ދިވެހި ވެރިކަމުގެ ތެރޭގައި ޒަމާނުއްސުރެން އަށަގަނެފައި އޮތް އަނިޔާވެރިކަން އަނެއްކާ ވެސް ރާއްޖޭގައި ގަދަވިޔަ ނުދިނުމަށް ރައީސް އިބްރާހީމް މުހައްމަދު ސޯލިހު އިސްވެ ހުންނެވި އެމްޑީޕީގެ ވެރިކަން ދެމިއޮންނަން ޖެހޭ ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް މިރޭ ވިދާޅުވެއްޖެ އެވެ.
އެމްޑީޕީގެ ރިޔާސީ ޓިކެޓު ރައީސް ސޯލިހަށް މިރޭ އެރުވީ ވެސް އެ ޕާޓީގެ ޗެއާޕާސަންގެ ހައިސިއްޔަތުން، ރައީސްގެ އެންމެ އަރިސް އަދި މި ސަރުކާރުގެ އެންމެ ނުފޫޒުގަދަ އެއް ވަޒީރު ކަމަށްވާ އިކޮނޮމިކް މިނިސްޓަރު ފައްޔާޒު އިސްމާއީލެވެ.
ރިޔާސީ ޓިކެޓު ހަވާލުކުރުމުގެ ކުރިން ވާހަކަ ދައްކަވަމުން ފައްޔާޒު ހަނދާން އާކުރެއްވީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި އެމްޑީޕީ އުފެއްދުމަށް ކުރި މަސައްކަތާއި އެ ޕާޓީ އިސްވެ އޮވެ ކުރި މުޒާހަރާތަކާއި އިހުތިޖާޖުތަކެވެ.
"އޭރު ހާލަތު އޮތީ އެކަކަށް ނޫނީ ދެ މީހަކަށް ކުރެވޭ ހިސާބަކު ނޫން، އެ ކަމަށް މީހުން އިތުރުކުރުމަށް ފެށި ޕާޓީއަކީ މި އެމްޑީޕީ، އޭރު އެމްޑީޕީއާއެކު ނުކުތް މީހުނަށް އެނގޭ އޭރު ކުރިމަތިވާން އޮތް ދަތުރު، މުދާތައް ނިގުޅައިގަތް، ޖަލުގެ ތޭރިތަކުގައި އެތައް އަނިޔާއެއް ތަހައްމަލްކުރަން ޖެހުނު،" ފައްޔާޒު ވިދާޅުވި އެވެ.
އޭރު އޮތް "ބިރުވެރި" ހާލަތުގައި ވެސް އެމްޑީޕީ އުފައްދައި، ރާއްޖޭގައި ޑިމޮކްރެޓިކް ވެރިކަމެއް ގާއިމްކުރެވިގެން ދިޔަ ކަން ފައްޔާޒު ފާހަގަ ކުރެއްވި އެވެ. އަދި އެމްޑީޕީއަށް 2008 ވަނަ އަހަރު ވެރިކަން ކުރަން ފުރުސަތު ލިބުނު ނަމަވެސް އެ ފުރުސަތު ގެއްލިގެން ދިޔައީ "އަނިޔާވެރިކަން" ގަދަވެ އޮތުމުގެ ސަބަބުން ކަމަށް ފައްޔާޒު މިރޭ ވިދާޅުވި އެވެ.
"2008 ވަނަ އަހަރު އެމްޑީޕީއަށް އެ އުންމީދުތައް ހާސިލްކުރަން ފުރުސަތެއް ލިބުން، އެކަމަކު ޒަމާނުއްސުރެން ވަކި ހިއްޕާލާފައި އޮތް އަނިޔާވެރިކަން އެ ފުރުސަތުގެ މައްޗަށް ގަދަވެގެން ދިޔައީ،" ރިޔާސީ ދައުރުގެ މެދުތެރެއިން އެމްޑީޕީގެ ފުރަތަމަ ސަރުކާރު ނިމިގެން ދިޔަ ގޮތް ފައްޔާޒު ވިދާޅުވެދެއްވި އެވެ.
އެމްޑީޕީގެ ފުރަތަމަ ސަރުކާރު ނިމިގެން ދިޔައީ، އޭރުގެ އިދިކޮޅު ފަރާތްތަކާއެކު ފުލުހުންނާއި ސިފައިންގެ ބަޔަކު ގުޅި، ހިނގައިދިޔަ ހަމަނުޖެހުންތަކަކަށް ފަހު އޭރުގެ ރައީސް މުހައްމަދު ނަޝީދު މަގާމުން އިސްތިއުފާ ދެއްވުމުންނެވެ.
ފެބްރުއަރީ 7، 2012 ގައި ހިނގައިދިޔައީ "ބަޣާވާތެއް" ކަމަށް ނަޝީދު އަދި އެމްޑީޕީން ތުހުމަތު ކުރެ އެވެ. ނަމަވެސް އެ ފަހުން ވެރިކަމާ ހަވާލުވި، މުހައްމަދު ވަހީދުގެ ވެރިކަމުގައި އުފެއްދި ކޮމިޝަންގެ ރިޕޯޓުގައި ވަނީ ނަޝީދު އިސްތިއުފާ ދެއްވީ އަމިއްލަފުޅަށް ކަމަށެވެ.
އެ ހާލަތަށް ފަހު، އެމްޑީޕީ ވެރިކަމުގައި ނެތް ހަތް އަހަރު ވެސް ދިވެހިން ތަޖުރިބާ ކުރީ "އަނިޔާވެރިކަން" ކަމަށް ފައްޔާޒު ވިދާޅުވި އެވެ. އެމްޑީޕީން ދެވަނަ ފަހަރަށް ވެރިކަމަށް އައީ، އަހަރުތަކެއް ކުރިން އެ މަސައްކަތުގައި ބައިވެރިވެވެޑައިގެންނެވި ބޭފުޅުންގެ އެތައް ތަޖުރިބާއެއްގެ އެހީގައި ކަމަށެވެ.
"އޭރު ޒުވާނަކަށް ތިބި މީހުން ހަރު ވެއްޖެ، ހަރު މީހުން ދޮށީ ވެއްޖެ، މިއިން ކޮންމެ މީހަކަށް ވެސް އެނގޭ އެ އަނިޔާވެރިކަން އަދި ގަދަވެދާނެ ކަން، އަދި އެ ދުވަސް އަލުން ދެކޭކަށް ނޭދޭ، ޒާތީ ތައައްސުބުން އެއްކިބާވެ މި ފެށި މަސައްކަތުގައި ދެމިތިބުމަށް އެ މީހުން އެދެނީ،" ފައްޔާޒު ވިދާޅުވި އެވެ.
އެމްޑީޕީ އެކަތިގަނޑެއްގެ ގޮތުގައި އޮތުމަށް ފައްޔާޒު މިރޭ ގޮވާލެއްވިއިރު، އެމްޑީޕީގެ ރިޔާސީ ކެންޑިޑޭޓް އަދި ރައީސް ސޯލިހަށް ތާއީދުކުރެއްވުމަށް، އެ ޕާޓީގެ ރިޔާސީ ޕްރައިމަރީ ދެން ވާދަކުރެއްވި ނަޝީދު އަދި ނުނިންމަވަ އެވެ.
މިދިޔަ މަހުގެ 28 ވަނަ ދުވަހު ބޭއްވި އެމްޑީޕީގެ ރިޔާސީ ޕްރައިމަރީގައި ނަޝީދަށް ލިބިވަޑައިގަތީ 39 އިންސައްތަ ވޯޓެވެ. އެ އިންތިހާބު ރައީސް ސޯލިހު ކާމިޔާބު ކުރެއްވީ 61 އިންސައްތަ ވޯޓެވެ. ޕްރައިމަރީ ކެމްޕޭންގައި ދެ ބޭފުޅުން ވެސް ގެންދެވީ އެއް ބޭފުޅަކު އަނެއް ބޭފުޅަކަށް ވަރަށް ބޮޑަށް ފާޑުވިދާޅުވަމުންނެވެ.
އެމްޑީޕީގެ ރިޔާސީ ޕްރައިމަރީ އަލުން ބާއްވައިދިނުމަށް އެދި ސިވިލް ކޯޓަށް މައްސަލައެއް ވެސް ހުށަހަޅާފައިވެ އެވެ. އެއީ އިލެކްޝަންސް ކޮމިޝަން (އީސީ) ގެ އެމްޑީޕީ ދަޕްތަރުގައި ނެތް އެކަމަކު އެމްޑީޕީގެ އަމިއްލަ ދަފްތަރުގައި އޮތް 39،000 މެންބަރުން ކަނޑާލުމުން އެ މެންބަރުންނާއެކު ޕްރައިމަރީ ބޭއްވުމަށް އެދި އެވެ. އެ މައްސަލަ ކޯޓަށް ހުށަހެޅުއްވި ހާމިދު އަބްދުލް ޣަފޫރަކީ ނަޝީދުގެ ފެކްޝަން ބޭފުޅެކެވެ.
2008، 2013 އަދި 2018 ގައި ވެސް އެމްޑީޕީގެ ޕްރައިމަރީން ރިޔާސީ ކެންޑިޑޭޓް ގޮތުގައި ނިންމީ ނަޝީދެވެ. ނަމަވެސް 2018 ވަނަ އަހަރު، ނަޝީދަށް އިއްވާފައިވާ ޖަލު ހުކުމުގެ ސަބަބުން ވާދަނުކުރެވޭނެތީ، ރައީސް ސޯލިހަށް ޓިކެޓު ދިނުމަށް އެމްޑީޕީގެ ކޮންގްރެސް މެދުވެރިކޮށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން، އެމްޑީޕީގެ އެތެރޭގައި ދެ ފެކްޝަނެއް ވަނީ އުފެދިފަ އެވެ. އޭގެ ފަހުން އެ ޕާޓީގެ އެތެރޭގައި ބޭއްވި ކޮންމެ އިންތިހާބެއް ވެސް، ނަޝީދުގެ ފެކްޝަންގެ މައްޗަށް ސޯލިހުގެ ފެކްޝަން ކުރި ހޯދާފައިވެ އެވެ.
