ސެޕްޓެމްބަރުގައި އޮންނަ ރިޔާސީ އިންތިހާބުގައި ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް ތާއީދު ކުރައްވާނެ އެއްގޮތެއް ވެސް ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގައި ރައީސް ސޯލިހާ ވާދަކުރައްވައި ބަލިވެވަޑައިގެންނެވި ނަޝީދު އަދިވެސް ތާއިދުކުރައްވާނެ ކެންޑިޑޭޓެއް ހާމަކުރައްވާފައި ނުވެ އެވެ. އަދި، ރައީސް ސޯލިހާ އެކު އެމްޑީޕީއަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށް ވަނީ ވިދާޅުވެފަ އެވެ.
މިވަގުތު ވެސް ރައީސް ސޯލިހުގެ ސަރުކާރުގައި ޖޭޕީގެ ހިއްސާ އެބައޮތެވެ. އެ ޕާޓީގެ ސްލޮޓުތަކުގައި މިނިސްޓަރުންނާއި ސަރުކާރު ކުންފުނިތަކުގެ ވެރިންނާއި އެކި ފަންތީގެ މުވައްޒަފުން އެބަތިއްބެވެ. ޖޭޕީން ސެޕްޓެމްބަރުގެ އިންތިހާބާ މެދު ވަކި ގޮތެއް މި މަހުގެ ތެރޭގައި ނިންމާނެ އެވެ. ވަކި ކެންޑިޑޭޓަކު ނެރުމާއި ކޯލިޝަނެއްގެ ތެރެއިން ނުކުންނާތޯއާ މެދު ގޮތެއް ނިންމާނެ އެވެ.
"އިބޫ ފަހަތަށް ގާސިމް އަރާނެ އެއް ގޮތެއް ވެސް ނެތް،" މިއަދު އެމްޑީޕީގެ ގައުމީ މަޖިލީހުގެ ކުރީގެ މެމްބަރުންނާއި މިހާރުގެ މެމްބަރުން ތިއްބަވާ ގްރޫޕަކަށް ކުރެއްވި މެސެޖެއްގައި ނަޝީދު ވިދާޅުވި އެވެ.
އެ މެސެޖަށް ރައްދު ދެއްވީ ރައީސްގެ ސޯލިހުގެ ފެކްޝަންގައި ހުންނެވި އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފެވެ. އެގޮތުން، 2008 ގައި ނަޝީދާ އެކު ހެއްދެވި ކޯލިޝަނުގެ "ހަނދާންތައް" ގާސިމްގެ ހުންނެވި ކަމަށާއި، އެއީ ގާސިމަށް ހިތި ތަޖުރިބާއެއްގެ ގޮތުގައި ޝަރީފް ސިފަކުރެއްވި އެވެ.
"ޝަރީފަށް އަދި ވަރަށް ކުޑަ މިންވަރެއް އެނގިލައްވާނީ. ގާސިމްއެއް ނާރާނެ. 100 ޕަސެންޓު ޔަގީން،" ނަޝީދު ވިދާޅުވި އެވެ.
"ތިޔަ ބޭފުޅުން ރައީސް އިބޫއަށް އޮޅުވާލައި ވާވެއްދީ. ތިޔަ ބޭފުޅުން ސަނާ ކިޔަސް މީހުން ދެކޭ ގޮތް ވަރަށް ތަފާތު. އަދި، މިއީ ގާސިމްގެ ރަނުގެ ފުރުސަތު."
ރައްޔިތުންގެ މަޖިލިސް ހުޅުވި ދުވަހު ރައީސް ސޯލިހާ، ގާސިމް ސަލާމް ކުރައްވަނީ. މިއީ ކޯލިޝަނެއްގައި މިހާ ގިނަ ދުވަހު ޖޭޕީ ހަރަކާތްތެރިވާ ކޯލިޝަން ސަރުކާރު ---ފޮޓޯ: މަޖިލިސް އިދާރާ
ރިޔާސީ އިންތިހާބަށް ކޯލިޝަނަކާ އެކު ނުކުތުމުގެ ވިސްނުން ރައީސް ސޯލިހު ގެންގުޅުއްވާއިރު އެކަމާ ނަޝީދު ދެކޮޅެވެ. އަދި، ގެންދަވަނީ "ފިކުރެއްގެ ދިރުން" ނަމުގައި އެމްޑީޕީގެ އެތެރޭގައި ހަރަކާތެއް ހިންގަވަމުންނެވެ. އެ ހަރަކާތުގެ އަމާޒަކީ ގޮފިތަކެއް ހަދައި، އެ ގޮފިތަކަށް 50،000 މެމްބަރުން ހަމަކޮށް، އާދަޔާ ހިލާފު ކޮންގްރެސްއަކަށް ގޮވާލައި، އެމްޑީޕީން ތާއިދުކުރާނެ ރިޔާސީ ކެންޑިޑޭޓެއް ކަނޑައެޅުމެވެ.
"ޝަރީފް ތިޔަ ބޭފުޅުންނަށް ލިބޭނެ އިތުރު ވޯޓެއް ނެތް. ގިނަވެގެން 30،000. އަޅުގަނޑު ޕްރައިމަރީގައި ބުނިން އިބޫއަށް ލިބޭނެ ކަމަށް ފެންނަނީ 10-15 ޕަސެންޓު،" އިތުރު މެސެޖެއްގައިނަޝީދު ވިދާޅުވެފައިވެ އެވެ.
ކޯލިޝަނަކާ އެކު ރިޔާސީ އިންތިހާބަށް ނުކުންނަވާ ނަމަ ރައީސް ސޯލިހަށް މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމްގެ ތާއީދު މުހިންމުވާނެ އެވެ. ނަޝީދުގެ މި މެސެޖުތަކާ ގުޅިގެން ގާސިމްގެ ބަހެއް ހޯދުމަށް ކުރި މަސައްކަތްތައް ކާމިޔާބުވެފައެއް ނުވެ އެވެ.
ފެބްރުއަރީ 24 ގައި ޖޭޕީގެ ކޮންގްރެސް ބާއްވާނެ އެވެ. ރައީސް ސޯލިހުގެ ކޯލިޝަނުގައި ހިމެނިގެން އިންތިހާބަށް ނުކުތުމާ މެދު އެ ދުވަހު ގޮތެއް ނިންމާނެ އެވެ.
ދެހާސް އަށާރަ ވަނަ އަހަރުގެ ރިޔާސީ އިންތިހާބާ ކުރިމަތިވި އިރު އެ ޕާޓީގެ ލީޑަރު ޖަލު ބަންދުގައި ހުރުމާއެކު ޖޭޕީއިން ރިޔާސީ އިންތިހާބަށް ނުކުތީ އެމްޑީޕީއާއެކު ހެދި ކޯލިޝަނުގަ އެވެ.
ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރި އެވެ. އެ ދެ އަހަރު ވެސް އެ ޕާޓީގެ ޓިކެޓުގައި ވާދަކުރެއްވީ ގާސިމެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
