ހޭންޑްބޯލް މޯލްޑިވްސްގެ އޮނޮރަރީ ޕްރެޒިޑެންޓްގެ މަގާމަށް ކުރިން އެސޯސިއޭޝަންގެ ރައީސަކަށް ހުންނެވި، އަހުމަދު އިސްމާއިލް ވަނީ ހަމަޖައްސައިފި އެވެ.
މި މަގާމު އަހުމަަދަށް ދިނުމަށް ނިންމާފައިވަނީ އިއްޔެ ބޭއްވުނު ހޭންޑްބޯލް މޯލްޑިވްސްގެ އާ ހިންގާ ކޮމިޓީގެ ފުރަަތަމަ ބައްދަލުވުމުގަ އެވެ. އެ ބައްދަލުވުމުގައިިވަނީ ހޭންޑްބޯލް އެސޯސިއޭޝަންގެ އަސާސީ ގަވާއިދު ބުނާގޮތުގެ މަތިން، މަގާމުތަކަށް މީހުން އައްޔަނުކޮށްފަ އެވެ.
މޯލްޑިވްސް އޮލިމްޕިކް ކޮމިޓީގެ ނައިބު ރައީސްގެ މަގާމު ފުރުއްވަމުން އަންނަ އަހުމަދަށް ހޭންޑްބޯލް އެސޯސިއޭޝަންގެ އޮނޮރަރީ ޕްރެޒިޑެންޓްގެ މަގާމު އަރުއްވާފައިވަނީ ރާއްޖޭގައި ހޭންޑްބޯލް ކުރިއެރުވުމަށް އަހުމަދު ކޮށްދެއްވި މަސައްކަތްތަކާއި އެ ކުޅިވަރަށް ޖުމްލަކޮށް ކޮށްދެއްވި ހުރިހާ ހިދުމަތްތަކެއްގެ އަގުވަޒަންކުރުމުގެ ގޮތުންނެވެ.
ހޭންޑްބޯލް މޯލްޑިވްސް އަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ދިނުމަށް ކުޅިވަރުގެ ޤައުމީ ކައުންސިލުން 2015 ގައި ނިންމިއިރު، އޭރު ވެސް ހޭންޑްބޯލް ކުރިއެރުވުމުގެ މަސައްކަތުގައި އަހުމަދު އިސްކޮށް ހަރަކާތްތެރިވި އެވެ.
ހޭންޑްބޯލް މޯލްޑިވްސްގެ ފުރަތަމަ ހިންގާ ބައްދަލުވުމަށް ފަހު.
އަހުމަދު، އެންމެ ފުރަތަމަ ހޭންޑްބޯލް އެސޯސިއޭޝަންގެ ރައީސް ކަމާ ހަވާލުވީ 2016 ގަ އެވެ. އެ ގޮތުން، 2016 ގެ ޖުލައި މަހު އޮތް ބައި-އިލެކްޝަންގައި ރައީސް ކަމަށް އަހުމަދު ހަވާލުވެވަޑައިގަތީ އޭރު ރައީސަކަށް ހުންނެވި އިބްރާހިމް އިސްމާއިލް މަގާމުން އިސްތިއުފާ ދެއްވުމުންނެވެ.
އޭގެ ފަހުން 2018 ގެ އިންތިހާބުގައި ވެސް އެސޯސިއޭޝަންގެ ރައީސްގެ މަގާމު އަނެއްކާ އަހުމަދު އިސްމާއިލް ދިފާއުކުރައްވައި، ދައުރެއް އެއްކޮށް ފުރިހަމަކުރެއްވި އެވެ.
ރާއްޖޭގައި މިދިޔަ ހަތް ވަރަކަށް އަހަރަށް ބަލާއިރު، އެއް ކުޅިވަރެއް އެންމެ ބޮޑު ތަރައްގީއެއް ހޯދި، ކުޅިވަރުތަކުގެ ތެރޭގައި ހޭންޑްބޯޅަ ހިމެނެ އެވެ. އެ ގޮތުން، ބައިނަލްއަގުވާމީ ފެންވަރުގެ މެޗުތައް ކުޅެވޭވަރުގެ ކޯޓެއް ރާއްޖޭގެ ހޭންޑްބޯޅަ އަށް ލިބިގެންދިޔައީ، އަހުމަދުގެ ލީޑަޝިޕްގަ އެވެ. މުޅި ރާއްޖެ އަށް ހޭންޑްބޯޅަ ފުޅާކުރުމުގެ އިތުރުން، ބައިނަލްއަގުވާމީ ލެވަލްގައި ރާއްޖޭގެ ގައުމީ ހޭންޑްބޯޅަ ޓީމުތައް ކުރިއެރުން ހޯދަން އަހުމަދުގެ ދައުރުގައި ވަނީ ގިނަ ފުރުސަތުތަކެއް ހޯދައިދީފަ އެވެ.
ކުރިއަށް އޮތް ދައުރުގައި ހޭންޑްބޯލް މޯލްޑިވްސްގެ ރައީސްގެ ޒިންމާ އަދާކުރުމަށް ހަވާލުވެވަޑައިގަތީ، އެންމެ ފަހުން ނައިބު ރައީސަކަށް ހުންނެވި، އަހުމަދު މުޖްތަބާ (މުޖޭ) އެވެ. ހަމައެކަނި ކެންޑިޑޭޓްގެ ގޮތުގައި މި ފަހަރުގެ އިންތިހާބުގައި ވާދަކުރެއްވައި، ފެންނަ ނުފެންނަ ވޯޓަކުން ވެސް ކާމިޔާބު ހޯދި، މުޖޭ ވަނީ މީގެ ކުރިން ހޭންޑްބޯލް މޯލްޑިވްސްގެ ޖެނެރަލް ސެކްރެޓަރީގެ މަގާމު ވެސް ފުރުއްވައިފަ އެވެ.
އިއްޔެގެ ބައްދަލުވުމުގައި މި ދައުރުގައި ހޭންޑްބޯލް އެސޯސިއޭޝަންގެ ޖެނެރަލް ސެކްރެޓަރީ އަކަށް އައްޔަނުކުރީ އަބްދުﷲ އަންވަރު އެވެ. ޑިސިޕްލިނަރީ ކޮމިޓީގެ ޗެއާމަނަކަށް އަބްދުﷲ ސަލީމް ހަމަޖެއްސިއިރު، ކޯޗަސް ކޮމިޝަންގެ ޗެއާޕާސަން އަކީ ކުރީގެ ކުޅުންތެރިޔާ، އައިޝަތު ރީމާ އެވެ. ރެފްރީސް ކޮމިޝަންގެ ޗެއާޕާސަނަކަށް އަހުމަދު ހައިޝަމް ވަނީ ހަމަޖައްސައިފަ އެވެ.
މި އަހަރުން ފެށިގެން 2027އާ ހަމައަށް އޮތް، ހޭންޑްބޯލް މޯލްޑިވްސްގެ އާ ހިންގާ ކޮމިޓީގެ ބައްދަލުވުމުގައި ވަނީ 2023 ވަނަ އަހަރު ހޭންޑްބޯލް އެސޯސިއޭޝަންގެ ކަލަންޑަރު ވެސް ފާސްކޮށްފަ އެވެ. އަދި ހަ ވަނަ އިންޓަ ސްކޫލް ހޭންޑްބޯޅަ މުބާރާތުގެ އޮގަނައިޒިން ކޮމިޓީ ހަމަޖެއްސި އެވެ.
