އެއްބުރުން ކާމިޔާބުވާނެ، ހޮރުތަކުން އެމްޑީޕީ މީހުން ނުކުމެ އެބަ ޖަމާވޭ: ނަޝީދު

ގދ. ތިނަދޫގައި ރައީސް މުހައްމަދު ނަޝީދު ވާހަކަ ދައްކަވަނީ - ފޮޓޯ: ސިމްވާ ޓްވިޓާ

ގދ. ތިނަދޫގައި ރައީސް މުހައްމަދު ނަޝީދު ވާހަކަ ދައްކަވަނީ - ފޮޓޯ: ސިމްވާ ޓްވިޓާ

ރައީސް އިބްރާހީމް މުހައްމަދު ސޯލިހުގެ ސަރުކާރާ މެދު ހިތްހަމަނުޖެހިފައި ތިބި އެމްޑީޕީގެ ސަޕޯޓަރުން "ހޮރުތަކުން ހިނި ނުކުންނަ މިސާލުން" ނުކުމެ ޖަމާވާން ފަށާފައިވާ ކަމަށް، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރިޔާސީ ޕްރައިމަރީގެ ކެމްޕޭނަށް، ހުވަދު އަތޮޅުގެ ރަށްތަކަށް ރައީސް ނަޝީދު ކުރައްވަމުން ގެންދަވާ ދަތުރުފުޅުގައި ގދ. ތިނަދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން އަނެއްކާ ވެސް ތަކުރާރު ކުރެއްވީ ރައީސް ސޯލިހަށް ރިޔާސީ އިންތިހާބު ކާމިޔާބު ނުވާނެ ވާހަކަ އެވެ.

"39،000 މީހުން ވަކިކޮށްފި މި ޕާޓީން، އޭގެ ތެރެއިން ވަރަށް ގިނަ މީހުނަކީ މި ޕާޓީ އުފެއްދުމުގައި ބައިވެރިވި މީހުން. އެ މީހުން ބުނާ ގޮތް ހަދާ މީހުނާއެކު ގާތްގަނޑަކަށް 70،000 އެއްހާ މީހުން އެބަ އުޅޭ، ބާކީ ތިބި 50،000 އެއްހާ މީހުންގެ ބައިކުޅަބައި ސަރުކާރަށް އެބަ ނުރުހޭ،" ރައީސް ސޯލިހަށް އިންތިހާބު ނާކާމިޔާބުވާނެ ކަމަށް ނަޝީދު ޖައްސަވާ ހިސާބު މިރޭ ވެސް ތަކުރާރު ކުރެއްވި އެވެ.

Advertisement

އެމްޑީޕީގެ ރިޔާސީ ޕްރައިމަރީގައި ރައީސް ސޯލިހާ ދެކޮޅަށް ނަޝީދު ނުކުންނެވުމުން، ސަރުކާރާ މެދު ނުރުހެ މާޔޫސްވެފައި ތިބި އެމްޑީޕީގެ މެންބަރުން "މަޑުމަޑުން" ޖަމާވަމުން އަންނަ މަންޒަރު ކޮންމެ ރަށަކުން ވެސް ފެންނަމުން އަންނަ ކަމަށް ނަޝީދު ވިދާޅުވި އެވެ.

"އަޅުގަނޑާއެކު މި ބޮޑު އެމްޑީޕީ އެއްކޮށް ތެދުވާނެ. އަޅުގަނޑަށް އެ މަންޒަރު އެބަ ފެނޭ. މުޅި ރާއްޖޭގެ އެކި ކަންކޮޅުތަކުން ހިނިހޮރުތަކުން ހިނި ނުކުންނަ މިސާލުގައި އެމްޑީޕީ މެންބަރުން ފަތިފައްޗަށް ނުކުމެ ޖަމާވޭ. އަޅުގަނޑަށް އެބަ ކޮންމެ ރަށަކުން މި މަންޒަރު އެބަ ފެނޭ،" ނަޝީދު ވިދާޅުވި އެވެ.

ރައީސް ނަޝީދު ވިދާޅުވީ، މީގެ ކުރިން ވެސް ކޮންމެ އިންތިހާބަކު އެމްޑީޕީގެ މަގުބޫލުކަން އައީ އިތުރުވަމުން ކަމަށެވެ. އެމްޑީޕީގެ ރިޔާސީ ކެންޑިޑޭޓަކަށް ނަޝީދު ނުކުންނަވައި، އެމްޑީޕީގެ ސިޔާސަތުތައް އަލުން ހުށަހަޅަން ފެށުމުން އެމްޑީޕީއަށް އިންތިހާބު ކާމިޔާބު ވާނެ ކަމަށް އެމަނިކުފާނު ވިދާޅުވި އެވެ.

"އަޅުގަނޑުމެންގެ ވާދަވެރިން ވެސް އަޅުގަނޑުމެންގެ ސިޔާސަތުތަކާ މެދު މިހާރު ހިތްހަމަޖެހޭ، އަޅުގަނޑަށް ވަރަށް ބޮޑު އުންމީދެއް އެބަ އޮތް، އަޅުގަނޑާއެކު، އިރާދަކުރެއްވިއްޔާ މި 2023 ވަނަ އަހަރު އޮންނަ ރިޔާސީ އިންތިހާބު އެމްޑީޕީއަށް އެއްބުރުން ކާމިޔާބު ކުރެވޭނެ،" ނަޝީދު ވިދާޅުވި އެވެ.

ރާއްޖޭގައި މިހާތަނަށް ބޭއްވި ތިން ރިޔާސީ އިންތިހާބުގެ ތެރެއިން ދެ ރިޔާސީ އިންތިހާބުގައި ވާދަކުރެއްވި ނަޝީދު އެ ޕާޓީއަށް "އެއްބުރުން" އިންތިހާބު ކާމިޔާބުވާނެ ކަމަށް ވިދާޅުވިއިރު، އެއީ ފެހި ގާނޫނު އަސާސީގެ ދަށުން ރިޔާސީ އިންތިހާބު ބާއްވަން ފެށި ފަހުން އެއްވެސް ޕާޓީއަކަށް ހާސިލްކުރެވިފައިވާ ކަމެއް ނޫނެވެ.

2008 އަދި 2013 ގެ ރިޔާސީ އިންތިހާބު ކާމިޔާބު ކުރީ ކޯލިޝަނެއްގެ ތާއީދު އޮތް ކެންޑިޑޭޓުންނެވެ. އެއީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓެވެ. 2018 ގައި ދެ ކެންޑިޑޭޓުން ވާދަކުރީތީވެ ދެވަނަ ބުރެއް ބާއްވަން ނުޖެހުނެވެ.

ގާނޫނު އަސާސީގައި އޮންނަ ގޮތުން ރިޔާސީ އިންތިހާބު ކާމިޔާބު ކުރެވޭނީ 50 އިންސައްތަ އަދި އިތުރު އެއް ވޯޓު ލިބިގެނެވެ. އެ މިންވަރަށް ފުރަތަމަ ބުރުގައި އެއްވެސް ކެންޑިޑޭޓަކަށް ވޯޓު ނުލިބޭނަމަ، އެންމެ ގިނަ ވޯޓު ލިބުނު ދެ ކެންޑިޑޭޓުންނާއެކު ދެވަނަ ބުރެއް ބާއްވަން ޖެހެ އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox