އާ ސީޒަނަށް ޓީމު ވަރުގަދަ ކުރުމުގެ ގޮތުން ކްލަބް އީގަލްސް އިން އެ ޓީމަށް ކުޅެމުން އައި ސީނިއާ ދެ ކުޅުންތެރިން ކަމަށްވާ އިމްރާން ނަޝީދު (އިންމަ) އާއި އަބްދުﷲ ސަމީހު މޫސާ (ސަމިއްޓެ)ގެ ކޮންޓްރެކްޓް އާ ކޮށް، ޔުނައިޓެޑް ވިކްޓަރީ (ޔޫވީ) އަށް ކުޅެމުން އައި ލަމާން ޒުހައިރު، އައިހަމް ސައީދު (އައިކޮ) އަދި އަބްދުﷲ އަމިން އަލީ ގެެނެސްފި އެވެ.
ކުރިން ފުރަތަަމަ ޑިވިޝަނުގައި ވިޔަންސާ އާއި އޯލްޔޫތުލިންކްއޭޖް (އޭވައިއެލް) އަދި ނިއު ރޭޑިއަންޓް ސްޕޯޓްސް ކްލަބަށް ވެސް ކުޅެފައިވާ އިންމަ އަކީ އީގަލްސް އިން 2016 ވަނަ އަހަރު ޕްރެޒިޑެންޓްސް ކަޕް ކާމިޔާބުކުރިއިރު، ޓީމުގެ ކެޕްޓަން އެވެ.
ސަމިއްޓެ، އަންނަނީ 2012 ވަނަ އަހަރުން ފެށިގެން އީގަލްސް އަށް ކުޅެމުންނެވެ. މި ވަގުުތު އީގަލްސް ޓީމުގައި ތިބި ކުޅުންތެރިންނަށް ބަލާއިރު، އެ ކްލަބްގައި އެންމެ ގިނަ ދުވަސްވީ ކުޅުންތެރިއަކީ ސަމިއްޓެ އެވެ.
އީގަލްސް އިން ލަމާން، އައިކޮ އަދި އަމިންގެ ސޮއި މި ހޯދީ ފަސް އަހަރުގެ ކޮންޓްރެކްޓެއްގަ އެވެ. މި ތިން ކުޅުންތެރިންނަކީ ވެސް މިދިޔަ އަހަރު ރާއްޖޭގެ 19 އަހަރުން ދަށުގެ ގައުމީ ފުޓްބޯޅަ ޓީމާއި ޔުނައިޓެޑް ވިކްޓަރީގެ މެޗުތަކުގައި ކުޅެފައިވާ ކުޅުންތެރިންނެވެ.
އީގަލްސްއާ އެކު ސޮއިކުރި ޔުނައިޓެޑް ވިކްޓަރީގެ ތިން ކުޅުންތެރިން: (ކ.ވ) ލަމާން، އަމިން އަދި އައިކޮ، ކްލަބްގެ ޗެއާޕާސަން، ފާތިމަތު ސުއާދު (ތާތު)އާ އެކު.
މި ފަހަރު އޭއެފްސީ ކަޕްގެ ކޮލިފައިންގައި ވާދަކުރަން ފުރުސަތު ލިބިފައި އޮތް އީގަލްސް ޓީމާ ހަވާލުވާނެ ކަމަށް ބެލެވެނީ މިދިޔަ އަހަރު ޔުނައިޓެޑް ވިކްޓަރީގެ ކޯޗަކަށް ހުރި އިހުސާން އަބްދުލް ގަނީ (ސާންތީ) އެވެ. ސާންތީ، އީގަލްސްއާ އެންމެ ފުރަތަމަ ހަވާލުވީ 2011 ގަ އެވެ. އޭގެ ފަހުން، އެ ޓީމާ އެކު ޒުވާން ކުޅުންތެރިން ލައިގެން މަސައްކަތެއް ފަށައި، 2017 ވަނަ އަހަރުގެ މާލޭ ލީގާ ހަމައަށް އެ ޓީމަށް ކޯޗުކޮށްދީފައިވެ އެވެ.
ފާއިތުވި ސީޒަންގައި އީގަލްސް އިން ވަނީ ތިން ކޯޗެއްގެ އިރުޝާދުގެ ދަށުން ކުޅެފަ އެވެ. ސީޒަން ފަށައިގެން، ޕްރެޒިޑެންޓްސް ކަޕްގައި އެ ޓީމަށް ކޯޗުކޮށްދިނީ މުހައްމަދު ޝާޒްލީ (ޝާޒް) އެވެ. އޭގެ ފަހުން، ވަގުތީ ހެޑް ކޯޗެއްގެ ގޮތުގައި އީގަލްސް ގޮވައިގެން އުޅުނީ އެސިސްޓަންޓް ކޯޗު އަހުމަދު ނިމާދު (ނިމާ) އެވެ. ވަގުތީ ކޯޗަކަށް ހުރެވޭ މުއްދަތު ހަމަވުމުން، ދެން ޓީމުގެ ކޯޗަކަށް އައީ މުހައްމަދު އާތިފް (އާތީ) އެވެ. އާތީ ވަނީ ސީޒަނުގެ ނިޔަލަށް އީގަލްސް އަށް ކޯޗުކޮށްދީފަ އެވެ.
ކުރިއަށް އޮތް ސީޒަނަށް އީގަލްސް އިން ބިދޭސީ ކުޅުންތެރިން ވެސް ހޯދަމުން އަންނައިރު، އެ ޓީމުގެ ތިން ކުޅުންތެރިއަކު ވަނީ ކްލަބް ދޫކޮށްލައިފަ އެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކުރި، ހަސަން ރާއިފް އަހުމަދު (ހަންނަ) އާއި ހުސެއިން ސިފާއު ޔޫސުފް (ކުރޯ) އަދި އަހުމަދު ނޫމާން (ހެލްމެޓް) އެވެ.
އެނގިފައިވާ ގޮތުގައި އީގަލްސް އިން މަސައްކަތް ކުރަމުން އަންނަނީ މި ހަފްތާގައި ޕްރެކްޓިސް ފެށުމަށެެވެ.
