މިއުނިކް (ޖެނުއަރީ 19) - އަނިޔާގެ ސަބަބުން ބަޔާން މިއުނިކްގެ ޖަރުމަނުގެ ގޯލްކީޕަރު މެނުއަލް ނޯޔާ އަށް ސީޒަން ނިމިފައިވާއިރު، އޭނާ ނެތުމުން ޓީމަށް ދިމާވެފައިވާ ފެންވަރު ރަނގަޅު ގޯލްކީޕަރު މަދުވުމުގެ މައްސަލަ އަށް ހައްލެއް ހޯދަން ބަޔާނުން ސްވިޒަލެންޑްގެ ކީޕަރު ޔެން ސޮމާ ގެންނަން އެއްބަސްވެއްޖެ އެވެ.
ސްކީ ކުރުމުގެ ޓުއާއެއްގައި އުޅެނިކޮށް، ނޯޔާ، 36، ފައި ބިންދައިގެން ގޮސް، އޭނާ ވަނީ އޮޕަރޭޝަނެއް ކޮށްފަ އެވެ. މި ސީޒަނުގައި ނޯޔާ އަލުން ދަނޑަށް އެނބުރި ނާންނާނެކަން ވަނީ ޔަގީންވެފަ އެވެ. އެހެންވެ، ސީޒަނުގެ ބާކީ އޮތް މުހިންމު ބަޔަށް ފެންވަރު ރަނގަޅު ކީޕަރެއް ހޯދަން ބަޔާނުން އައީ މަސައްކަތް ކުރަމުންނެވެ.
ނޯޔާގެ އަނިޔާއާ އެކު، ބަޔާނުން ފެންވަރު ރަނގަޅު އާ ކީޕަރެއް ހޯދަން ބޭނުންވީ، އެ ޓީމުގެ ދެ ވަނަ ކީޕަރަކަށް ހުރި ސްވެން އުލްރިއޭއާ މެދު ބަޔާންގެ ކޯޗު ހޫލިއަން ނާގަލްސްމަން އަށް އިތުބާރު ނެތުމުންނެވެ.
ސެވިއްޔާ އަށް ކުޅޭ މޮރޮކޯގެ ކީޕަރު ޔާސީން ބޯނޯ އާއި އެސްޓަން ވިލާގައި ހުރި އާޖެންޓީނާގެ ގޯލްކީޕަރު، އެމިލިއާނޯ މާޓީނޭޒަށް ވެސް ބަޔާނުން ކޮންމެ ވެސް ވަރަަކަށް ފާރަލި ނަމަވެސް އެންމެ ފަހުން ބަޔާނުން ނިންމީ ޖަރުމަނުގެ ބޮރޫޝިއާ މުންޗެންގްލަޑްބެކަށް ކުޅޭ ސްވިޒަލެންޑް ގައުމީ ޓީމުގެ ސޮމާ ގަންނާށެވެ. އެ ގޮތުން، ސޮމާ، 34، ގެ ސޮއި ހޯދަން ބަޔާނުން 10 މިލިއަން ޑޮލަރުގެ ފީއެއް ދައްކާނެ ކަމަށް ރިޕޯޓްތައް ބުނެ އެވެ.
ސްވިޒަލެންޑްގެ ބާސެލް ދޫކޮށް، 2014 ވަނަ އަހަރު މުންޗެންގްލަޑްބެކަށް ބަދަލުވި، ސޮމާ ހޯދަން ބަޔާނުން ފުރަތަމަ ކުރި ތިން ބިޑެއް ވަނީ އަނބުރާ ފޮނުވާލައިފަ އެވެ. އެކަމަކު، ސޮމާ ވެސް ކެރިއަރުގައި އާ ޗެލެންޖެއް ނަގަން ބޭނުންވާތީ، މުންޗެންގްލަޑްބެކް އިން ނިންމީ ގޮތްދޫކޮށް، އެ ކްލަބަށް ގިނަ މެޗުތަކެއްގައި މޮޅު ކުޅުމެއް ދައްކައި، ކާމިޔާބު ހޯދަން އެހީތެރިވި ސޮމާ އެދޭ ގޮތަށް ކަންތައްތައް ކޮށްދޭށެވެ.
މި ސީޒަނުގައި ބަޔާނާއި މުންޗެންގްލަޑްބެކުން އޮގަސްޓް މަހު ކުޅުނު މެޗު 1-1 އިން އެއްވަރުވިއިރު، އެ މެޗުގެ ތަރި އަކީ ސޮމާ އެވެ. ސޮމާ ވަނީ އެ މެޗުގައި ބަޔާނުން ފޮނުވާލި 19 ހަމަލާއެއް ހުއްޓުވައި، ޖަރުމަނު ލީގުގެ އެއް މެޗެއްގައި އެންމެ ގިނަ ބޯޅަ ހުއްޓުވި ކީޕަރުގެ ރެކޯޑް ހަދައިފަ އެވެ.
ޖަރުމަނުގެ ބައެއް މީޑިއާ ރިޕޯޓްތައް ބުނާގޮތުން، ފީފާ ވޯލްޑް ކަޕްގެ ބްރޭކަށް ފަހު، މާދަމާރޭ ޖަރުމަނުގެ ލީގުގެ ކުޅުން އަލުން ފަށާއިރު، ބަޔާނުން ލައިޕްޒިިގާ ކުޅޭ މެޗުގައި ވެސް ސޮމާ ފެނުމުގެ ފުރުސަތު އެބައޮތެެވެ.
