އެމްޑީޕީގެ ބޯހިޔާވަހިކަމުގެ އެއް ސިޔާސަތަކީ، ސަރުކާރުންނާއި ވިޔަފާރިތަކުން ވެސް ދޫކުރާ ފްލެޓްތަކުގެ ކުލި ދެއްކުމުގައި ދަށް ފަންތީގެ އާމްދަނީ ލިބޭ މީހުނަށް އިނާޔަތެއް ފޯރުކޮށްދިނުން ކަމަށް، އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް، "ހިޔާ" މަޝްރޫއުގެ ފްލެޓްތަކުގެ ސަރަހައްދަށް ވަޑައިގެން ވާހަކަ ދައްކަވަމުން ނަޝީދު ވިދާޅުވީ، ފްލެޓްތައް ގާއިމްކުރަމުން ދާން ވާނީ ދައުލަތް ނުދަރާނެ ސިޔާސަތެއްގެ ތެރެއިން ކަމަށެވެ. އެ ސިޔާސަތު ރައްޔިތުންނަށް ހުށަހެޅީ އެމްޑީޕީން ކަމަށް އެމަނިކުފާނު ވިދާޅުވި އެވެ.
އެއީ ނަޝީދު ވިދާޅުވި ގޮތުގައި، ސަރުކާރުގެ ބަޖެޓުން ނުވަތަ ސަރުކާރުން ލޯނު ނަގައިގެން ބޯހިޔާވަހިކަމުގެ މަޝްރޫއުތައް ހިންގުމުގެ ބަދަލުގައި، ވިޔަފާރި އުސޫލުން ގިނަ އަދަދެއްގެ ފްލެޓްތައް އެއް ފަހަރާ ގާއިމްކުރުމެވެ. އަދި ފްލެޓްތައް ލިބޭ މީހުންގެ ތެރެއިން އާމްދަނީ ދަށް މީހުނަށް އިނާޔަތެއް ދިނުން ކަން ފާހަގަ ކުރެއްވި އެވެ.
ފްލެޓް ކުލި ދައްކަން ދަތިވާ މީހުނަށް އިނާޔަތެއް ދިނުމަކީ އެމްޑީޕީގެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުފުޅެކެވެ. ނަމަވެސް އެ ފަދަ ކަމެއް ސަރުކާރުން އަދި ހަމަޖައްސާފައި ނެތް އިރު، މާލެ ސަރަހައްދުގައި އަދި މި ސަރުކާރުން ފްލެޓްތަކެއް ގާއިމްކުރެވިފައެއް ނެތެވެ.
"ކުލި ދެއްކުމަށް ޓަކައި، އިތުރު އެހީއެއް ދިނުމަކީ ސަރުކާރަށް ކުރެވެން އޮތް ކަމެއް، އެމްޑީޕީގެ ދެން އަންނަ ސަރުކާރެއްގައި ކޮންމެހެން ކުރަން ޖެހޭ ކަމެއް،" މާލެ ސަރަހައްދުން ބޯހިޔާވަހިކަން ދިނުމަށް ކުރީގެ ސަރުކާރުގައި ހިއްކާފައިވާ ހުޅުމާލޭގެ ދެވަނަ ފިޔަވަހީގެ ބިމުގައި ހުންނަވާ ނަޝީދު ވިދާޅުވި އެވެ.
މާލެއާ ކައިރި ފަޅުތައް ހިއްކައިގެން ބޯހިޔާވަހިކަން ދިނުމަށް ވުރެ ފުޅާ ދާއިރާއެއްގައި މާލެ ސަރަހައްދުގެ ބޯހިޔާވަހިކަމުގެ މަޝްރޫއު ހިންގަން ޖެހޭ ކަމަށް ނަޝީދު ވިދާޅުވި އެވެ. އެ ގޮތުން، މާލެ އަތޮޅުގެ މީހުން ދިރިއުޅޭ ރަށްރަށުގައި ފްލެޓްތައް އަޅައި، އެ ރަށްރަށުގެ އާބާދީ ބޮޑުކުރަން ޖެހޭ ކަމަށް ވިދާޅުވި އެވެ.
"މިއީ އެމްޑީޕީގެ ސިޔާސަތުތައް، މި ރާއްޖޭގައި ވެރިކަން ކޮށްދެވޭނީ އަދިވެސް އެމްޑީޕީއަށް، އެމްޑީޕީގެ މި ސިޔާސަތުތަކަކީ އަދިވެސް ދިވެހި ގިނަ ރައްޔިތުން ބަލައިގަންނަ ސިޔާސަތުތަކެއް،" އެމްޑީޕީގެ ފުރަތަމަ ސަރުކާރުގެ ރައީސްކަން ވެސް ކުރެއްވި ނަޝީދު ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ހުޅުމާލޭގެ ފްލެޓްތަކާއި ބިނާތައް ގާއިމްކުރަން ނެގި ލޯނުގެ ސަބަބުން މި ސަރުކާރުން ޓެކްސް ބޮޑުކުރަން ޖެހުމަކީ އާންމު ރައްޔިތުންނަށް ލިބުނު ވަރަށް ބޮޑު ތަކުލީފެއް ކަމަށް ވިދާޅުވެ ދެ ސަރުކާރަށް ވެސް ނަޝީދު ފާޑުވިދާޅުވި އެވެ.
"ދަރަނި އަލުން އެކުލަވާނުލައި، ޓެކްސް ބޮޑުކުރުމަކީ، އެމްޑީޕީގެ މެންބަރުން ސަރުކާރާ މެދު ހިތްހަމަނުޖެހުނު އެންމެ ބޮޑު ސަބަބު،" ނަޝީދު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީ އޮތީ މި މަހުގެ 28 ވަނަ ދުވަހުގަ އެވެ. އެ ޕްރައިމަރީގައި ނަޝީދުގެ އިތުރަށް ދެން ވާދަކުރައްވަނީ ރައީސް ސޯލިހެވެ. ރައީސްގެ ސިޔާސަތުތަކަށާއި ސަރުކާރަށް ނަޝީދު އަންނަނީ ވަރަށް ބޮޑަށް ފާޑުވިދާޅުވަމުންނެވެ.
