިން މިއަހަރުގެ ރިޔާސީ އިންތިހާބު ކާމިޔާބުކުރުމާއި، 2028ގައި އޮންނާނެ ރިޔާސީ އިންތިހާބު ވެސް ކާމިޔާބުކޮށް، ވެރިކަމުގައި އެމްޑީޕީގެ މެންބަރަކު ހުރުމަކީ ނުހަނު މުހިންމު ކަމެއް ކަމަށެވެ. އަދި ރައީސް ސޯލިހް އިހްތިޔާރުކުރެއްވީ މި ވެރިކަން ދެމިގެންދިއުމަށް އެދޭތީ ކަމަށްވެސް ވިދާޅުވި އެވެ.
"އަޅުގަނޑުމެން އެމްޑީޕީއިން ބޭނުންވި، އެމްޑީޕީގަ މިވެރިކަން ދެމި ބާއްވަން. އިރާދަކުރެއްވިއްޔާ 2028ގައި ވެސް އެމްޑީޕީގެ މެންބަރެއް ވެރިކަމުގައި ހުރުން އެމްޑީޕީއަށް، މި ގައުމަށް ވަރަށްވެސް މުހިންމު، ވަރަށް ވެސް ބޭނުންތެރި. މި ޕާޓީއަށްވެސް، މި ރާއްޖެއަށް ވެސް އަޅުގަނޑުމެންނަށް ކޮށްދެވޭނެ އެންމެ ބޮޑު ހިދުމަތަކީ އެމްޑީޕީގަ މިވެރިކަން ބޭއްވުން. އިބްރާހިމް މުހައްމަދު ސޯލިހު ހޮއްވަވާ ދެއްވުން،" އަސްލަމް ވިދާޅުވި އެވެ.
ރައީސް ނަޝީދު ގެންގުޅުއްވާ "ފިކުރެއްގެ ދިރުން" އަސްލަމް ސިފަކުރެއްވީ "ފެންނަން ނެތް، ހާމަވެފާ ނެތް، ވަންހަނާވެފައިވާ ފިކުރެއް"ގެ ގޮތުގަ އެވެ. އެފަދަ ފިކުރެއް ބޭނުން ނުވާކަމަށާއި، ޕާޓީގެ އަސާސީ ގަވައިދުގެ ތިންވަނަ ބާބުން އެމްޑީޕީގެ އަސްލު ފިކުރު ފެންނާނެ ކަމަށް އަސްލަމް ވިދާޅުވި އެވެ.
ރިޔާސީ އިންތިހާބުގެ އެމްޑީޕީ ޓިކެޓުގައި ވާދަކުރާ ކެނޑިޑޭޓު ހޮވުމަށް މިދިޔަ މަހުގެ 28 ވަނަ ދުވަހު ބޭއްވި އިންތިހާބުން ނާކާމިޔާބުވެވަޑައިގަތުމަށް ފަހު ނަޝީދު ވަނީ ފިކުރެއްގެ ދިރުމުގެ ނަމުގައި އެމްޑީޕީގެ ގޮފިތަކެއް ހައްދަވައި، އެ ގޮފިތަކުގައި ޖުމްލަ 50،000 މެންބަރުން ހަމަކުރެއްވުމަށް މަސައްކަތް ކުރައްވާކަން އިއުލާނު ކުރައްވައިފަ އެވެ.
އެ މަސައްކަތް ކުރަމުން ދަަނީ އެމްޑީޕީން ތާއިދުކުރާ ކެންޑިޑޭޓަކު ކަނޑައެޅުމަށް ކަމަށް ނަޝީދު ވިދާޅުވެފައި ވެއެވެ.
ޕްރައިމަރީ ބޮޑު ތަފާތަކުން ކާމިޔާބުކުރެއްވީ ރައީސް ސޯލިހު އެވެ. އެމަނިކުފާނަށް 61 އިންސައްތަ ވޯޓު ލިބުނު އިރު ރައީސް ނަޝީދަށް ލިބިވަޑައިގަތީ 31 އިންސައްތަ އެވެ.
