ވީނުވީ ނޭނގި ގެއްލެމުން އަންނަ މީހުން އިތުރުވާތީ، އެ މީހުން ހޯދުމަށް އަޅާފައިވާ ފިޔަވަޅުތައް ހަރުދަނާ ކުރުމަށް ގޮވާލާ ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލަން ވޯޓު ދިނުމަށް ފަހު، ހަމަ އެ ވާހަކަ ދައްކަވާތީ މީދޫ ދާއިރާގެ މެންބަރު ރޮޒައިނާ އާދަމްގެ ބަހުސް ރިޔާސަތުން ހުއްޓުވައިފި އެވެ.
ޕީއެންސީގެ ޕީޖީ ލީޑަރު، މަޑުއްވަރީ ދާއިރާގެ މެންބަރު އާދަމް ޝަރީފް އުމަރު މިއަދު ހުށަހެޅުއްވި ކުއްލި މައްސަލަ ބޭރުކޮށްލީ 29 މެންބަރުންގެ ވޯޓުންނެވެ. އޭގެ ތެރޭގައި ރޮޒައިނާ ވެސް ހިމެނިވަޑައިގަންނަވަ އެވެ.
އެހެންނަމަވެސް، އޭގެ ފަހުން މަޖިލީހުގައި ކުރިއަށް ދިޔަ ސަރުކާރު އިމާރާތްތައް ހިންގުމަށް ބޮޑު ކުލި ދައްކާ މައްސަލައަށް ހައްލު ހޯދުމުގެ ގަރާރުގެ ބަހުސް ވަގުތުގައި ރޮޒައިނާ ވަނީ ކުއްލި މައްސަލައިގެ ވާހަކަ ދައްކަވައިފަ އެވެ.
ރޮޒައިނާ އެ ވާހަކަ ދެއްކެވީ އެކަމާ ގުޅިގެން ނައިފަރު ދާއިރާގެ އިދިކޮޅު މެންބަރު އަހުމަދު ޝިޔާމް ދެއްކެވި ވާހަކައަކަށް ރައްދު ދެއްވަމުންނެވެ. ޝިޔާމް ވަނީ އެ މައްސަލަ ބޭރުކޮށްލުމަކީ މަޖިލީހުގެ ކަންކަން ހިންގުމަށް ސަރުކާރުން ހުރަސް އަޅާ ކަމުގެ ހެއްކެއް ކަމަށް ދޭހަވާ ފަދަ ގޮތަކަށް ވާހަކަ ދައްކަވައިފަ އެވެ.
އެކަމަށް ރައްދު ދެއްވައި ރޮޒައިނާ ވިދާޅުވީ 18 ވަނަ މަޖިލީހުގައި އެކަންކަން ވީ ގޮތް ތަޖުރިބާ ކުރެވުނު ކަމަށާއި މި ސަރުކާރުން މަޖިލީހުގައި ހިނގާ ކަންކަމަށް ހުރަސް އަޅާ ކަމަށް ނުބުނެވޭނެ ކަަމަށެވެ.
"މިއަދު ހުށަހެޅިގެން ދިޔަ ކުއްލި މައްސަލައަކީ ހަގީގަތުގައި އޭގެ ހައްލެއް ބޭނުންވާ ކަމުގައިވާ ނަމަ އެއީ ކޮމިޓީއަށް ހުށަހަޅަން ޖެހޭ މައްސަލައެއް،" އެ މައްސަލަ 241 ކޮމިޓީއަށް ހުށަހަޅާފައިވާނެ ކަން ފާހަގަކޮށް ރޮޒައިނާ ވިދާޅުވި އެވެ.
އެ ހިސާބުން ރޮޒައިނާގެ ވާހަކަ މެދުކަނޑާލެއްވުމަށް ފަހު ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ އެއީ ކުއްލި މައްސަލައިގެ ބަހުސް ކުރާ ވަގުތު ނޫން ކަމަށް ވިދާޅުވެފަ އެވެ.
"އެ ބަހުސް ބޭނުންވެވަޑައިގެންނެވި ނަމަ އެކަމަށް ވޯޓު ދެއްވީ އެ ބަހުސް ކުރިއަށް ގެންދެވޭނެ،" ނަޝީދު ވިދާޅުވި އެވެ.
ރޮޒައިނާ ވަނީ ޝިޔާމްގެ ވާހަކަ ރިޔާސަތުން ނުހުއްޓުވައި، އޭނާގެ ވާހަކަ ހުއްޓުވުމުން އެކަމާ ޝަކުވާ ކުރައްވައިފަ އެވެ. އަދި ކުއްލި މައްސަލައާ ގުޅޭ ގޮތުން ވާހަކަ ދައްކަން ނޫޅޭ ކަމަށް ވެސް ވިދާޅުވި އެވެ.
"ނައިފަރު ދާއިރާގެ މެންބަރު އެ ވާހަކަ ދެއްކެވީމާ ރައްޔިތުންނަށް އޮޅޭ ގޮތަށް ވާހަކައެއް ދައްކަވާފައިވާތީވެ އެ ވާހަކަ ދައްކަވާފައިތީވެ، އެކަން ރަނގަޅުކޮށްލަން މިއުޅެނީ،" ރޮޒައިނާ ވިދާޅުވި އެވެ.
ރޮޒައިނާ އިތުރަށް ވިދާޅުވީ ކަންކަމުގައި ނަތީޖާ ނުކުންނާނީ ނަތީޖާ ނުކުންނަ ގޮތަށް ކުރުމުން ކަމަށެވެ. އެގޮތުން ރަނގަޅު ގަރާރެއް ހުށަހަޅައިފިނަމަ އެ ގަރާރު ކޮމިޓިއަށް ހަމައަށް ދާނެ ކަމަށާއި އެހެންނަމަވެސް ކުއްލި މައްސަލައަކީ ކޮމިޓީއަކަށް ވެސް ދާނެ އެއްޗެއް ނޫން ކަމަށް ވިދާޅުވި އެވެ.
"މިތާނގައި ހަމަ ވާހަކަތަކެއް ދައްކާލާފައި މި ހިސާބުން ހަމަ ނިމޭ ކަމެއް [ކުއްލި މައްސަލަ] އެއީ،" އެ މައްސަލައަށް ނޫނެކޭ ވިދާޅުވި ސަބަބު ސާފުކޮށްދެއްވަމުން ރޮޒައިނާ ވިދާޅުވި އެވެ.
ކޮންމެ ދުވަހަކު ކުއްލި މައްސަލަތައް އިދިކޮޅުން ހުށަހަޅަނީ ހަމަ ސަރުކާރަށް ފާޑުވިދާޅުވުމުގެ ގޮތުން ކަމަށް ވެސް ރޮޒައިނާ ތުހުމަތު ކުރެއްވި އެވެ.
