އަމީނީ މަގު ތަރައްގީ ކުރުމަށް ޕްލޭނިން މިނިސްޓްރީން އާރުޑީސީއާ ހަވާލު ކޮށްގެން ކުރިއަށް ގެންދާ މަޝްރޫއުގެ ދަށުން އެ މަގުގައި ތާރު އެޅުމުގެ މަސައްކަތް އެމްޓީސީސީން މިރޭ ފަށައިފި އެވެ.
މިރޭ މި މަސައްކަތް ފަށާފައިވާއިރު, އެ މަގުގެ ފުރަތަމަ ތިން ސެގްމެންޓުގެ މަސައްކަތް މިރޭ ނިމޭނެ ކަމަށް އެމްޓީސީސީގެ ޖެނެރަލް މެނޭޖަރު ރަމްޒީ އަބޫބަކުރު ވިދާޅުވި އެވެ. ތާރު އަޅަން ފެށި ސަރަހައްދުން ޕްލޭނިން މިނިސްޓްރީ، އާރުޑީސީ އަދި އެމްޓީސީސީގެ އިސް އޮފިޝަލުން ފެނިގެންދިޔަ އެވެ.
އެ ސަރަހައްދުގައި ހުންނަވާ ރަމްޒީ އިތުރަށް ވިދާޅުވީ ކުރިއަށް އޮތް ރޯދަ މަހުގެ ކުރިއަށް ފުުރުގާން މިސްކިތާ ހަމައަށް ތާރު އަޅާނެ ކަމަށެވެ. މިރޭ ތާރު އަޅާ ތިން ސެގުމެންޓު ނިމޭނީ އަމީނީ މަގުގެ އިރުމަތީ ކޮޅުން ފެށިގެން ސްޓެލްކޯއާ ހިސާބަށެވެ.
އާރުޑީސީގެ ތާރު އަޅާ މެޝިންތައް ބަހައްޓާނެ ބިމެއް ލިބުން ލަސްވުމާއެކު، އަމީނީ މަގު ތަރައްގީ ކުރުމުގެ މަސައްކަތް ހަލުވި ކުރުމަށް އެ ކުންފުނިން ތާރު އެޅުން އެމްޓީސީސީއާ ހަވާލު ކުރީ ހޮނިހިރު ދުވަހު އެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ. ނަމަވެސް އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މިދިޔަ ހަފުތާ މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
