ރައްޔިތުންގެ އުއްމީދުތަކާ އެއްގޮތަށް ށ. ނަލަންދޫ ޓޫރިސްޓް ރިސޯޓެއްގެ ގޮތުގައި ތަރައްގީ ކުރެވޭނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހު މިއަދު ދެއްވައިފި އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ށ. މިލަންދު އަށް ވަޑައިގެން ރައީސް ވަނީ އެ ރަށުގެ ރައްޔިތުން އެންމެ ބޭނުންވެފައި ތިބި ދެ މަޝްރޫއުއާ ގުޅޭ އުއްމީދީ މައުލޫމާތުތަކެއް ދެއްވައިފަ އެވެ.
އެއީ ހޮސްޕިޓަލާއި ނަލަންދޫ ރިސޯޓެއްގެ ގޮތުގައި ތަރައްގީ ކުރުމުގެ މަޝްރޫއެވެ.
މިލަންދޫގެ ހޮސްޕިޓަލް މަޝްރޫއު ބިޑަށް ހުޅުވާލުމަށް ވަނީ ނިންމައިފަ އެވެ. ކުރީގެ ސަރުކާރުން ކުއްޔަށް ދީފައިވާ ނަލަންދޫ ރިސޯޓެއްގެ ގޮތުގައި ތަރައްގީ ނުކުރެވި މަސައްކަތް އޮތީ ހުއްޓިފަ އެވެ.
ރައީސް ސޯލިހު ވިދާޅުވީ ކުރީގެ ސަރުކާރުން ވިސްނުންތެެރިކަމާއި, ރޭވުންތެރިކަމާ ނުލާ ހަމަ ހުރެފައި ރަށްތައް ކުއްޔަށް ދީފައިވާ ކަމަށެވެ. އެގޮތަށް ކުރީގެ ރައީސް އަބްދުﷲ ޔާމީންގެ ސަރުކާރުން ގާނޫނާ ގަވައިދާ ހިލާފަށް ކޮށްފައިވާ ކަންތައްތަކުން އަދިވެސް އަރައި ނުގަނެވިގެން އުޅެން ޖެހިފައިވާ ކަމަށް ރައީސް ސޯލިހު ވިދާޅުވި އެވެ.
ރައީސް ވިދާޅުވީ ނަލަންދޫ އަށް ކޮށްފައިވާ އިންވެސްޓްމަންޓުގެ އަގު ކުރެވިފައިވާ ކަމަށާއި, ދެ ފަރާތުން ވާހަކަ ދެކެވި, ލަސްތަކެއް ނުވެ ރަނގަޅު އެއްބަސްވުމަކަށް އާދެވޭނެ ކަމަށެވެ. މި ސަރުކާރުން ކަން ކުރަނީ ހަމަ ހުރެފައި ނޫން ކަމަށާއި, ހަމަ ހުރެފައި ބަދަލެއް ދިނުމަކާ ނުލާ ރަށް އަތުނުލެވޭނެ ކަމަށް އެ މަނިކުފާނު ވިދާޅުވި އެވެ.
"އެތަނުގައި [ނަލަންދޫގައި] ކޮށްފައި ހުރި މަސައްކަތުގެ އަގުކޮށްފައި ދޭންޖެހޭ ބަދަލު ދީފައި އެ ރަށް ޓޫރިޒަމަށް ބަދަލު ކުރުން އެއީ އަޅުގަނޑުމެން ކަން ކުރާނެ ގޮތަކީ،" ކުރީ ސަރުކާރުން ވިސްނުންތެރިކަމާ ނުލާކޮށްފައި ހުރި ކަންކަމުގެ ސަބަބުން މި ސަރުކާރުން އެކި ފަރާތްތަަކަށް 30-40 މިލިއަން ޑޮލަރުން ބަދަލު ދޭން ޖެހޭކަން ފާހަގަކުރައްވަމުން ރައީސް ވިދާޅުވި އެވެ.
ނަލަންދުއަށް އިންވެސްޓް ކުރުމަށް އިންވެސްޓަރުން ވެސް ތައްޔާރަށް ތިބި ކަމަށް ރައީސް ސޯލިހު ފާހަގަ ކުރެއްވެވި އެވެ.
މި ވެރިކަމުގެ ފަސް އަހަރު ނިމިގެންދާއިރު މި ރަށް [ނަލަންދޫ] އޮންނާނީ ޓޫރިޒަމަށް ތައްޔާރުވެފައި
ސަރުކާރާއެކު އެއްބަސްވުމެއް ހަދާފައިވާތީ ދޭންޖެހޭ ބަދަލެއް ދޭނެ ކަމަށާއި އެއީ އެއްވެސް ރައްޔިތަކު ބާކީކޮށް, އެކަހެރިކޮށްނުލަން ކަމަށް ރައީސް ސޯލިހު ވިދާޅުވި އެވެ.
މިލަންދޫ ދާއިރާގެ ރައްޔިތުންނާ މުހާތަބު ކުރައްވާ ރައީސް ވިދާޅުވީ މި ސަރުކާރުން އެ ދާއިރާއަށް 236 މިލިއަން ރުފިޔާ ހަރަދުކޮށްފައިވާ ކަމަށެވެ. އެގޮތުން މިލަންދުއަށް 106 މިލިއަން, ނަރުދުއަށް 30 މިލިއަން އަދި ފީވަކަށް 100 މިލިއަން ރުފިޔާ ހޭދަކޮށްފައިވާ ކަމަށް އެ މަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ ފީވަކަށް ވެފައިވާ ވައުދުތަކުގެ ތެރެއިން ނުނިމި އޮތީ މޫދަށް އެރޭ ސަރަހައްދެއް ގާއިމްކުރުމުގެ މަސައްކަތް ކަމަށެވެ. އެ މަސައްކަތް ވެސް ކޮށްދެއްވާނެ ކަމުގެ ޔަގީންކަން އެ މަނިކުފާނު ދެއްވި އެވެ.
ށ. މިލަންދޫ އެމްޑީޕީ ހަރުގެ; ހުރިހާ ވައުދުތަކެއް ފާރުތަކުގައި ހުރި ޕޯސްތަރުންތަކުން ފެންނާނެހެން އިންތިޒާމު ހަމަޖެއްސި -- ފޮޓޯ: އެމްޑީޕީ
ރައީސް މިއަދު މިލަންދުއަށް ވަޑައިގެންނެވިއިރު, އެ ރަށުގެ އެމްޑީޕީ ހަރުގޭގައި ވަނީ އެމަނިކުފާނު ވެވަޑައިގެންނެވި ވައުދުތައް ޕްރިންޓުކޮށް ޕޯސްޓަރުތައް ހަރުކޮށްފަ އެވެ. އެ ބޯޑުގައި ކޮންމެ މަޝްރޫއެއް ގޮސްފައިވާ ހިސާބު ފާހަގަކޮށްފައިވާއިރު, އެރަށުގެ ރައްޔިތުން އެންމެ ބޮޑަށް އުއްމީދު ކުރާ ނުނިމިހުރި ދެ މަޝްރޫއުގެ ކުރެހުން ބޮޑުކޮށް ޕޯޑިއަމްގެ ދެ ފަރާތުގައި ހަރުކޮށްފައި ހުއްޓެވެ.
