މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރާ ސަރުކާރުގެ މުވައްޒަފުންނަށް ވަޒީފާގެ ބިރު ދައްކަމުންދާ ކަމަށް ތުހުމަތުކޮށްފި އެވެ.
ނަޝީދުގެ ކެމްޕެއިން ޓީމުން މިއަދު ނެރުނު ނޫސް ބަޔާނެއްގައި ބުނެފައި އޮތީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ޕްރައިމަރީގައި ވާދަ ކުރައްވާ ނަޝީދަށް ތާއީދު ކުރާ ނަމަ ވަޒީފާގައި ނުތިބެވޭނެ ކަމަަށް އެކި މިނިސްޓްރީތަކުން މުވައްޒަފުންނަށް އަންގަމުންދާ ކަމަށެވެ.
މި ނާތަހްޒީބު ބިރުދެއްކުމުގެ ޢަމަލުތަކާއި ސަރުކާރުން ނާޖާއިޒް ނުފޫޒު ބޭނުންކުރުމުގެ އަމަލުތަކަކީ، 2008 ވަނަ އަހަރުގެ ރިޔާސީ އިންތިހާބުގެ ކުރިން އެއިރު އޮތް ރައީސް މައުމޫނު އަބްދުލްގައްޔޫމްގެ ޑީއާރްޕީގެ ސަރުކާރުން ފެށިގެން އައިސްފައިވާ ކަންކަން،" އެ ނޫސް ބަޔާނުގައި ބުނެފައިވެ އެވެ.
ވަޒީފާގެ ބިރު ދެއްކުމުގެ އިތުރުން، ނަޝީދަށް ތާއީދު ކުރާ މީހުން އެމީހުންގެ އަމިއްލަ ރަށް ނޫން އެހެން ރަށްރަށަށް ބަދަލުކުރަމުންދާ ކަމަށް ވެސް ނަޝީދުގެ ކެމްޕެއިނު ޓީމުން ބުނެފައިވެ އެވެ. އެއީ ވޯޓުލާ ދުވަހު އެ ހައްގު ނުލިބޭ ގޮތަށް ހެދުން ކަމަށް އެ ނޫސް ބަޔާނުގައި ތުހުމަތުކޮށްފައިވެ އެވެ.
"އެ ނާތަހްޒީބު އަމަލުތައް އަނެއްކާ ވެސް އެމްޑީޕީގެ މި ސަރުކާރުން ދަމަހައްޓައި އެމަގަށް ކަންކަން ބައްޓަންކުރާން މަސައްކަތް ފަށާފައިވާކަމީ މި ކެމްޕޭނުން އިންތިހާއަށް ކަންބޮޑުވާ އަދި ހަމަ އެހައިމެ ހަރުއަޑުން ކުށްވެރި ކުރާ ކަމެއް،" އެ ނޫސް ބަޔާނުގައި ބުނެފައިވެ އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ރައީސް ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
