ބެންގަލޫރު (ފެބްރުއަރީ 15) - އެއާ އިންޑިއާއިން އެއް ފަހަރާ 470 މަތިންދާ ބޯޓު ގަނެ، މިހާތަނަށް އެއް އެއާލައިނަކުން އެއްފަހަރާ އެންމެ ގިނަ ބޯޓު ގަތުމުގެ ރެކޯޑު ހަދައިފި އެވެ.
އެއާ އިންޑިއާއިން މިފަހަރު ގަނެފައިވަނީ ބޮއިންގެ 220 ބޯޓު އަދި އެއާބަސްގެ 250 ބޯޓެވެ. މިއާއެކު އެ ގައުމުގެ އިންޑިގޯއާ އެކު އެއާއިންޑިއާއިން ކުރަމުންދާ ވާދަ އިތުރުވެގެންދާނެ އެވެ.
އެތެރޭގެ އަދި ބައިނަލްއަގުވާމީ އުދުހުންތަކުގައި މި ބޯޓުތައް ބޭނުންކުރާއިރު އިންޑިއާ މިހާރު ވަނީ ޗައިނާގެ މައްޗަށް ކުރިހޯދާ ދުނިޔޭގެ އެންމެ އާބާދީ ބޮޑު ގައުމަށްވެފަ އެވެ.
އެއާ އިންޑިއާއިން މިފަދަ ބޮޑު އިންގިލާބީ ބަދަލެއް މި ގެނައީ އެ ކުންފުނީގެ އައު ވެރިން ކަމަށްވާ ޓާޓާ އިން އެ އެއާލައިން ގަތުމަށްފަހު ގެންނަމުންދާ ކުރިއެރުންތަކުގެ ތެރެއިންނެވެ.
އެއާބަސް އަދި ބޮއިން އިން ގަތް މި ބޯޓު ތަކާއެކު އެމެރިކާ އަދި ޔޫރަޕުން ވަނީ ހޫނު މަރުހަބާއެއް ކިޔާ، ހުޅަނގުގެ ބާރުތަކާއި އިންޑިއާއާ ދެމެދު ބަދަހިވަމުންދާ އިގުތިސާދީ ގުޅުން ފާހަގަކޮށްފަ އެވެ.
އެގޮތުން، އެމެރިކާގެ ރައީސް ޖޯ ބައިޑަން މިކަމާ ގުޅިގެން ދެއްވި ބަޔާނެއްގައި ވިދާޅުވީ، އެއާ އިންޑިއާއިން އެމެރިކާގައި އުފެއްދި 200 އަށްވުރެ ގިނަ ބޯޓު އެއްފަހަރާ ގަތުމަކީ ތާރީހީ ކާމިޔާބީއެއް ކަމަށެވެ.
"މިކަމުން ހާމަވެގެންދަނީ އެމެރިކާ އާއި އިންޑިއާއާ ދެމެދު އޮތް އިގުތިސޯދީ ގުޅުމުގެ ވަރުގަދަކަން، ބޮޑުވަޒީރު މޯދީއާއެކު މަސައްކަތް ކުރަމުން މިދަނީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކޮށް ބައިނަލްއަގުވާމީ ގޮތުން ކުރިމަތިވާ ކަންކަމުގައި އެކުގައި މަސައްކަތް ކުރުމަށް" ބައިޑަން ވިދާޅުވި އެވެ.
މީގެ އިތުރުން ފްރާންސްގެ ރައީސް އެމެނުއަލް މެކްރޯން ވެސް ވަނީ މިކަމާ ގުޅިގެން އިންޑިއާ އަދި އެއާ އިންޑީއާއަށް މަރުހަބާ ދަންނަވާފަ އެވެ.
