ރާއްޖޭގެ އިގްތިސާދީ ހާލަތު ސަރުކާރުން ސިއްރުކުރާ ކަމަށް ތުހުމަތު ކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެކަމަށް ފާޑު ވިދާޅުވެއްޖެ އެވެ.
އިންޓަނޭޝަނަލް މަނިތަރީ ފަންޑް (އައިއެމްއެފް)ގެ ވަފުދެެއް ރާއްޖެ އައިސް އެކުލަވާލި ރިޕޯޓު، ސަރުކާރުން އެއްބަސް ނުވުމުގެ ސަބަބުން އާންމު ނުކުރާ ކަމަށް މި މަހު 28 ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭނުގެ ތެރެއިން ރޭ މާފަންނު ބޮނޑިބަތް ޕާކުގައި ބޭއްވި ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވި އެވެ.
"އާންމު ކޮށްފައިވަނީ އެ ރިޕޯޓުގެ ހުލާސާ މިންވަރު، ސީދާ ޖުމްލަ ފުރިހަމަ ރިޕޯޓް އާންމެއް ނުކުރޭ،" ނަޝީދު ވިދާޅުވި އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުކަން ކުރިން ކުރައްވާފައިވާ ބޭފުޅަކު ނޫހުގައި ނަން ނުޖެހުމަށް އެދި ވިދާޅުވީ، ސަރުކާރުން ބޭނުން ނުވާ މައުލޫމާތެއް އައިއެމްއެފް އިން ހާމަ ނުކުރާނެ ކަމަށެވެ.
"އުސޫލެއްގެ ގޮތުން ރިޕޯޓް އެކުލަވާލާނީ ވެސް ސަރުކާރުން ބޭނުންވާ ގޮތަށް، އާންމު ނުކުރާ އެއްޗެއް ލިޔެފައި ބޭއްވުމުގެ ބޭނުމެއް ނޯންނާނެ،" އޭނާ ވިދާޅުވި އެވެ.
ރައްޔިތުންގެ މަޖިލީހުގެ ރައީސްކަން ވެސް ކުރައްވާ ނަޝީދު ވިދާޅުވީ އައިއެމްއެފްގެ ގާނޫނާއި ގަވާއިދުތައް ވެސް އޮންނަނީ ސަރުކާރަކުން ބޭނުން ނުވާ މައުލޫމާތު ހަމާ ނުކުރާ ގޮތަށް ކަމަށާއި އެ މައުލޫމާތެއް ހިއްސާ ކުރާނީ ހަމައެކަނި ސަރުކާރާ ކަމަށެވެ.
ރައީސް ނަޝީދު ވިދާޅުވީ، އެ މަނިކުފާނު ރައީސް ކަމުގައި ހުންނެވި 2009، 2010 އަދި 2011 އަހަރު އައިއެމްއެފް ގެ ފުރިހަމަ ރިޕޯޓް އާންމު ކޮށްފައި ވާނެ ކަމަށެވެ.
"މައުލޫމާތު ސިއްރުކުރުން އެއީ ލިބޭނެ ފައިދާއެއް ނޫން،" ނަޝީދު ވިދާޅުވި އެވެ. "ކަން އޮތްގޮތް އަޅުގަނޑުމެންނަށް ސާފުކޮށް އެނގުން އެއީ އެންމެ ބުއްދިވެރި ގޮތް، އެންމެނަށް ވެސް މިކަމުގައި ހެޔޮ ލަފައެއްދެވި، ދެން ވާންވީ ގޮތް ވެސް އެނގި، ރަނގަޅު މަގަކަށް އަޅުގަނޑުމެންނަށް ދެވޭނީ،"
ރާއްޖޭގެ ހުރިހާ ކަމެއް ރަނގަޅު ކަމަށް ބުނެ، އަމިއްލަ ނަފްސަށް ދޮގު ހެދުމަކީ ތަރައްގީ އަށް އެޅިދާނެ ވަރަށް ބޮޑު ހުރަހެއް ކަމަށް އެމަނިކުފާނު ވިދާޅުވި އެވެ. ރައީސް ނަޝީދު ވިދާޅުވީ ވަށައިގެންވާ ގައުމުތަކުގެ ތަޖުރިބާ އަށް ބަލަން ޖެހޭނެ ކަމަށާއި އެ ގައުމުތައް އިގްތިސާދީ މާލީ ދަތީގެ ތެރެއަށް ދާން ޖެހުނީ ކީއްވެގެންކަން ވިސްނަން ޖެހޭނެ ކަމަށެވެ.
