ބޮމެއްގެ އިންޒާރާ އެކު ހޮނިހިރު ދުވަހު ޖެޓްސްޓާގެ ބޯޓެއް ޖަޕާނުގެ މެދުތެރޭގައި އޮންނަ ޗޫބޫ ސެންޓްރެއާ އިންޓަނޭޝަނަލް އެއާޕޯޓަށް އެމެޖެންސީގައި ތިރިކޮށްފި އެވެ.
ޓޯކިޔޯ ކައިރީގައި އޮންނަ ނަރީތާ އެއާޕޯޓުން ފުރި ބޯޓު އެމެޖެންސީގައި ތިރިކުރުމަށް ޗޫބޫ ސެންޓްރެއާ އިންޓަނޭޝަނަލް އެއާޕޯޓުގެ ރަންވޭ ބަންދުކުރި އެވެ.
ޖަޕާނުގެ ދެކުނުގައި އޮންނަ ފުކުއޮކާއަށް ދަތުރު ކުރަމުން ދިޔަ އެ ބޯޓު އެމެޖެންސީގައި ތިރިކުރި ނަމަވެސް އެއްވެސް ނުރައްކާތެރި އެއްޗެއް އެ އުޅަނދުން ފެނިފައެއް ނުވެ އެވެ.
އެ ބޯޓުގައި 136 ޕަސެންޖަރުންނާއި ހަ ކްރޫ މެމްބަރުން ތިއްބެވެ. ބޯޓުން އިވެކުއޭޓް ކުރަން އުޅުމުގެ ތެރޭގައި ފަސް މީހުންނަށް ކުދި އަނިޔާ ލިބުނެވެ.
އެންއެޗްކޭ ނޫހުން ބުނީ ބޯޓު ތިރިކުރީ ޖަރުމަނުވިލާތުން ނަރީތާ އެއާޕޯޓަށް ގުޅި ފިރިހެނަކު ބޮމުގެ އިންޒާރު ދިނުމުން ކަމަށެވެ. އެ މީހާ ބުނީ 100 ކިލޯގެ ޕްލާސްޓިކް ބޮމެއް ބޯޓުގެ ކާގޯ ބައިގައި އޮތް ކަމަށެވެ.
ރިޕޯޓުތައް ބުނާ ގޮތުން ކަމާ ބެހޭ އިދާރާތަކުން ވަނީ އެކަމާ ގުޅޭ ތަހުގީގެއް ފަށައިފަ އެވެ.
