ގެދޮރުވެރިޔާ ސްކީމްއާ ގުޅޭ ގޮތުން އެއްވެސް މުއާމަލާތެއް ކުރުމަށް ފޯނުން ނުގުޅާނެ ކަމަށާއި މިނިސްޓަރީން ކަމަށް ބުނެ އެކި މައުލޫމާތު ހޯދަން ގުޅާ މީހުންނަށް ސަމާލުވުމަށް ހައުސިން މިނިސްޓަރީން އިލްތިމާސްކޮށްފި އެވެ.
އެ މިނިސްޓަރީން މިއަދު ކުރި އިއުލާނެއްގައި ބުނީ އެ މިނިސްޓަރީން ކުރިއަށް ގެންދާ ގެދޮރުވެރިޔާ ސްކީމާ ގުޅޭ ގޮތުން ކަމަށް ބުނެ، ބައެއް ފަރާތްތަކަށް ގުޅައި ފޯމާއެކު ހުށަހަޅަންޖެހޭ ބައެއް ލިޔެކިޔުންތައް ހުށަނާޅައި ހުރިކަމަށް ވިސްނައިދީގެން މީހުންގެ ޒާތީ މައުލޫމާތު ހޯދަމުންދާ މައްސަލައެއް އެ މިނިސްޓަރީގެ ސަމާލުކަމަށް އައިސްފައިވާ ކަމަށެވެ.
މިނިސްޓަރީގެ ނަމުގައި ގުޅަމުން ދަނީ 9349119 ނަންބަރުން ކަމަށް އެ އިއުލާނުގައި ވެއެވެ. އަދި އެ ފަރާތަކުން ގުޅާފައި ގެދޮރުވެރިޔާ ސްކީމަށް ފޯމު ހުށަހެޅިއިރު، މަދުވާ ކަމަށް ބުނާ ލިޔުންތައް އަލުން ހުށަހެޅުމަށް ބުނާ ކަމަށް އެ މިނިސްޓަރީން ބުންޏެވެ.
އޭގެއިތުރުން ހައުސިން މިނިސްޓަރީގެ ނަމުގައި މީހުންނަށް ގުޅަމުންދާ ނަންބަރަށް ގުޅުމުން ހައުސިން މިނިސްޓަރީގެ ރިސެޕްޝަނަށް ފޯނު ޑައިވާޓު ވާގޮތް ހަދާފައިވާ ކަމަށް ވެސް އެ އިއުލާނުގައި ވެއެވެ.
އެހެން ނަމަވެސް އެ ސްކީމާ ގުޅޭ ގޮތުން މިހާތަނަށް އެއްވެސް މުއާމަލާތެއް ހައުސިން މިނިސްޓަރީގެ ފަރާތުން އެއްވެސް މީހަކާ ކޮށްފައި ނުވާނެ ކަމަށާއި އަދި ކުރިއަށް އޮތް ތަނުގައި ވެސް އެ ސްކީމާ ގުޅިގެން ކުރަންޖެހޭ އެއްވެސް މުއާމަލާތެއް ފޯނު މެދުވެރިކޮށް އެ މިނިސްޓަރީން ނުކުރާނެ ކަމަށް އެ އިއުލާނުގައި ބުނެފައި ވެއެވެ.
ސަރުކާރުގެ އެކި ވުޒާރާތަކާއި ބޭންކުތަކުގެ ނަމުގައި މީހުންނަށް ގުޅައި ޒާތީ މައުލޫމާތު އެއްކޮށްގެން ފޭރުމާއި ވައްކަން ކުރުމުގެ ކުށްތައް ވަނީ މިފަހަކަށް އައިސް ވަރަށް ބޮޑަށް އިތުރުވެފަ އެވެ.
މިފަދަ މައްސަލަތަކަށް އެދެވޭ ވަރުގެ ހައްލެއް މިއަދާ ހަމައަށް ވެސް ހޯދިފައި ނުވާއިރު، އެންމެ ރައްކާތެރި ގޮތަކީ އާންމު ރައްޔިތުން މިފަދަ ފޯނު ކޯލުތަކަށް ސަމާލުވެ ތިބުން ކަމަށް ކަމާބެހޭ މާހިރުން ނަސޭހަތްތެރިވެ އެވެ.
