އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު، އެ ޕާޓީގެ ރިޔާސީ ޕްރައިމަރީގައި ވާދަކުރައްވާ އެ ޕާޓީގެ މިހާރުގެ ރައީސް މުހައްމަދު ނަޝީދުއަށް ތާއިދުކުރައްވައި އެމަނިކުފާނުގެ ކެމްޕޭނާ މިއަދު ގުޅިވަޑައިގެންފި އެވެ.
މީގެ ކުރިން ރާއްޖޭގެ ބަންޑާރަ ނައިބުގެ މަގާމުވެސް ފުރުއްވި ޑރ. މުނައްވަރު ނަޝީދުގެ ކެމްޕޭނާ ގުޅިވަޑައިގެންނެވި އިރު، އެބޭފުޅާއަކީ އެމްޑީޕީގެ ފުރަތަމަ ރިޔާސީ ޕްރައިމަރީގައި ނަޝީދުއާ ދެކޮޅަށް ވާދަކުރެއްވި ކެންޑިޑޭޓެކެވެ. އެފަހަރުގެ ޕްރައިމަރީ 68.4 އިންސައްތަ ވޯޓާ އެކު ކާމިޔާބުކުރެއްވީ ނަޝީދެވެ.
ގިނަ ދުވަސްތަކަކަށް ސިޔާސީ މައިދާނުން ނުފެނި ހުންނެވުމަށްފަހު ޑރ. މުނައްވަރު ވަނީ މިދިޔަ އަހަރުގެ ތެރޭގައި ހިނގާދިޔަ ރާއްޖެ އަދި ފޯޅަވަހީގެ ކަނޑުގެ ބޯޑަރު މައްސަލައިގައި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެ ވާހަކަދައްކަވާފަ އެވެ. ފާހަގަކޮށްލެވޭ ގޮތުގައި ނަޝީދުވެސް ވަނީ އެ މައްސަލައިގައި ސަރުކާރުން ގެންގުޅުނު ސިޔާސަތުތަކަށް ފާޑުވިދާޅުވެފަ އެވެ.
ނަޝީދު މިއަދު އައްޑޫއަށް ވަޑައިގެންފާވާއިރު ޑރ. މުނައްވަރުގެ އިތުރުން ކުރީގެ ބަންޑާރަ ނައިބު ދިޔާނާ ސައީދު އަދި ލޯކަލް ގަވަމެންޓް އޮތޯރިޓީ (އެލްޖީއޭ) ގެ ސީއީއޯ އަފްޝަން ވެސް ވަނީ ނަޝީދުގެ ކެމްޕޭން ޓީމުގައި ހިމެނެ އެެވެ.
އެމްޑީޕީގެ ރިޔާސީ ޕްރައިމަރީގެ މި މަހު 28 ގައި ބޭއްވުމަށް ހަމަޖެހިފައިވާއިރު، އައްޑޫއަކީ ނަޝީދުގެ ކެމްޕޭނުގައި ދަތުރުކުރާ ފަހު މަންޒިލެވެ. އެމަނިކުފާނު މިހާރު ވަނީ މި ކެމްޕޭނުގައި ރާއްޖޭގެ ހުރިހާ އަތޮޅަކަށް ދަތުރުކޮށް 70 އަށްވުރެ ގިނަ ރަށަށް ޒިޔާރާތް ކުރައްވާފަ އެވެ.
