ލަންޑަން (ޖެނުއަރީ 7) - އިނގިރޭސި ގައުމީ ފުޓްބޯޅަ ޓީމުގެ ކުރީގެ ކެޕްޓަން، ޑޭވިޑް ބެކަމްގެ ދަރިފުޅު، ރޮމެއޯ ބެކަމް، ލޯން އެއްބަސްވުމެއްގެ ދަށުން އިނގިރޭސި ޕްރިމިއާ ލީގުގެ ކްލަބް، ބްރެންޓްފޯޑަށް ބަދަލުވެއްޖެ އެވެ.
އުމުރުން 20 އަހަރުގެ ރޮމެއޯ، ކުޅެމުން އައީ އޭނާގެ ބައްޕަ، ޑޭވިޑް ބެކަމް، އެމެރިކާ ލީގު، މޭޖަ ލީގު ސޮކާ (އެމްއެލްސް) ގައި ހިންގަމުން އަންނަ ކްލަބް، އިންޓަ މިއާމީ އަށެވެ. އެކަމަކު، މިއީ އެމްއެލްްއެސްގެ އޮފް ސީޒަން ދުވަސްތައް ކަމަށްވާތީ، ރޮމެއޯ އައީ ބްރެންޓްފޯޑް ޓީމާ އެކު ފަރިތަކުރަމުންނެވެ.
ރޮމެއޯގެ ކުޅުން ކަމުދިއުމުން، ބްރެންޓްފޯޑް ބީ ޓީމުން ވަނީ ހަ މަސް ދުވަހުގެ ލޯން ކޮންޓްރެކްޓެއްގައި އޭނާ އެ ޓީމަށް ސޮއިކޮށްފަ އެވެ.
ބްރެންޓްފޯޑްގެ ބީ ޓީމަށް ރޮމެއޯ ކުޅުނު ނަމަވެސް، ބްރެންޓްފޯޑްގެ ފުރަތަމަ ޓީމުގެ ކޯޗު، ތޯމަސް ފްރޭންކް ބޭނުންނަމަ، ރޮމެއޯ އަށް އިނގިރޭސި ޕްރިމިއާ ލީގުގެ މެޗުތަކުން ފުރުސަތު ދެވޭނެ އެވެ.
އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގެ މެޗެއްގެ ތެރެއިން ބެކަމް (ކ) އާއި ރޮމެއޯ.
ބްރެންޓްފޯޑުން ލިބުނު ފުރުސަތާ އެކު، ރޮމެއޯގެ ވިސްނުމަކީ ވީހާވެސް ގިނަ މެޗުތަކެއްގައި ކުޅުމެވެ. އަދި ފުރުސަތު ލިބިއްޖެނަަމަ ބްރެންޓްފޯޑްގައި އިތުރަށް މަޑުކޮށް، އިނގިރޭސި ފުޓްބޯޅައިގެ ތެރެއިން ޑިވެލޮޕްވުމުގެ ވިސްނުން ހުރިކަމަށް ރޮމެއޯ ވަނީ ބުނެފަ އެވެ.
ރޮމެއޯ، ފުޓްބޯޅަ ކެރިއަރު ފެށީ އާސެނަލް ޔޫތު ޓީމުންނެވެ. ޔޫތު ލެވަލްގައި އާސެނަލްގައި އެކަށީގެންވާ ވަރަށް ކުރިއެރުން ނުފެންނާތީ، ރޮމެއޯގެ އުމުރުން 13 އަހަރުގައި، އާސެނަލުން ވަނީ އޭނާ ދޫކޮށްލައިފަ އެވެ. އެ ހިސާބުން، ރޮމެއޯ ވަނީ ޕްރޮފެޝަނަލް ފުޓްބޯޅައިން ފަސް ވަރަކަށް އަހަރުގެ ބްރޭކެއް ނަގައިފަ އެވެ. އަލުން އެނބުރި އައިސް، ފުޓްބޯޅައިގެ ޓްރެއިނިންތަކެއް ހަދައި، އޭނާ ގުޅުނީ އިންޓަ މިއާމީއާ އެވެ.
މީގެ ދެ އަހަރު ކުރިން، 2021 ވަނަ އަހަރު އެމެރިކާ ލީގުގައި ކުޅެން ފެށި ރޮމެއޯ، ވަނީ މިދިޔަ ސީޒަނުގައި، އެމެރިކާގެ، އީސްޓާން ކޮންފަރެންސް ލީގުގައި ކުޅުނު 20 މެޗުގައި 10 ލަނޑު ޖަހަން ފުރުސަތު ތަނަވަސްކޮށްދިނުމުގެ އިތުރުން ދެ ގޯލު ޖަހައިފަ އެވެ.
