ވ. އަތޮޅު ކަނޑުމަތިން ފެނުނު ހަށިގަނޑުގެ ސާމްޕަލް ނެގުމަށް ފަހު ވަޅުލައިފި އެވެ.
ވެމްޕަރު ފަޅުގެ ހުޅަނގު އުތުރުން ކަނޑު އަޑިން އިންސާނެއްގެ ހަށިގަނޑު ފެނުނު ކަން ފުލުހުން ހާމަކުރީ މިދިޔަ މަހުގެ ދެވަނަ ދުވަހު އެވެ. އޭގެ ފަހުން މަހަކަށްވުރެ ގިނަ ދުވަސް ވެފައިވާއިރު، މިއަދު މީޑިއާތަކަށް ފޮނުވި މެސެޖެއްގައި ފުލުހުން ބުނެފައި އެ ހަށިގަނޑުން ފުލުހުންގެ ތަހުގީގަށް ބޭނުންވާ ސާމްޕަލް ނެގުމަށް ފަހު ވަޅުލާފައި ވާކަމަށެވެ.
އަދި, މި މައްސަލަ ވެސް ތަހުގީގުކުރަމުން އަންނަ ކަމަށް ފުލުހުން ބުނެ އެވެ.
ހަށިގަނޑު ފެނިފައި ވަނީ ލިޓޮން ކަނޑުމަތިން ގެއްލުނުތާ ދެ ދުވަސް ފަހުން:
ވެމްޕަރު ފަޅުތެރެއިން އިންސާނެއްގެ ހަށިގަނޑު ފެނިގެން ފުލުހުން އެކަން ހާމަކުރުމުގެ ދެ ދުވަސް ކުރިން ވިލިމާލެއިން ދެމީހުންނާ އެކު ފުރި ތެޔޮ ބޯޓަކުން ދެމީހުން ގެއްލިގެން އެކަން އިއުލާނުކުރި އެވެ. ތެޔޮ ބޯޓުގައި ތިބީ ގދ. ތިނަދޫ / މަނާރު، މުޙައްމަދު ނިޒާމް، 45އ، އާއި މޮހައްމަދު ލިޓަން، 35އ އެވެ.
ތެޔޮ ބޯޓު ފެނިފައި ވަނީ ހުޅުލެ ކައިރިން އޮޔާ ދަނިކޮށެވެ.
އެ ތެޔޮބޯޓުން ދަތުރުކުރި ދިވެހި ކައްޕި ނިޒާމް އޭގެ ދުވަސްކޮޅެއް ފަހުން މާލެ ތެރެއިން ފެނިގެން ހައްޔަރު ކުރި އެވެ. އެހެން ނަމަވެސް، މިއަދާ ހަމައަށް ވެސް ދެންް އެ ބޯޓުން ދަތުރުކުރި ބިދޭސީ މީހާގެ ވީނުވީ އެއް ނޭނގެ އެވެ.
އެ ހަށިގަނޑަކީ ލިޓޮންގެ ހަށިގަނޑުކަން ސީދާ ގޮތެއްގައި ފުލުހުން އަދި ހާމަކޮށްފައި ނުވާއިރު، ނިޒާމް ހައްޔަރު ކުރީ މަރުގެ މައްސަލައެއްގައި ކަމަށް ބުނެފައި ވެއެވެ.
މިކަމާއި ގުޅިގެން ތަކުރާރުކޮށް ފުލުހުންނަށް ގުޅުމުން ވެސް އިތުރު މައުލޫމާތެއް ހާމައެއް ނުކުރެ އެވެ. ބުނެފައި ވަނީ މައްސަލަ ދަނީ ތަހުގީގު ކުރަމުން ކަމަށާއި، މައްސަލައާ ގުޅޭ އިތުރު މައުލޫމާތެއް ދެވެން ނެތް ކަމަށެވެ.
