ބަންގްލަދޭޝްގެ އެމްޑީ އަލަމްގީރް އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯތައް ބޭނުން ކޮށްގެން ބްލެކްމެއިލް ކުރުމުގެ އަމަލު ހިންގި ކަމުގެ ތުހުމަތުގައި ހައްޔަރުކޮށްފައިވާ މީހުންގެ މައްސަލަ ފައިލްކޮށް، ހައްޔަރުކުރި މީހުން ދޫކޮށްލައިފި އެވެ.
އެއް ޖިންސުން ގުޅުން ހިންގުމަށްފަހު އެ މަންޒަރު ވީޑިއޯ ކުރަމުންދިޔަ އަލަމްގީރުގެ ވީޑިއޯތައް ލީކުވީ މިދިޔަ އަހަރުގެ ޖޫން މަހުގެ ތެރޭގަ އެވެ. އެ ވީޑިއޯތައް ބޭނުންކޮށް ވީޑިއޯގައި ދެން ހިމެނޭ މީހުން ބްލެކްމެއިލްކޮށްގެން ފައިސާ ހޯދަމުން ދިޔަ ކަމުގެ ތުހުމަތުގައި ތިން މީހަކު ހައްޔަރުކުރި އެވެ.
ބްލެކްމެއިލް ކުރި ކަމުގެ ތުހުމަތުގައި ހައްޔަރު ކުރި މީހުނަކީ ބ. ދަރަވަންދޫ، އަކިރި، ހަމްދޫން އަބްދުﷲ (37އ) އާއި ބ. ދަރަވަންދޫ، ހީމަ، މުހައްމަދު މިހާދު މުސްތަފާ (24އ) އަދި ށ. ފުނަދޫ، ސީސްޓާ، މައުމޫން މޫސާ (41އ) އެވެ.
ފުލުހުންގެ މީޑިއާ އޮފިޝަލް "އަދަދު" ނޫހަށް ވިދާޅުވި ގޮތުގައި އެ މައްސަލަ ފައިލް ކުރި ސަބަބަކީ، ޕްރޮސެކިއުޓާ ޖެނެރަލް (ޕީޖީ) އޮފީހާއެކު މަޝްވަރާ ކުރުމުން، ލިބިފައިވާ ހެކިތަކުން ޖިނާއީ ދައުވާ ކުރެވެން ނެތް ކަމާއި މައްސަލަ ފައިލް ކުރުމަށް އެ އޮފީހުން ލަފާ ދިނުމުންނެވެ.
މިދިޔަ އަހަރުގެ ނޮވެމްބަރު މަހުގެ ތެރޭގައި އެ މީހުންގެ މައްސަލަތައް ފައިލްކޮށް، އެ މީހުން ބަންދުން ދޫކޮށްލާފައިވެ އެވެ. ނަމަވެސް، އިތުރު މައުލޫމާތެއް ލިބިއްޖެނަމަ މައްސަލަ އަލުން ހުޅުވުމުގެ ފުރުސަތު އެބަ އޮތް ކަމަށް ވެސް ފުލުހުން ބުންޏެވެ.
އަލަމްގީރް އެއް ޖިންސުން ގުޅުން ހިންގުމަށް ފަހު ވީޑިއޯ ނެގި މައްސަލާގައި އޮރިޔާން ކާޑު އުފެއްދުމުގެ 40 ދައުވާއެއް އޭނާގެ މައްޗަށް ކުރި އެވެ. ޝަރީއަތުގައި އޭނާ އެ ދައުވާތަކަށް އިއުތިރާފުވުމުން، ދެ އަހަރާއި ނުވަ މަސް ދުވަހަށް ޖަލަށް ލުމަށް ކްރިމިނަލް ކޯޓުން ހުކުމްކުރި އެވެ.
އަލަމްގީރުގެ ވީޑިއޯތަކުގައި ހިމެނޭ ގާނޫނީ ވަކީލު ނާޒިމް އަބްދުއްސައްތާރާއި ފުލުހުންގެ ވަޒީފާއެއްގައި ހުރި މ.ރަތްމަންދޫ, ޖަވާހިރުވާދީ، އަބްދުއްރަހްމާނު ރަފީއު އަށް ވެސް ކޯޓުން ވަނީ ހުކުމްކޮށްފަ އެވެ. ނާޒިމް ތިން މަސް ދުވަހަށް ގޭގައި ބަންދު ކުރުމަށް ހުކުމް ކުރިއިރު ރަފީއުގެ މައްޗަށް އިއްވީ އެއް އަހަރާއި ދެ މަސް ދުވަހުގެ ޖަލު ހުކުމެކެވެ.
އޭގެ އިތުރުން ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު (ކާނަލް) ވެސް އެ މައްސަލާގައި ހައްޔަރުކުރި އެވެ. އޭނާގެ މައްސަލަ އަދި ކޯޓުގައި ކުރިއަށް ދަނީ އެވެ.
