އެންމެ ޒަމާނީ ޓޭންކުތައް ޔޫކްރެއިނަށް ފޯރުކޮށްދޭން އެއްބަސްވުމަށް ފަހު، ހަނގުރާމަ މަތީ ޖެޓުތައް އެ ގައުމަށް ނުފޮނުވާނެ ކަމަށް ޖަރުމަނުވިލާތުގެ ޗާންސެލަރު ވިދާޅުވެއްޖެ އެވެ.
ޖަރުމަނުވިލާތުގެ ނޫހަކަށް ދެއްވި އިންޓަވިއުގައި އޯލާފް ޝޯލްޒް ވިދާޅުވީ ހަނގުރާމަ މަތީ ޖެޓު ނުފޮނުވާނެ ކަމަށާއި ހަމައެކަނި ވިސްނުމަކީ ޖަރުމަނުގައި އުފައްދާ ލެޕަޑް-2 ޓޭންކުތައް ފޮނުވުން ކަމަށެވެ.
އެހެން ނަމަވެސް ޔޫކްރެއިނުން ވަނީ ޖެޓު ފޯރުކޮށްދިނުމަށް ހުޅަނގުގެ ގައުމުތަކަށް ގޮވާލައިފަ އެވެ. އެމެރިކާއިން ބުނީ އެކަމާ މެދު ވަރަށް ފަަރުވާތެރިކަމާ އެކު ވިސްނާނެ ކަމަށެވެ.
މިދިޔަ ބުދަ ދުވަހު ޖަރުމަނުން ނިންމީ ލެޕަޑް-2 14 ޓޭންކު ޔޫކްރެއިނަށް ފޮނުވުމަށެވެ. އެގޮތަށް އެއްބަސްވީ ޔޫކްރެއިނާއި ހުޅަނގުގެ އެހެން ގައުމުތަކުގެ ޕްރެޝަރު ބޮޑުވެގެންނެވެ.
ޖަރުމަނުން ޓޭންކު ފޮނުވަން ނިންމުމާ އެކު އެމެރިކާއިން ވެސް ބުނީ އެ ގައުމުގައި އުފައްދާ އެމް1 އަބްރަމްސް ޓޭންކުތައް ފޮނުވާނެ ކަމަށެވެ.
ޔޫކްރެއިންގެ ޑެޕިއުޓީ ފޮރިން މިނިސްޓަރު އަންދްރީ މެލްނީކް ގޮވާލެއްވީ "ހަނގުރާމަ މަތީ ޖެޓުގެ ކޯލިޝަނެއް" އުފައްދައި ރަޝިއާ ބަލިކުރުމަށެވެ.
އެ ކޯލިޝަނުން އެމެރިކާގެ އެފް-16 އަދި އެފް35 އާއި ޔޫރޯފައިޓާ ޖެޓާއި، ޓޯނެޑޯ އަދި ފްރާންސްގެ ރަފަލޭސް އާއި ސްވިޑަންގެ ގްރިޕެން ޖެޓުތައް ފޯރުކޮށްދޭން އޭނާ ބާރުއެޅުއްވި އެވެ.
ޔޫކްރެއިން ރައީސްގެ އެޑްވައިޒަރު މިކައިލޯ ޕޮޑޯލިޔަކް ވިދާޅުވީ ވަރަށް އަވަހަށް މިސައިލް ވެސް ބޭނުންވާ ކަމަށާއި ގައުމުގެ ދިފާއު ވަރުގަދަ ކުރެވޭނީ ހަތިޔާރު ލިބުމުން ކަމަށެވެ.
