މެންޗެސްޓާ (ފެބްރުއަރީ 18) - އިނގިރޭސި ފުޓްބޯޅައިގެ ގަދަބާރު، މެންޗެސްޓާ ޔުނައިޓެޑް ގަންނަން ގަތަރުގެ ބޭންކް، ކިއުއައިބީގެ ޗެއާމަން، ޝެއިހް ޖަސީމް ބިން ހަމަދު އަލް ތާނީ، އެންމެ ފަހު ވަގުތު ރަސްމީކޮށް ބިޑް ހުށަހަޅައިފި އެވެ.
ޔުނައިޓެޑް ގަންނަން ރޭގެ ނިޔަލަށް ބިޑް ކުރުމުގެ ފުރުސަތު ހުޅުވާލާފައި އޮތްއިރު، އިނގިރޭސި ބިލިއަނަރު ޖިމް ރެޓްކްލިފް ވެސް ވަނީ މީގެ ކުރިން ޔުނައިޓެޑް ގަންނަން ބިޑް ކުރާނެ ކަމަށް ބުނެފަ އެވެ. އެކަމަކު، ރެޓްކްލިފްގެ ފަރާތުން ބިޑް ކުރިކަން ހާމަކުރަން މީޑިއާ އަށް އަދި ބަޔާނެއް ދީފައެއް ނުވެ އެވެ.
ގަތަރުގެ ނުފޫޒު ގަދަ ފަރާތްތަކުގެ ތެރޭގައި ހިމެނޭ، ޝެއިހް ޖަސީމް ބިޑް ކޮށްފައިވަނީ އޭނާގެ ނައިންޓޫ ފައުންޑޭޝަން ކުންފުނީގެ ފަރާތުންނެވެ. ޖަސީމްގެ ފަރާތުން ނެރުނު ބަޔާނުގައި ބުނެފައިވަނީ، ވިސްނުމަކީ ޔުނައިޓެޑްގެ ދަރަނިތައް އަދާކުރުމަށް ފަހު، އެ ކްލަބް ކުރިން އޮތް ލެވަލަށް ދެވޭނެ ވަރަށް ކްލަބަށް އިންވެސްޓް ކުރުން ކަމަށެވެ.
ޖަސީމްގެ ފަރާތުން ޔުނައިޓެޑް ގަންނަން ހުށަހެޅި ބިޑްގެ ޖުމްލަ އަދަދު މީޑިއާގައި ހާމަކޮށްފައިނުވެ އެވެ. އެކަމަކު، ރިޕޯޓްތައް ބުނާގޮތުން އެ ބިޑްގެ ޖުމްލަ އަކީ ފަސް ބިލިއަން ޑޮލަރެވެ.
ޔުނައިޓެޑް ގަންނަން ބިޑްކުރި ގަތަރުގެ ބޭންކް، ކިއުއައިބީގެ ޗެއާމަން، ޝެއިހް ޖަސީމް ބިން ހަމަދު އަލް ތާނީ: އޭނާ އަކީ ގަތަރުގެ ވިޔަފާރި ދާއިރާގައި ނުފޫޒުގަދަ ނަމެއްގެ އިތުރުން ޕީއެސްޖީގެ ވެރިޔާ ނާސިރު އަލް ހަލީފާގެ އަރިސް ފަރާތެއް.
ޔުނައިޓެޑްގެ ވެރިންގެ ގޮތުގައި ތިބި ގްލޭޒާ އާއިލާ އިން އެ ކްލަބް ވިއްކާލުމުގައި ގެންގުޅޭ ވިސްނުންތަކެއް ރަސްމީކޮށް ތަފްސީލް ގޮތެއްގައި ހާމަކޮށްފައެއް ނުވެ އެވެ. އިނގިރޭސި ބައެއް މީޑިއާ ރިޕޯޓްތައް ބުނާގޮތުން ކްލަބްގެ މެޖޯރިޓީ ހިއްސާ ވިއްކާލުމުގެ ވިސްނުމުގެ އިތުރުން، 20 ޕަސެންޓް ހިއްސާ ވިއްކާލުމުގެ ހިޔާލެއް ވެސް 2005 އިން ފެށިގެން ޔުނައިޓެޑް ހިންގުމުގައި ހަރަކާތްތެރިވާ ގްލޭޒާ އާއިލާ އިން ގެންގުޅެ އެވެ.
ބައެއް މީޑިއާ ރިޕޯޓްތައް ބުނާގޮތުގައި ޔުނައިޓެޑްގެ ހިއްސާ ގަތުމާއި އެހެނިހެން ކަންކަމަށް ބަލާއިރު، ފަސް ވަރަކަށް ބިޑެއް ރެއާ ހަމައަށް ވަނީ ލިބިފަ އެވެ.
ޔޫރަޕްގެ ކްލަބްތަކަށް ބަލާއިރު، ގަތަރުގެ ވިޔަފާރިން މި ވަގުތު އެންމެ ބޮޑު އިންވެސްޓެއް ކުރަމުން އަންނަ ކްލަބަކީ ފްރާންސްގެ ޗެމްޕިއަން، ޕީއެސްޖީ އެވެ.
ގަތަރު ސްޕޯޓްސް އިންވެސްޓްމަންޓް (ކިއުއެސްއައި)ގެ ވެރިޔާ، ނާސިރު އަލް ހަލީފާ، 2011 ވަނަ އަހަރުން ފެށިގެން އަންނަނީ ޕީއެސްޖީ ހިންގުމަށް ބޮޑު ހޭދައެއް ކުރަމުންނެވެ. މިހާތަނަށް ބޮޑު އިންވެސްޓެއްކޮށް، ޔޫރަޕްގެ ފުޓްބޯޅައިގެ މާލީ ގޮތުން، ނުފޫޒުގަދަ ޓީމެއްގެ ގޮތުގައި ޕީއެސްޖީ ވަނީ ވެފަ އެވެ.
ބައެއް މީޑިއާ ރިޕޯޓްތައް ބުނާގޮތުން، ޝެއިހް ޖަސީމް، ޔުނައިޓެޑް ގަންނަން ކުރި ބިޑްގައި ޕީއެސްޖީގެ ނާސިރު އަލް ހަލީފާގެ ހިއްސާއެއް ވެސް އެބައޮތެވެ. އެއީ މީގެ ކުރިން ނާސިރު އަލް ހަލީފާ ވަނީ އިނގިރޭސި ކްލަބަކަށް އިންވެސްޓްކުރަން ބޭނުންވާ ކަމަށް ބުނެފަ އެވެ. އެކަމަކު، އޭނާ އަށް އެކަން ކުރެވެން ނެތީ އެއް ފަހަރާ ޔޫރަޕްގެ ދެ ޓީމެއްގެ އިންވެސްޓަރުންގެ ގޮތުގައި އެއް ފަރާތަކަށް ޔުއެފާގެ ފައިނޭންޝިއަލް ފެއާޕްލޭ (އެފްއެފްޕީ)ގެ ގަވާއިދު ތަންނުދޭތީ އެވެ.
