ޗައިނާގެ އިރުމަތީ ޖިއާންގްޝީ ޕްރޮވިންސްގެ ނަންޗަންގް ކައުންޓީގައި އާދީއްތަ ދުވަހު ހިނގި މަގުމަތީގެ އެކްސިޑެންޓެއްގައި 17 މީހުން މަރުވެ 22 މީހުންނަށް އަނިޔާވެއްޖެ އެވެ.
އޮފިޝަލުން ބުނީ އަނިޔާވި މީހުންނަށް ހޮސްޕިޓަލުގައި ފަރުވާދެމުންދާ ކަމަށާއި ހާދިސާ ހިނގަން މެދުވެރިވި ސަބަބުގެ ތަހުގީގެއް ފަށާފައިވާ ކަމަށެވެ.
ޖިމޫ ނިއުސްއިން ބުނީ އެ ހާދިސާ ހިނގީ ޖަނާޒާއެއްގެ ކަންކަން ކުރިއަށް ދިޔަ ސަރަހައްދަކަށް ޓްރަކެއް ވަދެ ޖެހުމުން ކަމަށެވެ. ރިޕޯޓުތައް ބުނާ ގޮތުން ޖަަނާޒާގެ ކަންކަން އޮތީ މަގުގެ އެއް ފަރާތުގަ އެވެ.
އެ ސަރަހައްދުގައި އަޅުކަމުގެ ބައެއް ފުރިހަމަ ކުރުމަށް ފަހު އެ މީހުން އުޅުނީ ސަހަރާއަށް ދިޔުމަށެވެ. ހާދިސާގައި މަރުވި ގިނަ މީހުންނަކީ ޖަނާޒާގެ ކަންކަމުގައި އުޅުނު މީހުންނެވެ.
އެ ހާދިސާ ހިނގިތާ ގަޑިއެއްހާއިރު ފަހުން ނަންޗަންގް ކައުންޓީ ފުލުހުން ނެރުނު އެލާޓެއްގައި ބުނީ އެ ސަރަހައްދުގެ ވައި ނުސާފު ކަމަށާއި ވިޒިބިލިޓީ ދަށްވެފައިވާ ކަމަށެވެ.
ޗައިނާގައި ވަރަށް ގިނައިން މަގުމަތީގެ އެކްސިޑެންޓުތަައް ހިނގަ އެވެ. މިދިޔަ މަހު ހައިވޭއެއްގައި ކާރުތައް ފުނިޖެހި، އެކަކު މަރުވި އެވެ.
މިދިޔަ ސެޕްޓެމްބަރު މަހު ކަރަންޓީންކޮށްފައި ތިބި މީހުން ގޮވައިގެން ދިޔަ ބަހެއް ފުރޮޅާލައި 27 މީހުން މަރުވި އެވެ.
