ސ. ހިތަދޫ އަށް އިއްޔެ ހަވީރު ވެގެން އައިއިރު، ރީނދޫ ކުލައިގެ ހެދުމާއި ޓީޝާޓުގައި، ނަމްބަރު އެކެއް ޖަހާފައިވާ ބޯޑު ތަކާއި ދިދަ ހިފައިގެން ހިރިޔާ ސްކޫލް ސަރަހައްދަށް އެތައް ސަތޭކަ ބަޔަކު ޖަމާވެފައި ތިބީ ރައީސް މުހައްމަދު ނަޝީދު އަށް އޮތް ސަޕޯޓު ދެއްކުމަށް. އެމްޑީޕީގެ ރިޔާސީ ޕްރައިމަރީގައި ނަޝީދަށް ތާއީދު ކުރާ މީހުން ބަނދަރުމައްޗަށް އެއްވެ ތިބީ އޭގެ އިރުކޮޅެއް ކުރިން ބޯކަށް ވެހުނު ވާރެޔާ ތެމިލައިގެނެވެ.
ތިރީސް ހަތް ހާސް މީހުންގެ އާބާދީއެއް އޮތް މި އަތޮޅަކީ ޕްރައިމަރީގެ އިންތިހާބުގައި މާލެ ނަގާފައި ވޯޓުގެ ނަތީޖާ އެންމެ ބޮޑަށް ބަރޯސާ ވާނެ އަތޮޅެވެ. އައްޑޫގެ މުހިންމުކަން އެންމެ ރަނގަޅަށް ވިސްނިވަޑައިގަންނަވާ އެއް ބޭފުޅަކީ ނަޝީދެވެ. އެމްޑީޕީގެ ރިޔާސީ ކެންޑިޑޭޓަކު ހޮވުމަށް ބާއްވާ އިންތިހާބުގެ ކެމްޕެއިނުގައި ނަޝީދު ދަތުރުކުރައްވާ ފަހު މަންޒިލެއްގެ ގޮތުގައި އައްޑޫ ނެންގެވީ ވެސް އެ ސަބަބައްޓަކައި ކަމަށްވުން ގާތެވެ.
އައްޑޫގައި އިއްޔެ ނަޝީދު ވާހަކަ ދައްކަވަމުން އެ ސިޓީއަށް ބައެއް ކަންކަން ކޮށްދިނުމަށް އެމަނިކުފާނު ވައުދުވި އެވެ.
ރައީސް ނަޝީދުގެ ވައުދުތައް
- އަންނަ ނޮވެމްބަރު މަހުން ފެށިގެން މަސް ކިލޯ އަކަށް އެންމެ ދަށްވެގެން 25ރ. ކަނޑައެޅުން
- ގެސްޓް ހައުސް ހަދަން ބޭނުންވާ ފަރާތްތަކަށް ނޮވެމްބަރު މަހު ލުއިލޯނު ދޫކުރުން
- އައްޑޫ ސަރަހައްދީ ބަނދަރު ސަރަހައްދީ ހަބަކަށް ހެދުން
- ގަން އިންޓަނެޝަނަލް އެއާޕޯޓުގެ ހިއްސާ އައްޑޫ ސިޓީ ކައުންސިލަށް ބަދަލުކުރުން
- ލައިޓް އިންޑަސްޓްރިއަލް މަސައްކަތްތަކަށް އައްޑޫ ހުޅުވާލުން
- ކުރިއަށް އޮތް ދެ މަސް ދުވަހުގެ ތެރޭގައި ޝަންގްރިއްލާ ވިލިނގިލި ހުޅުވޭނެ ކަމުގެ އުއްމީދު ދެއްވުން
ރައީސް ނަޝީދު ވިދާޅުވީ އައްޑޫގައި ގެސްޓް ހައުސްތައް ހަދަން 84 ބިމެން ދޫކޮށްފައި އޮތް ނަމަވެސް އެ ބިންތައް ނުހެދި އޮތީ ފައިސާ ނެތުމުގެ ސަބަބަބުން ކަމަށާއި އެކަމަށް ބޭނުންވަނީ 15 މިލިއަން ޑޮލަރު ނުވަތަ 250 މިލިއަން ރުފިޔާ ކަމަށެވެ. ނަޝީދު ވިދާޅުވީ މި އަތޮޅުގެ ރައްޔިތުންގެ އާމްދަނީ އިތުރުވާނީ އެތަންތައް ހެދިގެން ޓޫރިސްޓުން ގެނެވިގެން ކަމަށެވެ.
"މުޅި އައްޑޫގެ އިގްތިސާދަށް ދިރުން ގެނައުމަށް އަޅުގަނޑު މި ދަންނަވަނީ ބޭނުންވަނީ 15 މިލިއަން ޑޮލަރޭ. އާދައިގެ ދިވެހި ވިޔަފާރިވެރިއެއްގެ އެކައުންޓުގައި އެބަހުއްޓޭ އެ އަދަދު. އަޅުގަނޑު ތިޔަބޭފުޅުންނަށް ޔަގީންކަން އަރުވަން އިރާދަ ކުރެެއްވިއްޔާ މި އަހަރުގެ ނޮވެމްބަރު މަހު 85 ގެސްޓްހައުސް ހެދުމަށްޓަކައި ކޮންމެ ގެސްޓްހައުސް އަކަށް ލުއިލޯނު ލިބޭނެ،" ނަޝީދު ވިދާޅުވި އެވެ.
މަސްވެރިކަމާ ބޭހޭ ގޮތުން ވާހަކަ ދައްކަމުން ނަޝީދު ވިދާޅުވީ މަހަށް ރަނގަޅު އަގެއް ނުލިބޭތީ މަސް ދޯނި ފަހަރު ވިއްކަމުން ގެންދާ ކަމަށެވެ. މަހަކު ފަސް ހާސް ރުފިޔާ އާއީ އަށް ހާސް ރުފިޔާ އަށްވުރެ މާ ބޮޑަށް ވެސް ރަނގަޅު އާމްދަނީއެއް މަސްވެރިއަކަށް ލިބެން ޖެހޭނެ ކަމަށް ނަޝީދު ވިދާޅުވި އެވެ.
"އަޅުގަނޑު ތިޔަ ބޭފުޅުންނަށް ޔަގީންކަން އަރުވަން އިރާދަކުރެއްވިއްޔާ ނޮވެމްބަރު މަހު މަހުގެ އަގު 25ރ. އަށް ބަހައްޓާނަން،" ނަޝީދު ޔަގީންކަން ދެއްވި އެވެ.
އައްޑޫ އަތޮޅުގެ ވިލިނގިލީ ނުހުޅުވި އޮތުމާއި ގުޅޭގޮތުން ވާހަކަ ދައްކަވަމުން، ނަޝީދޫ ވިދާޅުވީ އެ ރިސޯޓް ގަނެފައިވާ ކަމަށް ނަޝީދު އަރިހު ވިޔަފާރިވެރިއަކު ދާދިފަހުން ބުނެފައިވާ ކަމަށެވެ. އަދި އެ ވިޔަފާރިވެރިޔާ މަސައްކަތް ކުރަމުން ގެންދަނީ ކުރިއަށް އޮތް ދެ މަސް ދުވަހުގެ ތެރޭގައި އެރަށް ހުޅުވަން ކަމަށް ނަޝީދު ވިދާޅުވި އެވެ.
އައްޑޫ އަށް ސަރުކާރުން އަޅާ ނުލާކަން ފާހަގަ ކުރައްވާ ނަޝީދު ވިދާޅުވީ އެމަނިކުފާނުގެ ސަރުކާރެއްގައި އައްޑޫ އަށް އިސްކަން ދެއްވާނެ ކަމަށެވެ. އެމަނިކުފާނުގެ ރަނިންމޭޓަކަށް ހަމަޖައްސަން ނިންމަވާފައިވަނީ ވެސް އައްޑޫ ޒުވާނެކެވެ.
"އެންމެ ސާފުކޮށް އެނގެން އޮތް ހަގީގަތަކީ ރާއްޖޭގެ ތަރައްގީ ހޯދެން އޮތް އިންޖީނަކީ އައްޑޫ ކަން،" ނަޝީދު ވިދާޅުވި އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މި ޕްރައިމަރީގައި ނަޝީދާއެކު ވާދަ ކުރައްވާނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
