ބަލްގޭރިއާގައި ޓްރަކެއްގެ ތެރޭގައި 18 މީހުން މަަރުވެފައި ތިއްބާ ފެނުމާ އެކު ޝައްކު ކުރެވޭ ހަތަރު މީހަކު ފުލުހުން ހައްޔަރުކޮށްފި އެވެ.
މަރުވެފައި ތިއްބާ ފެނުނު 18 މީހުންގެ ތެރޭގައި ކުޑަކުއްޖަކު ހިމެނެ އެވެ. ބެލެވޭ ގޮތުގައި އެއީ ހިޖުރަ ކުރި ބަޔަކު ގަވާއިދާ ހިލާފަށް އުފުލަމުން ދިޔަ އުޅަނދެކެވެ.
ބަލްގޭރިއާގެ ހެލްތު މިނިސްޓަރު ވިދާޅުވީ ޓްރަކްގެ ތެރެއިން ސަލާމަތް ކުރި 34 މީހަކަށް ހޮސްޕިޓަލުގައި ފަރުވާދެމުންދާ ކަމަށެވެ. އޭގެ ތެރޭގައި ފަސް ކުދިން ހިމެނޭ އިރު ބައެއް މީހުންގެ ހާލު ސީރިއަސް އެވެ.
ހެލްތު މިނިސްޓަރު ވިދާޅުވީ ޓްރަކްގެ ތެރޭގައި އެ މީހުން ތިބީ ތެމިގެން ފިނިގަދަވެފައި ކަމަށާއި އެތައް ދުވަހެއް ވަންދެން އެއްޗެއް ނުކައި ކަމަށެވެ.
ބެލެވޭ ގޮތުގައި މިއީ ބަލްގޭރިއާގެ ތާރީހުގައި ހިޖުރަ ކުރި މީހުން ހިމެނޭ ގޮތަށް ހިނގި އެންމެ ހިތާމަވެރި ހާދިސާ އެވެ.
ހިޖުރަ ކުރާ މީހުން ބަލްގޭރިއާއަށް އެތެރެވަނީ ތުރުކީއިންނެވެ. އެއީ ޔޫރަޕިއަން ޔޫނިއަން (އީޔޫ) ގެ ގައުމުތަކަށް ހިޖުރަ ކުރަން ބޭނުންވާ އެކި ގައުމުތަކަށް ނިސްބަތްވާ މީހުންނެވެ.
ފުލުހުން ބުނީ ޓްރަކްގައި ތިބީ އަފްގާނިސްތާނަށް ނިސްބަތްވާ މީހުން ކަމަށް ބެލެވޭ ކަމަށާއި އެ މީހުންގެ މަންޒިލަކީ ސާބިއާ ކަމަށެވެ.
ފުލުހުންގެ އިސް އޮފިޝަލް އަތަނަސް އިލްކޯވް ރޮއިޓާޒްއަށް ވިދާޅުވީ ހައްޔަރު ކުރި ހަތަރު މީހުންގެ ތެރެއިން އެކަކީ މީގެ ކުރިން ވެސް ހިޔުމަން ޓްރެފިކިންގެ ކުށް ސާބިތުވެ ހުކުމެއް ކޮށްފައި ހުރި މީހެއް ކަމަށެވެ.
