މާލޭގެ ޗާންދަނީ މަގުގައި ހުރި ޖަލާލުއްދީން މިސްކިތެއްގައި ދިހަ އަހަރުގެ ކުޑަ ފިރިހެން ކުއްޖަކަށް ޖިންސީ ފުރައްސާރަކޮށްގެން ހައްޔަރުކުރި މީހާގެ ބަންދަށް 30 ދުވަހުގެ މުއްދަތެއް ކްރިމިނަލް ކޯޓުން ޖަހައިފި އެވެ.
މި މައްސަލާގައި ބިދޭސީ މީހަކު ހައްޔަރުކުރީ އިއްޔެ އެވެ. އަދި ބަންދާ މެދު ގޮތެއް ނިންމުމަށް މިއަދު ކްރިމިނަލް ކޯޓަށް އޭނާ ހާޒިރުކުރި އެވެ.
"މި މައްސަލައާ ގުޅިގެން ހައްޔަރުކުރި މީހާގެ ބަންދަށް 30 ދުވަސް މިއަދު ވަނީ ދީފައި،" ފުލުހުން މީޑިއާތަކަށް ހިއްސާކުރި މެސެޖްގައިވެ އެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ. އެނގިފައިވާ ގޮތުގައި ހައްޔަރުކުރި ބިދޭސީ މީހާއަކީ އެ މިސްކިތުގައި މަސައްކަތް ކުރާ މީހެކެވެ.
