ލަންޑަން (ފެބްރުއަރީ 9) - އިނގިރޭސި ގަދަބާރު، މެންޗެސްޓާ ޔުނައިޓެޑް ގަންނަން ގަތަރުގެ އަމީރު ޝެއިހް ތަމީމް ބިން ހަމަދު އަލް ތާނީ ބޭނުންފުޅުވާ ކަމަށާއި، މި ކަމަށް 4.5 ބިލިއަން ޕައުންޑް (5.5 ބިލިއަން ޑޮލަރު) ހޭދަކުރަން ތައްޔާރަށް ހުންނެވި ކަމަށް މީޑިއާ ރިޕޯޓްތައް ބުނެފި އެވެ.
ގަތަރުގެ ޝާހީ އާއިލާ އިން ޔުނައިޓެޑް ގަންނަން މަސައްކަތްކުރާ ވާހަކަ ފެންމަތިވެފައި މި ވަނީ މިދިޔަ ނޮވެމްބަރު މަހުން ފެށިގެން ކުލަބު ވިއްކާލުމުގެ ވިސްނުން ގެންގުޅެމުން އަންނަ ކަމަށް އެ ކްލަބްގެ މިހާރުގެ ވެރިން ކަމަށްވާ އެމެރިކާގެ ގްލޭޒާސް އާއިލާ އިން ބުނެފައިވަނި ކޮށެވެ. އެމެރިކާގެ ބިލިއަނަރުން ޔުނައިޓެޑް 2005 ވަނަ އަހަރު ގަތީ 1.1 ބިލިއަން ޕައުންޑް (1.3 ބިލިއަން ޑޮލަރު) އަށެވެ.
ގްލޭޒާސް އިން ޔުނައިޓެޑް ވިއްކާލުމާއި ގުޅޭގޮތުން ވާހަކަތައް ދެކެވެން ފަށާފައިވަނީ ފަހަކަށް އައިސް ކުލަބުގެ މާލީ ހާލަތު ދަށްވެ ކުލަބުގެ ދަރަނިތައް މަދުކުރުމަށް ބޯޑުން އިރުޝާދުދެމުން ދިޔަ ދަނޑިވަޅެއްގަ އެވެ. ޔުނައިޓެޑް ވިއްކާލުމާ ގުޅޭގޮތުން ކޯޗު އެރިކް ޓެން ހާގް ބުނެފައިވަނީ މި ވަގުތު ކުލަބަށް އެންމެ ރަނގަޅު ގޮތަކީ ވެސް އާ ބަޔަކު ކުލަބާ ހަވާލުވުން ކަމަށެވެ.
މެންޗެސްޓާ ޔުނައިޓެޑް ގަތުމަށް ގިނަ ބަޔަކު ޝައުގުވެރިކަން ފާޅުކުރަމުން އަންނަނިކޮށް އެންމެ ފަހުން މި ރޭހަށް ވަނީ ގަތަރުގެ އިންވެސްޓަރުންނެވެ. ގަތަރުގެ އަމީރުގެ އެންގެވުމަށް ޔުނައިޓެޑް ގަންނަން 4.5 ބިލިއަން ޕައުންޑް (5.5 ބިލިއަން ޑޮލަރު) ހޭދަކުރަން އިންވެސްޓަރުން ތައްޔާރަށް އޮތްކަމަށް މީޑިއާ ރިޕޯތްތައް ބުނެ އެވެ.
މިވަރުގެ ބޮޑު އަގެއް ގަތަރުން ހުށަހަޅައިފިނަމަ މިހާތަނަށް ޔުނައިޓެޑް ގަންނަން ވިސްނަމުންދިޔަ ހުރިހާ އެންމެން އެ ވިސްނުން ދޫކޮށްލާނެ ކަމަށް ބެލެވެ އެވެ. ސަބަބަކީ މާލީ ގޮތުން ގަތަރުގެ އިންވެސްޓަރުންނާ ވާދަކުރެވޭ ފެންވަރު ނެތުމެވެ.
ގަތަރުގެ އަމީރު ޝެއިހް ތަމީމް ކިތަންމެ ބޭނުންފުޅު ވިޔަސް ޔުނައިޓެޑް ގަތުމުގައި ގަތަރުގެ އިންވެސްޓަރުންނަށް ގޮންޖެހުންތައް އެބަހުއްޓެވެ. އެންމެ ބޮޑު މައްސަލައަކީ ޔޫރަޕްގެ ފުޓްބޯޅަ އިދާރާ (ޔުއެފާ)ގެ ގަވާއިދެވެ.
ގަތަރުން ޔުނައިޓެޑް ގަނެފި ނަމަ އެކުލަބަށް ޗެމްޕިއަންސް ލީގުގައި ނުކުޅެވޭނެ އެވެ. ޔުއެފާގެ ގަވާއިދު ބުނާ ގޮތުން އެއް ބަޔަކު ހިންގަމުން އަންނަ ދެ ކުލަބަކަށް އެ މުބާރާތުގައި ނުކުޅެވޭނެ އެވެ. ސަބަބަކީ ދެ ޓީމު އެއް ޓީމް އަނެއް ޓީމާ ދެކޮޅަށް ކުޅެން ޖެހިދާނެތީ އެވެ.
މި ވަގުތު ގަތަރުގެ އިންވެސްޓަރުން ހިންގަމުން އަންނަ އެއް ކުލަބަކީ ފްރާންސްގެ ޗެމްޕިއަން ޕީއެސްޖީ އެވެ. ޗެމްޕިއަންސް ލީގަކީ ޕީއެސްޖީ އިން ހާއްސަ އިސްކަމެއް ދީގެން ތައްޔާރުވަމުން އަންނަ މުބާރާތެކެވެ.
މީޑިއާ ރިޕޯޓްތައް ބުނާ ގޮތުން ގަތަރުގެ އޮފިޝަލުން އަންނަނީ ޔުއެފާގެ ގަވާއިދުގައި ހިމެނޭ އެ މާއްދާ ބަދަލުކުރުމާ ގުޅޭ ގޮތުން މަޝްވަރާ ކުރަމުންނެވެ. އެކަން ނުކުރެވުނަސް ޔުނައިޓެޑަށް ޗެމްޕިއަންސް ލީގުގައި ކުޅެވޭނެ އުސޫލެއް އޮތްތޯ ބަލައި، އެކަމަށް ހައްލެއް ހޯދަން އަންނަނީ މަސައްކަތް ކުރަމުންނެވެ.
ގްލޭޒާސް އިން ޔުނައިޓެޑް ވިއްކާލަން ބޭނުންވަނީ ހަ ބިލިއަން ޑޮލަރަށެވެ. އެވަރުގެ އަގެއްދޭން ވެސް ގަތަރުގެ އަމީރު ހުންނެވީ ތައްޔާރަށް ކަމަށް ރިޕޯޓްތައް ބުނެ އެވެ. ޔުނައިޓެޑް ގަތުމުގައި ގަތަރުގެ އިންވެސްޓަރުންނާ ވާދަކުރަން ހުރީ އިނގިރޭސިވިލާތުގެ އެންމެ ބޮޑު އެއް ބިލިއަނަރު ކަމަށްވާ ސާ ޖިމް ރެޗް ކްލިފެވެ. އޭނާ ވަނީ ޔުނައިޓެޑު ގަތުމަށް ގްލޭޒާސް އާއިލާއާ މިހާރު ވެސް މަޝްވަރާ ކުރަމުންނެވެ.
