ކާބޯތަކެތި ޑެލިވަރީ ކޮށްދިނުމުގެ މަސައްކަތުގައި އުޅެމުން، ކަރުދާސްކޮޅުތަކުގައި ލިޔުނު ޅެންތަކެއްގެ މައްޗަށް އެކުލަވާލި ފޮތަކަށް ޗައިނާގެ އަދަބީ ދާއިރާގެ އެންމެ ޝަރަފުވެރި އެއް އެވޯޑު ވާންގް ޖީބިންގް ކާމިޔާބުކޮށްފި އެވެ.
ޑެލިވަރީ ކުރާ މީހުންނަށް ކޮންމެ ދުވަހަކު ކުރިމަތިވާ ގޮންޖެހުންތަކުގެ މައްޗަށް ބިނާކޮށް ލިޔެފައިވާ "ލޯ ފްލައިޓް" ނަމަކަށް ކިޔާ މި ފޮތަށް ލިބިފައިވަނީ "ލޫ ޝުން ލިޓަރަރީ ޕްރައިޒް" އެވެ. މި އެވޯޑު ނިސްބަތްވަނީ ޗައިނާގެ ޒަމާނީ އަދަބިއްޔާތުގެ ބާނީގެ ގޮތުގައި ބެލެވޭ މަޝްހޫރު ލިޔުންތެރިޔާ ލޫ ޝުން އަށެވެ.
އުމުރުން 56 އަހަރުގެ ވާންގް ޑެލިވަރީ ކުރަން ފެށީ 2019 ވަނަ އަހަރުގެ ތެރޭގަ އެވެ. އޭނާ ލިޔާ ޅެންތަކާއި މަޒުމޫނުތަކުގެ ސަބަބުން ސޯޝަލް މީޑިއާގައި އޭނާއަށް ވަނީ ބޮޑު މަގުބޫލުކަމެއް ލިބިފަ އެވެ.
ވާންގް އަށް މި ޝަރަފުވެރި އެވޯޑު މި ލިބުނީ، އެކި ކަހަލަ އާދައިގެ މަސައްކަތްތަކުގައި އޭނާ ހޭދަކުރި ދަތި އުނދަގޫ ދިހަވަރަކަށް އަހަރަށް ފަހުގަ އެވެ.
މި އެވޯޑު ލިބުނުކަން އިއުލާންކުރި ޖުލައި 15 ވަނަ ދުވަހު، ޗައިނާގެ ދައުލަތުގެ މީޑިއާ "ގްލޯބަލް ޓައިމްސް" އަށް ދިން އިންޓަވިއުއެއްގައި ވާންގް ބުނީ، އެވޯޑު އިއުލާންކުރި ވަގުތު އޭނާ ހުރީ ނޭވާ ހިފަހައްޓާލައިގެން ވަރަށް ބޮޑަށް ހާސްވެފައި ކަމަށެވެ. އަދި އެވޯޑާއެކު މީޑިއާގެ ސަމާލުކަން އޭނާއަށް ހުއްޓުމުން ނަފްސާނީ ގޮތުން ބޮޑު ފިއްތުމެއް ކުރިމަތިވި ކަމަށް ވެސް އޭނާ ބުންޏެވެ.
ލޫ ޝުން ލިޓަރަރީ ޕްރައިޒް ލިބޭ ފަރާތްތަކަށް ދޭ ފައިސާގެ އިނާމުގެ އަދަދު އާންމުކޮށް ހާމައެއް ނުކުރެ އެވެ. ނަމަވެސް 2014 ވަނަ އަހަރާ ހަމައަށް އެ އިނާމުގެ ގޮތުގައި ދެމުން އައީ 100،000 ޗައިނީޒް ޔުއާން (ގާތްގަނޑަކަށް 14،800 އެމެރިކާ ޑޮލަރު) އެވެ.
ޖިއަންގްސޫ ޕްރޮވިންސަށް އުފަން ވާންގް، އާއިލާގެ މާލީ ހާލަތު ހުރި ގޮތުން ސުކޫލް ތައުލީމު މެދުކަނޑާލީ ފުރާވަރު އުމުރުގަ އެވެ. ޑެލިވަރީ ކުރަން ފެށުމުގެ ކުރިން އޭނާ ވަނީ އިމާރާތްކުރުމުގެ މަސައްކަތާއި، ކުނި ހޮވުމާއި، މަގުމަތީގައި ގާޑިޔާ ހިންގުން ފަދަ ތަފާތު މަސައްކަތްތައް ކޮށްފަ އެވެ.
އެހެން ނަމަވެސް، ފޮތް ކިޔުމަށް އޭނާ ހުންނަ ލޯތްބަކަށް ބަދަލެއް ނާދެ އެވެ. ވޭތުވެދިޔަ ދިހަ ވަރަކަށް އަހަރުގެ ތެރޭގައި އޭނާ ދިޔައީ އަމިއްލައަށް ލިޔާ ޅެންތަކާއި މަޒުމޫނުތައް ސޯޝަލް މީޑިއާގައި ހިއްސާކުރަމުންނެވެ.
ވާންގް ލިޔުނު "މޭން އިން އަ ހަރީ" ނަމަކަށް ކިޔާ ޅެމެއް 2022 ވަނަ އަހަރު އިންޓަނެޓުގައި ވަރަށް ބޮޑަށް މަގުބޫލުވި އެވެ. އެ ޅެމަކީ 2019 ވަނަ އަހަރު ކަސްޓަމަރަކަށް އެޑްރެސް އޮޅިގެން، ޑެލިވަރީއެއް ނިންމުމަށް އޭނާ ކުރަންޖެހުނު ބުރަ މަސައްކަތާއި ކުރިމަތިވި މާޔޫސްކަމުގެ މައްޗަށް ބިނާކޮށް ލިޔުނު ޅެމެކެވެ.
އޭނާގެ ފުރަތަމަ ޅެން ފޮތް ކަމަށްވާ "މޭން އިން އަ ހަރީ: ޕޮއެމްސް އޮފް އަ ފުޑް ޑެލިވަރީ ރައިޑާ" ޝާއިއުކުރީ 2023 ވަނަ އަހަރު އެވެ.
މިހާ ޝަރަފުވެރި އެވޯޑެއް ލިބުނު ނަމަވެސް، ވާންގް ބުނީ އޭނާގެ ވަޒީފާ ދޫކޮށްލުމުގެ އެއްވެސް ވިސްނުމެއް ނެތް ކަމަށެވެ. އަދި އުމުރުން 60 އަހަރު ވަންދެން ޑެލިވަރީގެ މަސައްކަތުގައި ދެމިހުންނަން ނިންމާފައިވާ ކަމަށް ވެސް އޭނާ ބުންޏެވެ.
