ރިއޯ ޑި ޖަނެއިރޯ، ބްރެޒިލް (ފެބްރުއަރީ 11) - ހުސްވެފައިވާ ބްރެޒިލް ގައުމީ ފުޓްބޯޅަ ޓީމުގެ ކޯޗަކަށް ރެއާލް މެޑްރިޑްގައި ހުރި އިޓަލީގެ ކޯޗު ކާލޯ އަންޗެލޮޓީ ގެންނަން އެއްބަސްވުމަކަށް އަތުވެފައިވާ ކަމަށް ދެކެވޭ ވާހަކަ ބްރެޒިލްގެ ފުޓްބޯޅަ ފެޑެރޭޝަނުން ދޮގުކޮށްފި އެވެ.
ބްރެޒިލްގެ ކޯޗުގެ މަގާމު ހުސްވީ، މިދިޔަ ޑިސެމްބަރު މަހު ފީފާ ވޯލްޑް ކަޕްގެ ކުއާޓާ ފައިނަލްގައި ކްރޮއޭޝިއާ އަތުން ބަލިވި މެޗަށް ފަހު ބްރެޒިލްގެ ކޯޗަކަށް ހުރި ޓީޓޭ މަގާމުން ވަކިވުމުންނެވެ. އާ ކޯޗެއް ހޯދަން ބްރެޒިލް އިން ކުރަމުން އަންނަ މަސައްކަތުގައި އަދިވެސް ރަސްމީކޮށް ހުރިހާ ކަމެއް ނުނިމެ އެވެ.
ބްރެޒިލާ ދެން ހަވާލުވާނެ ކޯޗެއްގެ ވާހަކަ މީޑިއާގައި އެކި ގޮތްގޮތަށް ދެކެވޭއިރު، މިދިޔަ ދުވަސްތަކުގައި ގިނަ މީޑިއާތަކުން ރިޕޯޓްކުރި އެއް ކަަމަކީ މި ސީޒަނަށް ފަހު ބްރެޒިލާ ހަވާލުވާން ރެއާލްގެ ކޯޗު އަންޗެލޮޓީގެ އެއްބަސްވުމެއް އެބައޮތް ކަމަށެވެ.
އެކަމަކު، ބްރެޒިލްގެ ފުޓްބޯޅަ ފެޑެރޭޝަނުން އިއްޔެ ނެރުނު ބަޔާނުގައި ބުނެފައިވަނީ އަންޗެލޮޓީ ގެންނަން އެއްބަަސްވުމެއް އޮތް ކަމަށް ބުނެ ދެކެވެނީ ހަގީގަތެއް ނެތް "ދޮގު" ވާހަކައެއް ކަމަށެވެ. ފެޑެރޭޝަނުގެ ބަޔާނުގައި ދެން ބުނެފައިވަނީ އާ ކޯޗެއް ހޯދުމުގެ މަސައްކަތް ދެފުށް ފެންނަ ގޮތަކަށް ކުރެވެމުން އަންނަ ކަމަށާއި ރަނގަޅު ވަގުތުގައި އެކަން ނިންމައި، ހާމަކުރާނެ ކަމަށެވެ.
އަންޗެލޮޓީ، 63، މި ވަގުތު ހުރީ ރެއާލް ގޮވައިގެން ފީފާ ކްލަބް ވޯލްޑް ކަޕް ކުޅެން މޮރޮކޯގަ އެވެ. ކްލަބް ވޯލްޑް ކަޕް ފައިނަލުގައި މިރޭ ރެއާލުން ސައުދީ އަރަބިއްޔާގެ އަލް ހިލާލާ ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އަންޗެލޮޓީ އަށް ވަނީ ބްރެޒިލް ޓީމާ ހަވާލުވުމާ ގުޅޭ ގޮތުން ސުވާލުތަކެއް އަމާޒުވެފަ އެވެ.
އެ އަށް ޖަވާބު ދެމުން އަންޗެލޮޓީ ބުނީ ރެއާލާ އެކު އޭނާގެ ކޮންޓްރެކްޓް އޮތީ 2024 ވަނަ އަހަރުގެ ޖޫންގެ ނިޔަލަށް ކަމަށާއި އެ އަށް އިހުތިރާމް ކުރާނެ ކަމަށެވެ.
ބްރެޒިލް މީޑިއާ އިން އެ ގައުމުގެ ފުޓްބޯޅަ ޓީމުގެ ކޯޗުގެ މަގާމާ ގިނަ މަޝްހޫރު ކޯޗުން ގުޅުވައިގެން ރިޕޯޓްތައް ޝާއިއުކުރެ އެވެ. އެ ގޮތުން މީގެ ކުރިން ވަނީ މެންޗެސްޓާ ސިޓީގެ ކޯޗު ޕެޕް ގާޑިއޯލާ، ސްޕެއިން ކޯޗުކަމުން ވަކިވެ މި ވަގުތު ހުސްކޮށް ހުރި ލުއިސް އެންރީކޭ، ފްރާންސްގެ ޒިނެދިން ޒިދާން އަދި ރޯމާގެ ކޯޗަކަށް ހުރި ހޯސޭ މޮރީނިއޯ ބްރެޒިލާ ހަވާލުވާން އުޅޭ ކަމަށް ރިޕޯޓްކޮށްފަ އެވެ.
