އެސްއެސް މީޑިއާގެ ދިވެހި ޓީވީ ޗެނަލް، އެސްއެސް ޓީވީ ރަސްމީކޮށް އިފްތިތާހުކޮށްފި އެވެ.
އެ ޗެނެލް އިފްތިތާހު ކޮށްދެއްވީ ސަން ސިޔާމް ގްރޫޕްގެ މެނޭޖިން ޑިރެކްޓަރު އަދި ރައްޔިތުންގެ މަޖިލީހުގެ ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދު އެވެ.
ޗެނެލް އިފްތިތާހު ކުރުމަށް މަންހަޓަން ބިޒްނަސް ހޮޓެލްގައި ބޭއްވި ރަސްމިއްޔާތުގައި އެ ކުންފުނީގެ ޗީފް އޮޕަރޭޓިން އޮފިސަރު މުހައްމަދު އާސިފު (މޮންދު) ވިދާޅުވީ ޗެނެލުގެ ޕްރޮގްރާމުތައް ހިންގަމުން ގެންދާނީ ތަފާތުކޮށް ކަމަށެވެ. އާންމުކޮށް ރާއްޖޭގެ ޓީވީ ޗެނަލްތަކުގައި ޕްރޮގްރާމުތަކުގެ ދިގުމިން މިހާރު ހުންނަ މިންވަރަށް ވުރެ އެސްއެސް ޓީވީގެ ޕްރޮގްރާމުތައް ކުރުވާނެ ވާނެ ކަމަށް އޭނާ ވިދާޅުވި އެވެ. އެއީ ޝައުގުވެރިކަން ނުގެއްލި ބަލާލެވޭނެ މިންވަރަށް ޕްރޮގްރާމުތައް އުފެއްދުމަށް ކަމަށް ކުރިން ޓީވީއެމްގައި އިސް މަގާމުތައް އަދާކުރެއްވި މޮންދު ވިދާޅުވި އެވެ.
"ވީހާވެސް ބޮޑަކަށް އައުޓްސޯސް ކޮށްގެން ޕްރޮގުރާމުތައް އުފެއްދުމުގެ ވިސްނުން އަޅުގަނޑުމެންގެ ހުރީ، ހާއްސަކޮށް ފޯނު ފަދަ ވަސީލަތްތައް ބޭނުން ކޮށްގެން ކޮންޓެންޓު އުފައްދަން ބޭނުންވާ ކުދިންނަށް އެ ފުރުސަތު ދިނުން،" އޭނާ ވިދާޅުވި އެވެ.
ރިކޯޑު ޝޯ ތަކާއި ލައިވް ޝޯތަކުގެ އިތުރުން ހަބަރު ގަޑިތަކުގައި ހަބަރު ވެސް އެ ޗެނަލުން ގެނެސްދޭނެ އެވެ. ހަބަރު ގެނެސްދޭނީ ހެނދުނު 10:00، މެންދުރުފަހު 2:00، ހަވީރު 4:00، ރޭގަނޑު 8:00 އަދި މެންދަމު 12:00 ގަ އެވެ. އޭގެތެރެއިން ރޭގަނޑު 8:00 ގައި ގެނެސްދޭނީ ބޭރު ހަބަރެވެ.
އެސްއެސް ޓީވީގެ ޕްރޮގްރާމްތައް ކުރިއަށް ގެންދާނީ ކޮންމެ ދުވަހެއްގެ ހެނދުނު 9:00 އިން ރޭގަނޑު 12:00 އަށެވެ.
އެސްއެސް މީޑިއާގެ ދަށުން މިފަހުން ވަނީ އެސްއެސް ނެޓުގެ ނަމުގައި ކޭބަލް ޓީވީގެ ހިދުމަތް ވެސް ދޭން ފަށައިފަ އެވެ.
އެ ހިދުމަތުގެ ދަށުން 100 އަށްވުރެ ގިނަ ޗެނެލް ދައްކަމުން ދެއެވެ. އެސްއެސް ނެޓުގެ ހިދުމަތް ދެމުން ގެންދަނީ ކުރިން ދިރާގު ޓީވީގެ ހިދުމަތް ދިން ނެޓުވޯކުގެ ތެރެއިންނެވެ.
