ވިނަރެސް ފްލެޓްތައް ގަތުމަށް ޝަރުތު ހަމަވާ މީހުންގެ ލިސްޓު މުރާޖައާ ކުރުމަށްފަހު ދާއިމީ ލިސްޓު އާންމުކޮށްފި އެވެ.
އެ ފްލެޓްތައް ގަތުމަށް ޝަރުތު ހަމަވާ މީހުންގެ ވަގުތީ ލިސްޓު އެންމެ ފުރަތަމަ އާންމުކުރީ މިދިޔަ ނޮވެމްބަރު މަހު އެވެ. އެ ލިސްޓަށް ހުށަހެޅި ޝަކުވާތައް ހައުސިން މިނިސްޓްރީން ބެލުމަށްފަހު، ލިސްޓު މުރާޖައާކޮށް އާންމުކުރީ މިއަދެވެ.
މުރާޖައާކުރި ލިސްޓާއެކު އެޗްޑީސީން ނެރުނު އިއުލާނެއްގައި ބުނީ، މިހާރު ޝާއިއުކޮށްފައިވާ ލިސްޓުގައި ސީލައިފް، ހިޔާ، އަދި ގުޅީފަޅު ކެޓަގަރީގެ އެއްވެސް ފަރާތެއް ނުހިމެނޭނެ ކަމަށެވެ. އަދި މައި-އެޕްލިކަންޓް އަދި ކޯ-އެޕްލިކަންޓްގެ ގޮތުގައި އެއް ފޯމަށްވުރެ ގިނަ ފޯމު ހުށަހަޅާފައިވާ ފަރާތްތަކަށް ކުރިއަށް ދެވޭނީ ކޮންމެވެސް އެއް ފޯމަކާ އެކު ކަމަށެވެ.
އެޗްޑީސީން ބުނީ ދެމަފިރިން ވަކިން ފޯމު ހުށަހަޅާފައިވީ ނަމަވެސް އެފަދަ ފަރާތްތަކަށް ވެސް ދެވޭނީ އެންމެ ފްލެޓެއް ގަތުމުގެ ފުރުސަތު ކަމަށެވެ. އެހެންކަމުން އެކަން ހައްލު ކުރުމުގެ ފުރުސަތު އެ ފަރާތްތަކަށް ހުޅުވާލާނެ ކަމަށް އެޗްޑީސީން ބުނެ އެވެ.
އެޗްޑީސީން ބުނީ ވިނަރެސް މަޝްރޫއިން އެޕާޓްމަންޓް ގަތުމުގެ ދެން ކުރިއަށް އޮތް މަރުހަލާއަކީ އަލަށް ޝަރުތު ހަމަވެފައިވާ މީހުންގެ މާލީ ގާބިލިއްޔަތުކަން ކަށަވަރު ކުރުމަށް ބޭނުންވާ ލިޔެކިއުން ހަމަކުރުމުގެ މަރުހަލާ ކަމަށެވެ.
އަދި، އެ މަރުހަލާ ނިމުމުން ބުކިން ފީ ނެގުމާއި އެޕާޓްމަންޓް އިހްތިޔާރު ކުރުމުގެ ކަންކަން ކުރިއަށް ގެންދާނެ ކަމަށް ވެސް އެ ކޯޕަރޭޝަނުން ބުނެ އެވެ.
އެޗްޑީސީން ބުނީ، ލީސް-ޓު-އޯނަ އަދި ފުލް ޕޭމަންޓް މޮޑެލް ހިޔާރުކުރި މީހުންގެ މާލީ ގާބިލިއްޔަތުކަން ހުރި މިންވަރު ކަށަވަރު ކުރުމަށް ތިން ވަނަ ފަރާތެއް މެދުވެރިކޮށް އިވެލުއޭޝަން ކުރިއަށް ގެންދާނެ ކަމަށެވެ. އަދި އެ މީހުންނަށް އެޕާޓްމަންޓް ކަށަވަރުވާނީ ހުށަހަޅާފައިވާ ލިޔެކިއުންތަކަށް ބެލުމަށްފަހު، އުސޫލުތަކާ އެއްގޮތަށް މާލީ ގާބިލުކަން ފުރިހަމަވާ ކަމަށް ތިން ވަނަ ފަރާތުގެ އިވެލުއޭޝަނުން ނިންމުމުން ކަމަށެވެ.
އޭގެ އިތުރުން އެޗްޑީސީން ބުނީ ޔޫޒާ މޮޑެލް ހިޔާރު ކުރި މީހުންގެ ބުކިން ދީ ދައްކާ، އެޕާޓްމަންޓް އިހްތިޔާރު ކުރުމުގެ މަރުހަލާ ނިމުމުން މާލީ އިދާރާތަކަށް ހުށަހަޅަންޖެހޭ ލިޔެކިއުންތައް ހިއްސާކުރާނެ ކަމަށެވެ.
އަދި، މި މޮޑެލް ހިޔާރު ކުރި މީހުންނަށް އެޕާޓްމަންޓް ކަށަވަރު ވާނީ މާލީ އިދާރާއަކުން ލޯނު ހަމަޖެހުނު ކަމުގެ އެޗްޑީސީއަށް ހުށަހެޅުމުން ކަމަށް އެ ކޯޕަރޭޝަނުން ބުނެ އެވެ.
