ރާއްޖޭގެ އެންމެ ދުވަސްވީ އެއް ހޮސްޕިޓަލް، އެޑީކޭއިން ހައިޕާބެރިކް ޓުރީޓުމަންޓުގެ ހިދުމަތް އިއްޔެ ދޭން ފަށައިފި އެވެ.
މިއީ މި ހިދުމަތް ރާއްޖޭގެ ހޮސްޕިޓަލަކަށް ތައާރަފު ކުރެވުނު ފުރަތަމަ ފަހަރެވެ. ހައިޕާބެރިކް ޓުރީޓުމަންޓުގެ ހިދުމަތް އެ ހޮސްޕިޓަލުގައި ދެމުންދާނީ ޑީކޮމްޕުރެޝަން ޗެމްބަރުގެ ދެ ސިސްޓަމް ބޭނުން ކޮށްގެންނެވެ.
އެކަމަށް ހާއްސަކޮށް އޭޑީކޭގައި ބޭއްވި ރަސްމިއްޔާތެއްގައި އެ ހިދުމަތް ރަސްމީކޮށް ތައާރަފުކޮށްދެއްވީ ޓުއަރިޒަމް މިނިސްޓަރު ޑރ. އަބްދުﷲ މައުސޫމް އެވެ. އެ ރަސްމިއްޔާތުގައި ޕަޑީއިން މިސަރަހައްދަށް ކަނޑައަޅާފައި ހުންނަ މެނޭޖަރާއި ޑައިވިން ދާއިރާގައި މަސައްކަތް ކުރާ ބައެއް ފަރާތްތަކުން ވެސް ބައިވެރިވި އެވެ.
ރަސްމިއްޔާތުގައި ބައިވެރިވެލެއްވި މެހެމާނުންނާއި އޭޑީކޭގެ ބައެއް މުވައްޒަފުން -- ފޮޓޯ: އިޔާން / އަދަދު
އެ ރަސްމިއްޔާތުގައި ވާހަކަ ދައްކަވަމުން އޭޑީކޭގެ ޗީފް މެޑިކަލް އޮފިސަރު އަދި ކުޑަކުދިންގެ ހާއްސަ ޑޮކްޓަރު އަބްދުﷲ ނިޔާފް ވިދާޅުވީ އެ ހިދުމަތް އޭޑިކޭއަށް ތައާރަފު ކުރީ ފީނުމުގެ ތެރޭގައި ޑީކޯވާ މީހުންގެ އަދަދު އިތުރުވެގެން ނޫން ކަމަށާއި މަދުން ނަމަވެސް ދިމާވާ އެފަދަ ހާލަތެއްގައި އެންމެ ފުރިހަމަ ފަރުވާ ބަލި މީހާއަށް ފޯރުކޮށްދިނުމުގެ މަގުސަދުގައި ކަމަށެވެ.
އަދި ހޮސްޕިޓަލެއްގައި މި ހިދުމަތް ދެވެން ފެށުމަކީ ވަރަށް ބޮޑު ކުރިއެރުމެއް ކަމަށާއި މިކަމުގެ ސަބަބުން ބަލި މީހުންނަށް ފަރުވާ ދިނުމުގައި ބޮޑެތި ފަސޭހަތަކެއް ލިބިގެންދާނެ ކަމެއް ކަމަށް ވެސް އޭނާ ވިދާޅުވި އެވެ.
"މީގެ ކުރިން އަޅުގަނޑުމެން ޖެހެނީ އެނދުމަތިކޮށްފައި ތިބޭ ބަލި މީހުން ގޮވައިގެން ޗެމްބަރެއް ހުންނަ ރިސޯޓަކަށް [ކަނޑުދަތުރު ކޮށްފައި] ދާން، ބައެއް ޕޭޝަންޓުންނަކީ ހޮސްޕިޓަލުގައި ފަރުވާ ދޭން ޖެހޭ މީހުން،" ނިޔާފް ވިދާޅުވި އެވެ.
އޭނާ ވިދާޅުވީ އެގޮތަށް ކުރާ ދަތުރުތަކަކީ ބަލި މީހާއަށް ރައްކާތެރި ދަތުރުތަކެއް ނޫން ކަމަށާއި ރާއްޖޭގައި ޗެމްބަރުތައް ގާއިމުކޮށްފައި ހުރި ރިސޯޓުތަކުގައި ބަލި މީހުންނަށް ފަރުވާދިނުމަށް އެކަށީގެންވާ ވަރުގެ ވަސީލަތްތަކެއް ނުހުންނަ ކަމަށެވެ.
އިއްޔެގެ ރަސްމިއްޔާތުގައި ޑރ. އަބްދުﷲ ނިޔާފް ވާހަކަދައްކަވަނީ -- ފޮޓޯ: އިޔާން / އަދަދު
ހައިޕާބެރިކް ޓުރީޓުމަންޓަކީ ގިނަ އަދަދަކަށް މެޑިކަލް ކުއަލިޓީގެ ވައި ޗެމްބަރު ތެރެއަށް ދޫކޮށް ޕުރެޝަރައިޒް ކޮށްގެން 100 ޕަސެންޓު އޮކްސިޖަން ދެމުން ދޭ ޓުރީޓުމަންޓެކެވެ. އާންމުކޮށް މި ހިދުމަތް ދެނީ ކަނޑު އަޑިއަށް ފީނަން ގޮސް އުޅޭއިރު ދިމާވާ ޑީކޮމްޕުރެޝަން ސިކްނަސްއަށް ފަރުވާ ދިނުމަށެވެ.
ޑީކޮމްޕުރެޝަން ސިކްނަސްއަކީ ކަނޑު އަޑީގައި ފުޅި ބޭނުންކޮށްގެން ނޭވާލާއިރު، ލޭގެ ތެރެއަށް ގިރޭ އޮކްސިޖަންއާއި ނައިޓުރޮޖެން ނޭވާލާ ނިޒާމުގެ ތެރެއިން ބޭރުވާނެ ފުރުސަތު ނުލިބޭހައި އަވަހަށް މައްޗަށް އެރުމުގެ ސަބަބުން ލޭގެ ތެރޭގައި ހުންނަ ނައިޓުރޮޖެން ނުވަތަ އޮކްސިޖެން ވައިބޮކިތަކަކަށް ބަދަލުވެ ލޭހޮޅި ބެދުން ފަދަ މައްސަލަތައް ކުރިމަތިވުމުން ދިމާވާ ހާލަތެވެ.
ޑީކޮމްޕުރެޝަން ސިކްނަސް ނުވަތަ ޑީކޯ ވުމުގެ މައްސަލައިގެ އިތުރުން ވެސް މި ޓުރީޓުމަންޓު ވަރަށް ގިނަ އެހެން ބަލިތަކަށް ފަރުވާދިނުމަށް ބޭނުން ކުރެވޭ ކަމަށް ޑރ. ނިޔާފް ވިދާޅުވި އެވެ.
އެގޮތުން ހަކުރުބަލި ފަދަ ބަލިތަކުގެ ސަބަބުން ފަސޭހަ ނުވެ ހުންނަ ބޮޑެތި ފާރުގަނޑުތަކަށް ފަރުވާ ދިނުމަށާއި ލޮލާ ގުޅިފައި ހުންނަ ލޭހޮޅިއެއް ކުއްލިއަކަށް ބެދިގެން ލޮލުގެ ފެނުން ގެއްލުމާއި ފިހިގެން ހަމުގެ ފުންމިނަށްވާ އަނިޔާތަކަށް ފަރުވާދިނުމަށް ވެސް ހައިޕާބެރިކް ޓުރީޓުމަންޓު ބޭނުންކުރެވޭ ކަމަށް އޭނާ ވިދާޅުވި އެވެ.
އޭގެއިތުރުން ޑރ. ނިޔާފް ވިދާޅުވީ ކަށީގައި އަށަގަންނަ ޖަރާސީމެއްގެ ސަބަބުން އިންފެކްޝަން ނައްތާލަން ދަތި ހާލަތްތަކުގައާއި އޮޕަރޭޝަނެއް ކޮށްގެން ވާސިލު ނުވެވޭ ސިކުނޑީގެ ފުން ހިސާބެއްގައި ޖަރާސީމެއްގެ ސަބަބުން އިންފެކްޝަނެއް އުފެދި ދޮސް ލައިފި ނަމަވެސް އެ ޗެމްބަރުތަކުން ފަރުވާ ދެވޭނެ ކަމަށެވެ.
އޭޑީކޭގައި ބެހެއްޓި ހައިޕާބެރިކް ޗެމްބަރާ ބެހޭ މއަުލޫމާތު މިނިސްޓަރު މައުސޫމް އަށް ދެއްވަނީ -- ފޮޓޯ: އިޔާން / އަދަދު
ޑީކޮމްޕުރެޝަން ސިކުނަސް ނުވަތަ ޑީކޯ ވުމުގެ މައްސަލައަކީ ދިވެހިރާއްޖޭގައި ފީނާ މީހުންނަށް ދިމާވާ އެންމެ ބޮޑު މައްސަލަ އެވެ. ތަފާތު ވައްތަރުތަކުގެ މަސްވެރިކަމާއި ފަތުރުވެރިކަމުގެ ސިނާއަތުގައި އުޅޭ މީހުންނަށް ވެސް މި މައްސަލަ ކުރިމަތިވެ އެވެ.
އިއްޔެގެ ރަސްމިއްޔާތުގައި ޑައިވިން ކޮމިއުނިޓީގެ ފަރާތުން ވަނީ އެޑީކޭގައި މި ހިދުމަތް ދޭން ފެށުމުން އެކަމަށްޓަކައި އެ ހޮސްޕިޓަލުގެ ވެރިންނަށް ވަރަށް ބޮޑަށް ޝުކުރު އަދާ ކޮށްފަ އެވެ. އަދި މިފަދަ ހިދުމަތެއް ލިބޭ ހޮސްޕިޓަލެއް ރާއްޖޭގައި ހުރުން އެއީ ބޭރުން ޒިޔާރަތް ކުރާ ފަތުރުވެރިންނަށް ވެސް ލިބިގެންދާން އިތުރު ހިތްހަމަޖެހުމެއް ކަމަށް އެ ކޮމިއުނިޓީން ފާހަގަ ކުރި އެވެ.
