ގޫގުލްގެ އާޓިފިޝަލް އިންޓެލިޖެންސް (އޭއައި) ޗެޓްބޮޓް "ބާޑް" ލޯންޗްކުރުމަށް ތައްޔާރުވަމުންދާ ކަމަށް އެ ކުންފުނިން ހާމަކޮށްފި އެވެ.
ގޫގުލްގެ ސީއީއޯ ސުންދަރު ޕިޗާއީ ކުރި ބްލޮގް ޕޯސްޓެއްގައި ބާޑްގެ ޓެސްޓު ކުރުންތައް މިހާރު ކުރިޔަށް ދާ ކަމަށް ވަނީ ބުނެފަ އެވެ. އަދި ފާޑު ކިޔުންތައް ބަލާ އިތުރަށް ފުރިހަމަކުރުމަށް ފަހު ކުރިއަށް އޮތް ހަފްތާތަކުގައި އާންމުންނަށް ބޭނުންކުރެވޭ ގޮތަށް ލޯންޗްކުރެވޭނެކަމަށް ބުނެފައިވެ އެވެ.
ބާޑްގައި ބޭނުންކުރާނީ މީގެ ދެއަހަރުކުރިން ގޫގުލް އިން ލޯންޗް ކުރި ލެންގުއޭޖް މޮޑެލް، ލެންގުއޭޖް މޮޑެލް ފޯ ޑަޔަލޮގް އެޕްލިކޭޝަންސް (ލަމްޑާ) އެވެ.
ޕިޗާއީ ބުނެފައިވަނީ ގޫގުލްގެ އަމާޒަކީ ދުނިޔޭގެ އިލްމާ ގޫގުލް އިން ބޭނުންކުރާ ލެންގުއޭޖް މޮޑެލްތަކުގެ ބާރާއި އުފެއްދުންތެރިކަމާއި ގުޅުވާލުން ކަމަށެވެ.
އަދި ބާޑްގެ ޖަވާބުތައް ބިނާ ވާނީ އިންޓަނެޓްގައި ހުރި މައުލޫމާތު ތަކުގެ އިތުރުން މީހުން ދޭ ޖަވާބުތަކުގެ މައްޗަށް ކަމަށް ވެސް ޕިޗާއީ ބުނެފައިވެ އެވެ. ނަމަވެސް ނަހަމަގޮތުގައި ބާޑް ބޭނުންކުރުމުގެ ފުރުސަތު ގޫގުލް އިން ވީހާވެސް ހަނިކުރާނެ ކަމަށް އޭނާ ބުނެފައިވެ އެވެ.
ޕިޗާއި ބުނެފައިވަނީ ގޫގުލްގެ ޗެޓްބޮޓް ޑިޒައިންކުރެވިފައިވަނީ ވީހާވެސް ގިނަބަޔަކަށް އެއްފަހަރާ ބޭނުންކުރެވޭ ގޮތަށް "ލައިޓްވެއިޓް" ކޮށް ކަމަށެވެ.
ގޫގުލް އިން ޗެޓްބޮޓެއް އިއުލާންކޮށްފައިވާ އިރު، މައިކްރޯސޮފްޓް އިން ވަނީ ދާދިފަހުން ދުނިޔޭގައި މަގުބޫލުވި ޗެޓްބޮޓް "ޗެޓްޖީޕީޓީ" 10 ބިލިއަން ޑޮލަރަށް ގަނެފަ އެވެ.
ޗެޓްޖީޕީޓީ އިން ވަނީ ދެ މަސް ތެރޭ 100 މިލިއަން ޔޫޒާސް ހަމަކޮށް އެންމެ އަވަހަށް މި އަދަދު ހަމަކުރި އެޕްގެ މަގާމު ހޯދައިފަ އެވެ.
ޗެޓްބޮޓުތަކަށް މީހުންގެ ސަމާލުކަން ލިބެމުންދާ މިވަގުތުގައި އިތުރު ކުންފުނިތަކުން ވެސް އަންނަނީ އެފަދަ ފީޗާއެއް އެކުންފުނި ތަކުގެ ޕްލެޓްފޯމްއަށް އިންޓަގްރޭޓް ކުރެވޭނެ ގޮތްތައް ހޯދަމުންނެވެ. އެގޮތުން، ފޭސްބުކް ހިންގާ މެޓަ ކުންފުނިން ވެސް ވަނީ ޗެޓްބޮޓަށް ބޭނުންވާ ކޮންޓެންޓް ހޯދުމަށް ބަޒްފީޑް ނިއުސް އާ އެކީ 10 މިލިއަން ޑޮލަރުގެ ކޮންޓްރެކްޓެއް ހަދައިފަ އެވެ.
ހަމައެޔާއެކު ޗެޓްބޮޓްތަކުން ލިބޭ ފައިދާތަކާ މެދު ބައެއް ފަރާތްތަކުން ދަނީ ބަހުސް ވެސް ކުރަމުންނެވެ. އެގޮތުން ބައެއް ތައުލީމީ އިންސްޓިޓިއުޓްތަކުން ދަނީ މިފަދަ ޕްލެޓްފޯމްތަކުގެ ސަބަބުން ދަރިވަރުންނަށް ހަވާލުކުރެވޭ ޕްރޮޖެކްޓްތައް، މަސައްކަތެއް ނުކޮށް ނިންމާލެވޭނެ ކަމަށް ބުނެ އެކަމުގެ ސަބަބުން ދަރިވަރުންގެ ތައުލީމަށް އެޅޭނެ ހުރަސްތަކާއި މެދު ކަންބޮޑުވުން ފާޅުކުރަމުންނެވެ.
