ލަންޑަން (ޖެނުއަރީ 3) - ބްރައިޓަންގައި ވަރަށް ހިތްހަމަޖެހޭ ކަމަށާއި އެހެން ކްލަބަކަށް އަވަސްއަރުވާލައިގެން ބަދަލުވުމުގެ ވިސްނުމެއް ނެތް ކަމަށް ވޯލްޑް ކަޕްގައި މޮޅު ކުޅުމެއް ދެއްކި އާޖެންޓީނާގެ މިޑްފީލްޑަރު އެލެކްސިސް މެކް އަލިސްޓާ ބުނެފި އެވެ.
މެކް އަލިސްޓާ ވޯލްޑް ކަޕްގައި ދެއްކި ކުޅުމާ އެކު، ޔޫރަޕްގެ ބޮޑެތި ކްލަބުތަކުގެ ލޯ ވަނީ އޭނާ އަށް އަމާޒުވެފަ އެވެ.
މެކް އަލިސްޓާ ވަނީ ވަނީ ގަތަރުގައި ކުޅުނު ވޯލްޑް ކަޕްގައި ޖުމްލަ ހަ މެޗުގައި ކުޅެފަ އެވެ. ގުރޫޕް ސްޓޭޖުގެ ފަހު މެޗުގައި ޕޮލެންޑް އަތުން އާޖެންޓީނާ މޮޅުވި މެޗުގައި އޭނާ ލަނޑު ވެސް ޖެހި އެވެ.
އަދި ފައިނަލްގައި މެޗުގައި އާޖެންޓީނާގެ އަންހެލް ޑިމާރިއާ ޖެހި އެ ޓީމުގެ ދެ ވަނަ ލަނޑުގައި އެސިސްޓް ހެދީ މެކް އަލިސްޓާ ،23، އެވެ.
މެކް އަލިސްޓާ ބްރައިޓަންއާ އެކު ހަދާފައިވާ ކޮންޓުރެކްޓް ހަމަވާނީ 2025 ވަނަ އަހަރުގެ ޖޫން މަހަށެވެ. އަދި އިތުރު އެއް އަހަރަށް ކޮންޓުރެކްޓް އާކުރުމުގެ އިހްތިޔާރު އެބައޮތެވެ. އެ ކްލަބުގެ އުންމީދަކީ ވެސް ކޮންޓުރެކްޓް ހަމަވަންދެން އޭނާ އެ ކްލަބުގައި މަޑުކުރުމެވެ.
ވޯލްޑް ކަޕްގެ ކާމިޔާބަށް ފަހު، މެކް އަލިސްޓާ އިއްޔެ އެނބުރި ކްލަބާ ގުޅުނުއިރު، ކްލަބުގެ ފަރާތުން އޭނާ އަށް ވަނީ ހޫނު މަރުހަބާއެއް ކިޔައިފައެވެ.
"މި ކްލަބުގެ ކުޅުންތެރިންނާއި ކްލަބުގައި މަސައްކަތްކުރާ ހުރިހާ ފަރާތްތަކާއެކު އުޅެން އަހަރެން ވަރަށް ހިތްހަމަޖެހޭ،" މެކް އަލިސްޓާ ބުންޏެވެ.
"އަހަރެން އަބަދުވެސް ބުނާ ވާހަކައެއް އެއީ މި ކްލަބުގައި ވަރަށް ހިތްހަމަޖެހޭކަން. އަވަސް އަރުވާލައިގެން އެހެން ކްލަބަކަށް ބަދަލުވާން ބޭނުމެއްނޫން."
އާޖެންޓީނޯސް ޖޫނިއާސް އަށް 2016 ވަނަ އަހަރު ކުޅެން ފަށައި، އެ ޓީމު ދޫކޮށް، 2019 ވަނަ އަހަރު ބްރައިޓަން އަށް ބަދަލުވުމަށް ފަހު، މެކް އަލިސްޓާ ވަނީ އަލުން އާޖެންޓީނޯސް ޖޫނިއާސް އާއި ބޮކަ ޖޫނިއާސް އަށް ވެސް ލޯން އެއްބަސްވުމެއްގެ ދަށުން ކުޅެފަ އެވެ.
ވޯލްޑް ކަޕް ކާމިޔާބަށް ފަހު އާޖެންޓީނާގެ ޓީމު އެނބުރި ގައުމަށް ދިއުމުން، އެ ގައުމުގެ ރައްޔިތުން ވެސް ވަނީ ޓީމަށް ހޫނު މަރުހަބާއެއް ކިޔައިފައެވެ.
މެކް އަލިސްޓާ ބުނީ އާޖެންޓީނާގެ ޓީމުން ހޯދި ކާމިޔާބީ އަކީ ކިހާ ބޮޑު ކާމިޔާބެއްކަމުގެ ހަގީގީ އިހުސާސްކުރެވުނީ އާޖެންޓީނާގެ ރައްޔިތުން ޓީމަށް ކިޔި މަރުހަބާ ފެނިފައި ކަމަށެވެ.
"އަހަރެން ފެންކަޅިވި އާޖެންޓީނާ އިން އަހަރަމަނެންނަށް ކިޔި މަރުހަބާއިން. އެ ވަގުތު އިހުސާސްކުރެވުނު މިއީ ކިހާވަރެއްގެ ކާމިޔާބެއްކަން،" މެކް އަލިސްޓާ ބުންޏެވެ.
